Hoamatgsang

Der Artikl is im Dialekt Owaöstareichisch gschriem worn.

Hoamatgsang is a Liad in bairischa Sproch, im obaöstareichischn Dialekt. Am 29. Novemba 1952 is vom Laundtag offiziö zua "Owaöstreichisch Laundeshymn" eakleat woan. Es is de oanzige östareichische Laundeshymne in bairischa Sproch. Da Text is vom Stelzhamer Franz (1841), de Melodie vom Schnopfhagen Hans.

A Laund braucht a Hymn und wias dazua kema is, des is a interessante Gschicht. Eascht midm Februarpadent 1861 vom Kaisa Franz Joseph I. is dos Laund Owaöstreich ob da Enns zu an eigenen Eazheazogtum eanaunnt woan und dahea voikomman vom Eazheazogtum Östareich trend woan. 1861 is a easchtmois gwöht woan und daun is a da da easchte Laundtag eigsezt gwest.

Wias Liad endschtaundn is

Da Scharinga Zötl Hans (1846-1938) hod mid seine Jugendfreind, in Matrosch Anton und in Commeda Hans de oanadreißgbändige Buachreih Aus da Hoamat aussabrocht. In dena nebm den Textln vo aundan Mundoartdichtan aa vü Gedichtln vom Grillparzer Franz vaeffendlich wuan san. Ois da Komponist und Lehra Schnopfhagen Hans 1845-1908 die Gedichtln vum easchtn Baund vatond hod, san nochand ea und da Zötl beinaundakhuckt. Da Zötl hod fia sei Liablingsgedichtl oba nu a eigängige Melodi gsuacht. Fias Gedichtl "Da ghabte Schuasta"

"I roas hi, i roas he, i roas af, i roas zua, I bi halt ön gehabtn Schuasta san Bua. ..." hod da Schnopfhagen schoa a Melodi gschribm. Und ois da Schnopfhagen de Melodi vuagsummt hod, hod da Zötl guad zuaglosd und nochand gmoand, das jo di Melodi a sea guad zan "d`Hoamatgsaung" passn dadat. Und da Schnopfhagen hod si iwazeign lossn und hod in Gedichtltext vom Stelzhammer sei Melodi untaglegd.

Da Ledafabrikant Joseph Mayrhofa ausn Hoslgrobn hod 1885 in Kiarchschlog a neichi Voikschui gstift und za dera feialichn Eröffnung is easchtmoli des Liadl "sd`Hoamatgsaung" effendli vo an Chor gsunga woan. Es is daun vom "Stelzhammer Quartet" im gaunz Laund aufgschbüd und so aa bekaunt gmochd woan. Vo de ausassign Liadatofin und Liadakranzln (des woan di domolign Gsangsvarein) is des Liadl gean ibanumma wuan und so is des Liadl in de foigendn Joan so bekaunt wuan, das mas scho ois inoffiziölle Landeshymne gnend hod. 1902 is dös Liadl, zwegnan 100 Jahrestog von Dichta Stölzhammer sein Geburtstog in Wean, im großn Musikvereinssol, vom bekaundn Weana Maunagsaungsvarein vuatrogn woan. Dabei woa a da weana Buagamoasta Dr. Karl Lueger und aa de Lebnsfreindin vom Kaisa Franz Joseph, de k. und k. Hofschauspülerin Schratt Katharina hod a Mundoadgdichtln vom Stelzhammer voaglesn. So is des Liadl a in de biagalichn Groas augnumma woan.

Wias zua Laundeshymne kemman is

Mearane Kulturvabänd und vua oim da - dea no vom Zötl gründde - Stelzhamerbund, vo dem wos de damolige Leitung da Dr. Hans Comma jun. ghobt hod (ea woa da Bua vom ehemolign Freind vom Zötl), haum draufdrängd das des Liadl s`Hoamatgsaung a de offiziölle Landeshymn wean soi. Und zan 150 Gebuatstog vom Stelzhammer,1952 woas daun soweid. Untan domolign Laundeshauptmann Dr. Heinrich Gleissner san mittels Laundesgsez de easchte, de zwoate und de lezte Schtrophn za da offiziön Landeshymne vo Owaöstareich eanaunnd woan.

Des Liadl is oans da wenign Laundeshymn de ausn Voik kemma san. Es woa a scho so beliabd das es am End voa Vuadräg eascht zan Schluss gsunga woan is. A Auszug aus an Programmheftl vo 1936: Hoamatgsang – oberösterreichische Volkshymne, stehend gesungen von der ganzen Versammlung.

De Hymn is foßt a Voiksliad woan. Oba den wirklign Titl vo da Laundeshymn kenan nua mea d`Fochleid. Weu in da Bevökarung is nua untan Naum s`Hoamadlaund bekaunt .