Franzl Lang

Da Franzl Lang, biagalich: Franz Lang, (* 28. Dezember 1930 in Obersendling, Minga; † 6. Dezember 2015 in Minga) woa a deitscha Sänga, Jodla, Klampfn- und Quetschnspüla. Seit 1954 woara mit da Johanna vaheirot und hod mit ia aan Buam und aa Madl ghobt.

Lem Werkeln

Da Franz is in Minga aufgwoxn und und hod noch da Schui Weakzeigmocha gleant. Scho mit 9 Joa hodar a Quetschn kriagt, de is daun späda aa sei Marknzeichn wuan. Da Voiksschauspüla Ludwig Schmid-Wildy hod eam ins "Münchner Platzl" ghoid, wora sei easchte Bühnaneafohrung gmocht hod. Daun hams mit eam Probeaufnahman gmocht, und auf des hinauf is aa da easchte Plottnvatrog daherkumman. Mid seina Aufnauhman vom Kuckucksjodler issa berihmt wuan. Daunn houz a Massa Auftritt beim Radio und beim Feansehn gem, bei denen ea gsungan, obara vur oim aa gjodlt hod. Ob 1956 hodar aa Füüm draaht.

1968 woa sei gressta Erfoig, des Kufstaaliadl. Meafoch preisgekrönt, is des an absoluta Evergreen wuan, den inzwischen woi scho a jeda Sänga kavat hod, zum Beispüü da Heino, de Maria und Margot Hellwig und Marianne und Michael.

In de 1970er-Joa woara imma Gost bei de „Lustigen Musikanten“ im ZDF und aa bei aundan voikstimlichn Sendungan. A Schippl Konzeatreisn hodar aa gmocht. Mid iba 500 gsunganan Liadln, mid mea ois 10 Milliaunen verkauftn Tonträgan, mid 20 Goldanen und aana Platin-Schoiplottn gheat a zu de erfoigreichstn Sänga im gaunzn Voiksmusikgschäft.

Da Franzl is am 6. Dezemba 2015 in an Mingana Kraunknhaus gstuam, mit 84 Joa.^[1]