Der Artikl is im Dialekt Berchtsgoanarisch gschriem worn.

De so gnenntn Homerische Hymnen san a Sommlung vo 33 Preisliadan auf antike griachische Gottheitn, Songgstoijtn unn oans "auf die Gastgeber". Ihrane Läng variiat vo nua a boa (da zwoate auf Demeter hot ledigli drei) bis 580 Vers beim Hermes. As Versmoß is wia bei de Epn vo Homer ausschliaßli da Hexameta, aa de Sproch is stoak o de homerischan Epn oglehnt.

De Datierung is umschdriedn, de Hymnan derfatn oba im Laf mehrana Joahundat o vaschiadane Oat entstondn sei: Währand de ejjtastn vamutli scho im 7. Joahundat v. Kr., oijso boijd noch de Epn Ilias unn Odyssee aufzeichnat woan san, stomman de jingstn woij eascht aus hellenistischa Zeit.

Monche vo de Gottheitn san mit mehrane Hymnan bdocht woan, so Demeter, Apollon, Aphrodite unn Hermes, dene je oana vo de sognenntn "via groußn Hymnan" gweiht is. In da Sekundärlitaradua variiat de Reihnfoijg vo de Hymnan aus vaschiadane Grind. De foijgande Auflistung findt se zum Beischbuij bei Karl Arno Pfeiff (sieg Litaraduaogomn):

  1. Auf Demeter (2 Hymnan, davo oa groußa)
  2. Auf Apollon (2 Hymnan, davo oa groußa)
  3. Auf die Musen und Apollon
  4. Auf Aphrodite (3 Hymnan, davo oa groußa)
  5. Auf Hermes (2 Hymnan, davo oa groußa)
  6. Auf die Allmutter Erde
  7. Auf die Mutter der Götter
  8. Auf Helios
  9. Auf Selene
  10. Auf Zeus
  11. Auf Hera
  12. Auf Poseidon
  13. Auf Artemis (2 Hymnan)
  14. Auf Athena (2 Hymnan)
  15. Auf Ares
  16. Auf Dionysos (3 Hymnan)
  17. Auf Hephaistos
  18. Auf Pan
  19. Auf Hestia (2 Hymnan)
  20. Auf Asklepios
  21. Auf den löwenmutigen Herakles
  22. Auf die Dioskuren (aa Tyndaridn gnennt, 2 Hymnan)
  23. Auf die Gastgeber.

Litaradua Werkeln

  • Homerische Götterhymnen, vadeitscht vo Thassilo von Scheffer. Jena: Diederichs 1927
  • Gerd von der Gönna unn Erika Simon (Hrsg.): Homerische Hymnen. Übertragung, Einführung und Erläuterungen von Karl Arno Pfeiff, Stauffenburg Verlag, Tübingen, 2002 (Ad Fontes; Bd. 8), ISBN 3-86057-074-9
  • Richardson, N. J. [ed.] The Homeric Hymn to Demeter. Oxford University Press, Oxford, 1974. (Da wissnschoftliche Standardkommentar)