Eduardo Galeano

Der Artikl is im Dialekt Owaöstareichisch gschriem worn.

Da Eduardo Hughes Galeano (* am 3. Septemba 1940 in Montevideo, Uruguay; † am 13. Aprü 2015 ebndo) woar a uruguayischer Schoanalist, Essayist und Schriftstölla. Seine Schriftn a Mischzaangung vu mearare Literatua-Gottungen und san in vüü aundare Sprochn üwasetzd woan. Ea söiwa hod si dagen gweahd, dass ma eam an Historika nennd, ea hod owa gschriebn, damid a an gschichtliche Sochn voa oim vu Lateinamerika erinnan kau.

Ea hod ois ana vu de Vafechta vu da Dependenztheorie auf da litararischn Seitn goitn und si duach a kloare, oafoche und gwitzde Sproch auszeichnt.

Sei Lem

Da Galeano is aus ana vu Eiropa obstaummendn, katholischn Familie aus da Mittlklass kumma. Sei Traum ois Kind, dass a a Fuaßbolla wiad, is in maunche Schriftn außazumlesn. Mid 14 hod a a easchte politische Karikatua an'd El Sol vakauft, d'Zeidung vu da uruguayischn sozialistischn Paatei.

Mid 20 is a bei da MARCHA, ana Zeidschrift fia Kuitua und Politik, bei dea aa da Mario Vargas Llosa und aundare bekaunnte Leid schau midgschrim haum, da stövatretnde Schefredaktea woan; späda hod a si aa bei aundare linkspolitische Bladln eibrocht.

Sei wichtigsts Weak is in seina easchtn Fossung 1971 außakemma: Las venas abiertas de America Latina (haaßt „de offenen Adan vu Lateinamerika“) setzt si mid da Gschicht vu dem Kontinent ausanaunda und zaagt voa oim de kolonialheaschoftlichn Struktuan in neicha und oida Foam auf. Des Weak wiad in da linksgrichtetn Populäakuitua gean zitiad (wia vu da argentinischn Ska-Band Los Fabulosos Cadillacs) oda eawähnd (wia vu da mexikanischn Punk-Band Tijuana No!).

1973 hod si in Uruguay s'Militäa zua Mocht putschd, drum is a im 76a-Joa noch Spanien ins Exüü gaunga, wo a bis zum End vu da Militäadiktatua vu Uruguay blim is. Üwa de Zeid und s'System vu dea Epochn hod a si gäißat, dass Leid eigspead woan san, damid de Preise frei sei hom kinan. Seid 1985 lebt a wieda in da Hauptstod vu seim Hoamadlaund. Wia da Tabaré Vázquez 2004 noch seim Sieg bei ana Woih ois easchta Linka d'Mocht in Uruguay üwanumma hod, hod si da Galeano glei hinta eam gstöd und des mid am Beitrog fia s'Bladl The Progressive kloa gstöd. Ea hod außadem d'Unobhängigkeitsbewegung vu Puerto Rico untastützd.

2007 hod a sein Lungenkrebs eafoigreich oparian lossn.

Im Aprü 2015 is a im Oita vo 74 Joahr in seina Heimatstod Montevideo gstorbn.

Auswoih vu seine Weake

Die offenen Adern Lateinamerikas. Peter Hammer Verlag, Minga ISBN 3-87294-162-3
Der Ball ist rund. Unionsverlag, Züri, ISBN 3-293-20161-X
Die Füße nach oben. Peter Hammer Verlag, Minga ISBN 3-87294-842-3
Geburten. Erinnerung an das Feuer 1. Peter Hammer Verlag, Wuppatoi 1983.
Die Zeit die spricht. Peter Hammer Verlag, Wuppatoi 2005.

Im Netz

Literatur von und über Eduardo Galeano im Katalog der Deutschen Nationalbibliothek