Der Bulle von Tölz: Wenn die Masken fallen
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Wenn die Masken fallen |
| Produktionsland | Deitschland |
| Originalsproch | Deitsch/Boarisch |
| Läng | 93 Minutn |
| Oitasfreigob | FSK 12 |
| Einordnung | Staffel 11, Foig 2 49. Foig insgesamt |
| Easchdausstrohlung | 10. Novemba 2004 auf Sat.1 |
| Stab | |
| Regie | Wolfgang F. Henschel |
| Drahbuach | Franz Xaver Sengmüller |
| Produktion | Ernst von Theumer junior |
| Musi | Uli Kümpfel |
| Kamera | Thomas Schwan |
| Schnitt | Michael Breining |
| Bsetzung | |
| |
Wenn die Masken fallen is a deitscha Feansehfuim van Wolfgang F. Henschel ausm Joar 2004 noch on Drahbuach van Franz Xaver Sengmüller. Es is de 49. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 10. Novemba 2004 af Sat.1 ausgstroit worn.
Handlung Werkeln
D’Resi Berghammer hod on Partyservice af d’Fiaß gstejd und hod aa glei zwoa lukrative Afträg: Da „Freizeitclub der Abenteurer“ in da „Villa Safari“, a Swingaklub, dea wo grod afmocht, und da „Katholische Verein zur Erhaltung der moralischen Sauberkeit“ van Prälatn Hinter vasammlt si ois Reaktion af de Eaeffnung van Swingaklub. Prominente Untastitzung kriagt da Prälat van Landdogsobgeordnetn Erich Schöppl und van eascht vor kuazm nei gwejdn Landrod Edgar Heilmeyer, dea wo a schoarfe Red zua moralischn Saubakeit hoid.
De Eaeffnungsparty van Swingaklub kannt schlechta ned laffa: Zeascht rauban zwoa Maskiate de Weatsochn und Kreditkoartn vo de Bsuacha, und donn findn a poar Gäst im Spiaglkabinett afm Schwebebett de dadrosslte Leich vo da Susanne Büscher. Fia de Betreiba Gerhart Rautmann und Sylvia Spindler, de wo an Swingaklub fia ra anonyme Investorengruppn loatn, is des a Katastroph.
Fia de Kriminala Benno Berghammer und Sabrina Lorenz valaffan de Eamittlungan zach, wei de Betreiba je zwoa Maskn in untaschiedliche Variationa on 100 Peasona gschickt hom; vo dena san ebba 30 da Eilodung gfoigt. Außadem san de Gäst am spadan nochm Leichnfund obghaut. Olle Raim san videoibawocht, oba ausgrechnd de Kamera im Spiaglkabinett is ausgfoin.
Es stejd si außa, doss da Landdogsobgeordnete Schöppl ned nua an Saubakeitsvarein untastitzt, sondan aa oana vo de Investoren van Swingaklub is. Fia eam schliaßt des oane as ondane ned aus.
De Manuela Heilmeyer, de Ehefrau van Landrod, sogt bei da Kommissarin Lorenz aus, doss aus Rache fian Seitnsprung vo ian Mo midm Ehepoar Fred und Susanne Büscher im Klub woar. Se und de Susanne hom zun Gspass de Maskn tauscht, wos oba nua da Fred midkriagt hod. Untam Druck vo de Kommissar gibt da Landrod zua, doss ea a gschlampads Vahäitnis mid da Olga Obwalla ghobt hod. Se dan jetzad oba nua no guade Freind; ea hod festgstejd, doss ea sei Frau imma no liabt. Laut da Olga Obwalla bsteht des Vahäitnis imma no. Ia Mitbewohnarin Lisa sogt aus, doss da Edwin Heilmeyer mid da Olga im Swingaklub woar, wei ea schaung woit, ob sei Frau aa do is, oba ea hods ned gfundn. De Lisa sogt aa no, doss de Olga de Frau woar, de wo de Leich ois Easchte entdeckt hod, und wia d’Olga de Maskn vo da Todn glupft hod, woars enttaischt, doss’s de Foische dawischt hod.
Da Gerhart Rautmann wui d’Manuela Heilmeyer fia si gwinna, oba de sogt, doss ia Affär vorbei is. On dem Dog, Wos eam kennagleant hod, iss dahintakemma, doss ia Mo nemnaus gehd; es woar reine Rache.
De Olga Obwalla kriagt van Landrod Heilmeyer an Laffposs. Aft wuis eam beweisn, doss sei Frau eam imma no bscheißt; oiso beobochtn se und de Lisa obwechslungsweis d’Manuela Heilmeyer.
De Kommissar kriang a poar Wortfetzn vo on Streitgspräch zwischad an Fred Büscher und an Landrod Heilmeyer mid, wo se si gengseiti da Eifasucht bezichtign. De Kommissarin Lorenz glabt, doss’s fian Büscher a Gschenk van Himme warad, wonn jeda glabad, doss de zwoa Frauan vawechslt worn san.
Da Landdogsobgeordnete Schöppl gibt zua, doss sei Engagement alloa an Zweck deant hod, doss da Landrod und seine Woihejfa in on Sittnskandal vawicklt wean. Zun Ibafoi afn Klub moant ea, doss des unbeschoitne Hoibstoarke aus an Prälatn Hinter seina Jugadgruppn woarn, de wo si mid Spuizeigpistoin on harmlosn Foschingsscheaz gleist hom, midm Zui, doss af Obwege grotne Buaga eanichtad und fia ra woitätige Spendnaktion dawearmt wean.
De Olga Obwalla wui grod im Kommissariat ia Aussogeprotokoi untaschreim, do vazejhd de Lisa telefonisch, doss de Heilmeyerin grod on männlichn Bsuach kriagt hod. Da Berghammer und de Lorenz woin wissn, wea dea Mo is, und foarn zun Haus van Landrod.
Dawei hod da Gerhart Rautmann de Manuela Heilmeyer gfesslt und kneblt und wuis dafia stroffa, doss se eam ned dahead hod. Wia de Kommissar eitreffan, hearns on laffadn Motor aus da gschlossnan Garage und kinnan de zwoa Autoinsassn grod no rettn.
Nemhandlung Werkeln
Noch de schrecklichn Eaeignisse im Swingaklub nutzt da Prälat Hinter de Glengheit und wui ob sofort jeds Joar de Sankt-Michaels-Ehrenmedaille on Peasona valeihn, de wo si um de Eahoidung vo da Moral vadeant gmocht hom. Fia sei engagiate Red ban Sittlichkeitsvarein soi da Landrod Heilmeyer da easchte Empfänga vo deara Auszoachnung sei. Wia da Benno Berghammer eam sogt, doss da Landrod woahrscheinli am sejbn Omd mid sein Gspusi im Swingaklub woar und af da Listn vo de Moardvadächtign gonz omad steht, mechad da Prälat an Landdogsobgeordneten Schöppl de Medaille valeihn. Oba raa vo dem Kandidatn rodt da Berghammer eam ob, wei da Schöppl seine politischn Gegna samt Ohong in an Swingaklub zong hod. Da entsetzte Prälat wui si jetzad neamma blamian und suacht noch on Preisträga, dea wo bei Presse und Polizei a weiße Westn hod, und do kimmt fia eam nua oana in Frog: da Benno Berghammer. Oba dea lahnt de Auszoachnung so vehement ob, doss da Prälat af de Nodlösung fian Eanstfoi zruckgreift: Ea valeiht si de Sankt-Michaels-Ehrenmedaille sejba.
Hintagrund Werkeln
Gfuimt worn is z Däiz und z Minga;[1] ois Schaublotz fia de „Pension Resi“ homs as Hollerhaus Irschnhausn heagnumma.
Kritik Werkeln
De Programmzeitschrift TV Spielfilm schreibt: „Fischer agiert träge inmitten einer überkonstruierten Geschichte und überforderten Mitspielern.“ Fazit: „In jeder Hinsicht viel zu behäbig.“[2]
Im Netz Werkeln
- Wenn die Masken fallen in der Internet Movie Database (englisch)
- Wenn die Masken fallen bei Fernsehserien.de
Beleg Werkeln
- ↑ Wenn die Masken fallen – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Wenn die Masken fallen – Filmkritik bei TV Spielfilm
| Vorherige Foig 17. Meaz 2004: Krieg der Sterne |
Episodnlistn | Nächste Foig 6. Oktoba 2004: Der Tölzi |