Boarische Grammatik (Adverb)

Der Artikl do gheart zua Artiklsammlung iba'd Grammatik vo da Boarischn Sproch. A Ibasicht iba olle Artikl zum Thema findt ma in Boarische Grammatik.

Der Artikl is im Dialekt Owaöstareichisch gschriem worn.

auf Boarisch: oa Adweab (Sg.), zwoa Adweam (Pl.)

D Adweam san a Grupn fü Wöata de Zeidwöata, oiso Weam, neha definian, owa genau kinan si si a auf Partizipe, aundare Adweam oda gaunze Sez beziang.

Unfaendalichkaid

Adweam san ned dekliniaboa und ned konjugiaboa, des hoast se faendan si ned noch Geschlecht, Zoi, Foi oda Zeid, sondan san oiwai gleich.

	Baischbü - Unfaendalichkaid
m	Ea ged laungsaum
f	Si ged laungsaum
Pl.	Mia gengan laungsaum
Foi (Akk.)	Siagst du de laungsaum foaradn Autos?

Adjektif und Adweam

Im Gegnsoz zu aundane Schbrochn kau auf Boarisch jeds Adweab a Adjektiv wean, waun si si auf a Substantif, oiso Hauptwoat, beziagt. Es gibt koane Adweam de si fum fagleichboan Adjektif in da Foam untascheitn, aussa em dass unfaendalich san. In aundane Schbrochn gibz des schau.

Schbroch	Adweab	Adjektif	Adweab	Adjektif
Englisch	well	good	badly	bad
Franzesisch	bien	bon/bonne	mal	mauvais(e)
Schbanisch	bien	bueno/buena	mal	malo/mala
Italienisch	bene	buono/buona	male	malo/mala
Latein	bene	bonus/bona/bonum	male	malus/mala/malum
Boarisch	guad	guad	schlecht	schlecht

Baischbü: Ea kaun guad kocha. Seine Rezepte san guad. Ea is guad.

Adjektife wean owa im Gegnsoz zu Adweab schau an s Geschlecht, de Zoi und in Foi fu eanam Bezugswoat aubasst.

Baischbü: Ea is a guada Koch. Si is a guade Kechin. Mia san guade Kech. De guadn Kech san oiwai gfrogt.

Oatn fu Adweam

Es gibt faschidane Oatn fu Adweam, je nochdem wöche Funkzion dass in am Soz iwaneman. Ma untaschait:

• Tempoaral Adweam (Waun?)
• Lokal Adweam (Wo?)
• Kausal Adweam (Wiaso?)
• Modal Adweam (Wia?)
• Intarogatif Adweam (Frog)
• de Boarischn Richtungsadweam (Wohi?)

Tempoaral Adweam

Tempoaral Adweam beschdiman de Zeid neha in dea a Haundlung bassiad. Se san im Boarischn bsondas wichdig, wai damid oft de Benuzung fu da Fagaungenheit oda fost oiwai fu da Zukunft fum Weab, oiso fum Zeidwoat, famidn wean kaun. S Boarische mog nemlich koane kompliziadn gramatikalischn Obwaundlungen, sondan nimd dafia liawa Adweam hea. S Frogewoat fia de Tempoaraladweam is Waun?

Baischbü fia Tempoaraladwean (OMB) san:

Dog	Joa	Moment	Zukunft	Fagaungenheit
heit	haia	jez/iatz	glai	grod
moang	negsts/naxt´s Joa	sofoat	daun	voahea/voring
iwamoang	iwanegsts/ibanaxt´s Joa/Joh	grod	boid	zeascht
gesdan	voarigs Joa	nia	schbeda	domois
voagesdan	voavoarigs Joa	oiwai	nocha	fria

Es gibt natiali nu fü aundare Tempoaral-Adweam, wia: oft, södn, ima etc.

D Temporal-Adverbien und de adverbialn Asdrick af Nordboarisch:

Hiwais: Gnennt han olle bekonntn Forma, dej kinna je nouch da Gechad ondeascht sa, oder in da sölm Gechad newaronand stej (von nerdlinga oder n sidlinga Boarischn Sprouchraum, oder traditionölle und standarddeitsch-nejchtere).

• On wölchan Toch?
  • vorgestern • gestern
  • haint, hait
  • marng, morng, moing • on ondern Toch, en ondern Toch • iwamarng • iwan ondern Toch, on iwanejchstn Toch
  • in ocht Toch, iwa ocht Toch, in ara Wocha • in da ondern Wocha, de onder Wocha
• In wölchan Jouer?
  • vorfern, vorfernd, vorferd, vorferdn, vorvoigs Jouer • fern, fernd, ferd, ferdn, voigs Jouer
  • haier
  • in ondern Jouer, es onder Jouer, nejchst Jouer • iwanejchst Jouer
• Da Ofong oder es End
  • zeascht, zejeascht
  • zletz(t) • af d Letz(t)
• Vor wos? Nouch wos?
  • ejerer, ejender, eerer, eender, frejer • frej
  • nou, noucha(t), nocha(t) • spejter, spouter, spater • spejt, spout, spat
• D Zeid
  • ejchadwenn, irchadwenn • amol
  • frejers, ejers, durtmols, söllmols • letz(t)ing, nale, nalings, durtamol • voing • grod
  • grod • ejtz, ejtza(t), sufurt
  • dawal, derawal
  • glai • bol(d)
• Wej long? Wej oft?
  • nej
  • söltn • ejamol, hinawider, monchsmol
  • a weng • a wal
  • efters • oft, gern
  • zmejeascht, zmeeascht, zmea(n)st, zmoast, zmoist, zmaist, (z)maistns • de mejeascht, meeascht, mea(n)st, moast, moist, maist Zeid
  • ollawal, owl, owa, immer, ummer • ollamol • de gonz Zeid, in oaner Tur • furter
• Toch und Nocht
  • untertogs • ban Toch
  • iwanocht • ba da Nocht
  • d Frej: in da Frej, z marchads, z morchads • gestern, haint, marng frej
  • da Vormittoch: (z) vormittogs, om Vormittoch • gestern, haint, marng (z) vormittogs, vormittoch
  • da Mittoch: (z) mittogs, om Mittoch • gestern, haint, marng (z) mittogs, mittoch
  • da Noumittoch: (z) noumittogs, (z) nomittogs, om Noumittoch, om Nomittoch • gestern, haint, marng (z) noumittogs, noumittoch, (z) nomittogs, nomittoch
  • da Oumd: (z) oumds, om Oumd, af d Nocht • gestern, haint, marng (z) oumds, oumd, af d Nocht • nachtn (= gestern z oumds)
  • d Nocht: (z) nochts, in da Nocht • gestern, haint, marng (z)nochts, nocht

Lokal Adweam

Lokal Adweam prezisian in öatlichen Raumen fu ana Haundlung. Wo bassiad des iwa des grod gret wiad? Lokale Adweam beziang si auf an beschdimtn geografischn Punkt und Richtungsadweam (schau untn!) beziang si auf de Richtung in de a Haundlung oda a Bewegung ged. S Frogewoat fia de Lokaladweam is Wo?

Baischbü fia Lokaladweam san:

Englisch	WMB	OMB	NB	SB
here	do	do	dou	do
there	dort/dot	dort/durt	durt, dur(t)n	dort / zelm
over here	hearent / heri(b)m	hearent	heream	herentn / heribm
over there	drent / drim / entn	drent /drüm	dream	entn / drent(n) / dribm
down there	untn	untn	unt(n)	unt(n)
nowhere	nirgads / nindascht		nejchads / nirchads
everywhere	iwaoi		iwaol
somewhere; anywhere	irgadwo / anort(s)		ejchadwou / irchadwou / wou

Nu mea Baischbü waradn: links, rechts, draust, drin, hearin,hidaunt, hibai, om, unt, hint, foan, …

Kausal Adweam

Kausal Adweam kem an Grund oda Zusaumenhaung au, in dem oda zweng dem a Haundlung bassiad. S Frogewoat fia de Kausaladweam is Wiaso, auf wöche Oat?

Baischbü san: desweng, drozdem, nemli, sunst, aso …

Modal Adweam

Modal Adweam gem au auf wöcha Oat und Wais a Haundlung bassiad. S Frogewoat fia de Modaladweam is Wia?

Baischbü san: filaicht, gean, laida, rechd, ned, hoibwegs / haifde, hibsch, …

A por Modaladverbien vastirkase bedeitungsmasse, bol'mas betont:

• gonz: Des is gonz gut = Des is orch guat; Des is gonz guat = Des is niat schlecht, owa nuniat guat
• recht: Da Gongstaich is recht schmol = Da Gongstaich orch schmol; Da Gongstaich is recht 'schmol = Da Gongstaich is zwor schmol, owa es gejt nu
• gwis: Des is gwis olt = Des is sicher olt; Des is gwis olt = I denk'ma, das des olt is, owa i woiss niat sicher, ob des olt is

Intarogatif Adweam

Intarogarif Adweam braucht ma, damid ma a Frog iwa a Haundlung ailaitn kau.

Baischbü san: Wo?, Waun?, Wos?, Wea? Wia?, Warum?, Wiaso?, Wohi?, …

d Boarischen Richtungsadweam

Im Boarischn gibt s a recht ausdifarenziads Sisdem fu Richtungsadweam, de ned neta auzoang wohin a Bewegung ged (z. B. gee, kema, foan, fliang, graxln, schwima, rena etc.), sondan a wo de Peason si befint, de wo de Aussog mocht. Es mocht an Untaschiad ob ma sogt: Ge ins Haus aina, oda ge ins Haus aini. Des oane Moi is de Peason, wo des sogt, im Haus drin, des aundane Moi iss draust. S Frogewoat fia de Richtunngsadweam is Wohii?

Des Sisdem fu de Richdungsadweam kimt uaschbringlich ausn mitlhochdeitschn Boarisch und in Rudiment gibt s des auf Umgangsdeitsch a nu, wiad owa doat ned so konsequent fawent. (Geh ins Haus herein! / Geh ins Haus hinein!). Im Hochdeitschn owa legt ma ah an starkn weat drauf (Komm herein/Geh hinein)

Oladings muas ma song, das de Richdungsadweam ned im gaunzn boarisch Schbrochraum einheitlich san, sondan es gibt jewails mearane faschidane Foamen im Mittlboarischn und wida aundare im Noadboarisch und im Siidboarischn. Desweng is des fia ned-Boarisch-Schbrecha hoibwegs schwa zum faschdee. Boarisch-Schbrech söwa faschdengan owa maistns a de Foamen fu aundane boarischn Dialekte wia eanam aigenen.

A Baischbü fia s Mitlboarisch (MB) is de Tabön:

Englisch	hea	hi	do	doat
inside	aina	aine	hearin	drin
outside	aussa	ausse	hearaust	draussn
up	aufa	aufe	hearom	drom
down	owa	owe	hearunt	druntn
forth	fiara	fiare	heafoan	foan
behind	hintra	hintre	hintn	dahinta
over there	dauna	daune	headaunt	hidaunt
over here	uma	ume	hearüm, hearent	drüm, drent
closer	zuwa/zuara	zuwe/zuare	heabai	hibai
through	duacha	duache	duach	duach

Orts- und Richtungsadverbien af Nordboarisch:

Standarddeitsch	her	hii	dou	durt
herein + hinein + drin	aina, aicha	aine, aiche	herinn, herinna(t)	drinn, drinna(t)
heraus + hinaus + draußen	assa	asse	herass(n), herasst	drass(n), drasst
herauf + hinauf + droben	affa	affe	heroom(at), heruum, heruam	droom(at), druum, druam
herunter + hinunter + drunten	ora, owa	oi(che), owe	herunt(n)	drunt(n)
vor + vorn	fira	fire	hervorn	vorn
hinter + hinten	hint(r)a	hint(r)e	herhint(n)	hint(n)
nach	noucha	nouche
herüber + hinüber + drüben	iwa, iwara, umma	iwe, iware, umme	heream, heriim(a), herent	dream, driim(a), drent
auf … zu + her, hin	zoua	zoue	her(a)	hii
heran + dran	ona	one	heroo	droo
weg	weg(ga)	wegg	wegg	wegg
durch	durcha	durche	durch	durch
weg … zu, weg … von	dona	done

• done, dona: „dan-hin“, „dan-her“; owadeitsche Houchsprouch frejers: hindan, herdan (schau ar af Deitschs Werterbouch). In Neihouchdeitschn houtse ner nu von dannen daholtn.
• -a und -e: Dej Endunga han Vaschlaifunga vo -her und -hii, olso beispülswais aina = ain-her, aine = ain-hii.

Obkiazungen

• MB = middlboarisch

• WMB = westmiddlboarisch
• OMB = ostmiddlboarisch

• SB = südboarisch
• NB = noadboarisch