Behmische Dudlsock-Musi

Der Artikl is im Dialekt Ostestareichisch gschriem worn.

De behmische Dudlsock-Musi (tschechisch: Dudácká muzika) is a typische Fuam vo da Voiksmusi im westlichn und siidlichn Behman. Ois Hochbuagn vo dera Musi göötn de Städt Strakonitz/Strakonice in Siidbehman und Taus/Domažlice in da historischn Region Chodnlaund (Chodsko) in Westbehman. De behmische Dudlsock-Musi is aa eng mid de Trachtlagruppm vo de jeweulichn Regionan vabundn, so wia im boarischn Sprochraum oft de Blechmusi.

Instrument

Is Hauptinstrument is –wia da Naum scho sogt - a bsundare Fuam vom Dudlsock, und zwoa da Behmische Bock, dea wos auf tschechisch Dudy (feminin, Pluraletantum) bzw. im Chodnlaund Pukl haaßt. De heitign Dudlsäck in Behman san auf Es-Dur eigstööd. Außadem gibt’s no a zwaa Suatn vo Glarinettn: de Es-Glarinettn spüüt de easchte Stimm und de B–Glarinettn de zwoate. Außadem kennan aa no Streichinstrumente, wia vaschiedane Suatn vo Geign und a Kontrabass dabei sei. Kontrabass und Geign gebm dera Musi an gwisse Grundmelodie. Außadem kennan fia an stärka betontn Rhythmus aa no de Saugeign und da Fanfrnoch, a speziölle behmische Tromme, eihgsetzt wean. Gsunga kaun aa dazua wean.

Heifige Besetzungan

Klaane Bauanmusi (Malá selská muzika): Dudlsock, Es-Glarinettn, Geign
Große Bauanmusi (Velká selská muzika): Dudlsock, Es-Glarinettn, B-Glarinettn, Geign
Klaane Dudlsock-Musi (Malá dudácká muzika): 1-2 Dudlsäck, Es-Glarinettn, B-Glarinettn, Geign, Kontrabass
Große Dudlsock-Musi(Velká dudácká muzika): 2 Dudlsäck, Es-Glarinettn, B-Glarinettn, 2-3 Geign und Kontrabass, foiweis Bratschn

Im Netz

Radio Prag: Dudelsackmusik aus dem Chodenland (deitsch)