Barthelmarkt
| Der Artikl is im Dialekt Obaboarisch gschriem worn. |
Da Barthelmarkt in Oberstimm bei Manching is oans vo de ejdestn Voiksfest vo Bayern. Sein Nama hod a vom Sankt Bartholomä, am Schutzheilign vo de Fischer und Schäfer, der wo gleichzeitig a no Patron vo da Oberstimmer Kirch is. Er is jeds Joar oiwei om letztn Wochnend im August (Freida bis Monda).
As easchte Moi daucht da Barthelmarkt in am Schreim vo 1354 auf, oba angeblich gibts n scho seid de Rema, de wo doda Viecha ghandlt hom[1]. Doda gibts aa heid no an Rossmarkt, auf dem oiwei no Ressa vakafft wean.
Aufm Barthelmarkt gibts - wia af jedm Voiksfest - Bierzejt, Foargschäft, Tandla, Wiaschdlbudn und so weida. Die vier Bierzejt werdn vo vier vaschiedene Brauerein beliefad: Herrnbräu, Toerring, Spaten und Ingobräu.
Wos an Barthelmarkt vo ondere Voiksfest unterscheidt is natiali des gonz eigene Flair. Dazua ghead zum Beispui de eigens komboniade Barthelmarkt-Hymne[2] oda da Barthelmarkt-Monda, wos scho in da Friah um Fimfe olle af de Disch stengan.
2010 hod om Barthelmarkt-Monda da Sänger vo ara Band im Biazejt fia Furore gsorgt, wei a "Sieg" gruafa hod und a boa Leid ausm Publikum des aa mid "Heil" gantwortet hom, zum Tei aa mit ausgstreckte Arm. Spaada hod a se entschuldigt und gmoant, doss a eigndle blouß d Stimmung im Zöit weida okurwen woit und a söiba aa ned woaß, wos eam dozua valeit hod. Ois Konsegwenz is a Stroofvafoahn gegan Sänga eigleit worn und de Band werd in Zukunft nimma eiglon wern. Vo dem Ereignis gibts aa Handyvideos af YouTube und ondane Seitn.[3]
Im Netz Werkeln
- Hoamseitn: www.barthelmarkt.com
- Themenseitn vom Donaukurier
Beleg Werkeln
- ↑ Donaukurier.de vom 26.08.2015: Warum der Barthelmarkt "Barthelmarkt" heißt (Memento des Originals [1] vom 29. Juni 2017 im Internet Archive)
Info: Der Archivlink wurde automatisch eingesetzt und noch nicht geprüft. Bitte prüfe Original- und Archivlink gemäß Anleitung und entferne dann diesen Hinweis.
- ↑ Donaukurier.de vom 24.08.2014: Die Geschichte und der Liedtext vom Barthelmarkt-Lied (Memento des Originals [2] vom 26. August 2015 im Internet Archive) Info: Der Archivlink wurde automatisch eingesetzt und noch nicht geprüft. Bitte prüfe Original- und Archivlink gemäß Anleitung und entferne dann diesen Hinweis.
- ↑ Süddeutsche Zeitung vom 03.09.2010: Barthelmarkt in Oberstimm bei Ingolstadt: Sieg-Heil-Rufe im Bierzelt
