Ekseption

Ekseption is a Symphonic-Rock-Formaziaun aus de Niedalaundn. Gem hozzas von 1967 bis 1975, nachan hoz bis 1989 eftas Wiedabelebungan gem mit vaschiedane Leit. Gschpüüt haums hauptsächlich neich intapretiate klassische Werk. A bsundara Hit woara Arranschmau von da 5.Simpfonie vom Beethoven (eh scho wissn, "pa-pa-pa-bumm").

Präsentation von da LP *Ekseption 5* (1972)

Gschicht

De Ekseption san entstaundn aus da Schülaband The Jokers, de wos vom Rein van den Broek 1958 grindt wuan is. Kuaz haums aa ghaaßn Incrowd (so wiara Liadl vom Ramsey Lewis), oba 1967 woans daunn de Ekseption.

Zeascht haums a Mischung gschpüüt von Jazz, Pop und R&B, owa 1969, des woa kuaz nochdem da Keyboarder Rick van der Linden dazuakumman is, haums an Gig von da englischen Rockband The Nice gsegn und woan so baff, doss unta da Fiahrung vom van der Linden eahnan Stüü in de Richtung Progressive / Symphonic Rock gändat haum. Seitdem schpüüns meist modeane Intapretazionan von klassischn Stickln. De easchte LP Ekseption, de wos 1969 aussekumman is, woa praktisch nuaraso. Bei de weidan Oim haums obaraa eigane Komposizionan drauf ghobt.

Da Van der Linden hod schnöö allanich de Gruppm augfiaht, und in an Interview 1972 hoda des aa offn so gsogt. Des haum de aundan von da Gruppn owa ned so leiwaund gfundn, und wegn dem haums eam, nochdem des Oibum Trinity 1973 easchienan woa, bitt', doss a de Partie valoßt. Auf des hinauf hoda im Herbst vom sööbn Joah a neiche Band grindt, de Trace. Stodd eahm is jezan da niederländischen Keyboarder Hans Jansen eigstiegn. Mid eam is de Band mehr in a jazzige Richtung kumman; zwaa LPs mit eigane Titln haums aussebrocht. Wäus owa zweng vakauft haum, haum sasi 1976 aufglest.^[1] Späta in dem Joah hoz no a Band-Olega gem, dea wos Spin ghaaßn hod, dea hod aa zwaa Oim gmocht, owa do is a nix rechts weidagaungan.^[2] 1978 haum si de Trace und de Spin wieda vaeinigt zua aana Neichauflog von da Ekseption.^[3] Bis 2006, wo da van der Linden gstuam is, hoz imma wieda Wiedavaeinigungan gem mid täuweis neichn Musikan.

Mitglieda, de wos de Gruppm grindt haum

Rein van den Broek (Trompete) (einziges durchgängiges Mitglied)
Rick van der Linden (Piano, Orgel) (1969–1973, 1978–1981)
Rob Kruisman (Saxophon, Flöte, Gesang) (1969)
Huib van Kampen (Gitarre, Saxophon) (1969)
Cor Dekker (Bass) (1969–1975)
Peter de Leeuwe (Schlagzeug, Gesang) (1969, 1971–1972)

Diskografie (a Auszug)

Studio-Oim

1968: Ekseption
1969: Beggar Julia's Time Trip
1970: Ekseption 3
1971: 00.04
1972: Ekseption 5
1973: Trinity
1974: Bingo
1975: Mindmirror
1978: Ekseption '78
1981: Dance Macabre
1989: Ekseption '89

Live-Oim, Zsammstöllungan

1975: Ekseptional Classics
1976: Back to the Classics
1993: The Reunion (live in Germany)
2004: 3 Originals (Zwei CDs mit den vier (!) Alben Ekseption, Beggar Julia's Time Trip, Ekseption 3 und 00.04)

Im Netz

Commons: Ekseption – Sammlung vo Buidl, Videos und Audiodateien
Offizielle Website (niederländisch)
Ekseption bei ProgArchives (englisch)
Ekseption ba Allmusic (englisch)
Ekseption ba Discogs (englisch)

Beleg

[1] Band-Biografie auf aana privatn Fanseitn

[2] ttp://www.progarchives.com/artist.asp?id=4287

[3] ttp://www.progarchives.com/artist.asp?id=1321

[1]

[2]

[3]