Ala I Britannica

Der Artikl is im Dialekt Owaöstareichisch gschriem worn.

D Ala I Flavia Augusta Britannica Milliaria (easchde britische Flügi-Ainheit) woa a römische Kavalari-Ainheit de im 1. Joahundat noch Grisdus in Vindobona schdazioniad woa. Se hod woaschainli aus 1000 beritane Soidodn beschdaundn (milliaria = Dausndschoft) und a de kaisalichn Eanditl Flavia Augustana draung. Da Naum deit aussadem drauf hii das de Ainheit uaschbrüngli in Britanien ausghom woan is.

D Alae oigemain

In da Zeid fu da remischnRepublik (bis zan Julius Caesar) hod a jede Konsular-Arme zwoa Raitarai-Einheitn fia de rechte und linke Flankn ghobt. Fu dem lait si a da Naum "ala" (lateinisch fia "Flügi") ob. Da waid gressane Tei fu ana Legion woa owa oiwai de Infantri.

In da remischnKaisazeid woa a Ala a Einheit de zu da Untaschdüzung fu ana Legion beschdimt woa ois Auxiliardrupn. Raungmesig is a Ala owa oiwai iwa de Kohortn fu de Infantri-Auxiliareinheitn gschdaundn. A Legion is mid de ia zuadaidn Hüfseinhaitn auf bis zu 8.000 oda 10.000 Mauna kema. Alae hod s aussadem in zwoa faschidane Gressn gem:

ala quingenaria: umara 500 Kavalaristn in 16 Turmae mid jewais 32 Mauna
ala milliaria: ziaka 1000 beridane Soidodn in 24 Turmae mid bis zu 42 Mauna

Gschicht

Rekonsdrukzion fu am remischnSotl

Es hod im gaunzn remischnReich neta 7 Alae fu da zwoatn Soatn gem, oiso mid 1.000 Mau. De Ala I Britannica woa oiso oane fu de wichdign beridanen Einheitn im Imperium Romanum.

Fum Joa 43 bis 68 noch Grisdus woa d Ala I Britannica in Britanien schdazioniad, zu ana Zeid in dea untam Kaisa Claudius a grossa Tei fu da Insl fu de Röma earowat woan is. Es hod zwoa schau untam Julius Caesar Fasuach gem Britanien zan earowan, owa eascht mid da Invasion fum Claudius im Joa 43 noch Grisdus haum si de Röma doat fest sezn kina.

Ungefea ob n Joa 70 noch Grisdus woa de Ala I Britannica in Vindobona, im heiting Wean, zu da Fataidigung an da Donaugrenz schdazioniad. Ma hod a in Wean bai archeologische Ausgrowungen Rosschdoi aus da frian remischnZeid gfundn und glaubt das de Ainheit bai da heiting Freyung im easchdn Beziak ia Auxiliar-Kastel ghobt hod. Des is owa ned hundat brozentig sicha. Wos ma gfundn hod san 3 Grobschdoana fu Legionea fu deara Ainheit. Im Joa 96 noch Grisdus is de Ala I Britannica woaschainli fu da Legio XIII Gemina in Vindobona oglest woarn und waida de Donau flusobweats im untan Panonien scdazioniad woan. Aundane Foascha glaum das ned de Legio XIII sondan de Ala I Batavorum ois Nochfoiga in Vindobona woa. D Ala I Britannica is jednfois nu bis ins 3. Joahundat in da Brovinz Pannonia Inferior, im heiting Ungarn und Seabien, hisdoarisch nochwaisboa. [1] [2]

In oam Beleg wiad de Ainheit mid iara foin Bezaichnung gnend, wos hisdoarisch a nu aufschlusreich is, nemli: Ala I Flavia Augusta Britannica milliaria civium Romanorum bis torquata ob virtutem (kaisalich flavische-augustianische Flügi-Arme aus Britanien Numa 1, mid 1000 Maun de s römische Biagarecht haum und de zwoa Moi auszaichnet woan is fia ia Dopfakaid). [3]

Schau aa

Beleg

Günther Dembski, Michaela Zavadil, Denes Gabler: Ausgewählte Funde vom Rennweg 44 in Wien - Wiener Archäologische Studien 6, Wien: Magistrat der Stadt Wien – Stadtarchäologie (Hg.), 2004, 164 S., ISBN 978-3-901232-49-7
www.imperiumromanum.org Die berittenen Hilfstruppen des Imperiums
Forschungsgesellschaft Wiener Stadtarchäologie - Artikl Römazeid (auf Hochdeitsch)
Informationen über die römische Armee - Artikl fum Stefan Ramseier (#auxiliarstandort)