Hoizbodn

A Hoizbodn is a Fuasbodn, wo aus Bauhoiz gmocht is. Hoiz guit ois nochhoiti, weatbstendi und renoviabor. Es nimmt Schodstoff und Feichtigkeid af und reguliad so as Raumklima.

An Hoizfuasbodn mid lange, broade Breda nennt ma Bredabodn. Mid kloane Bredln is a Parkett. A Bodn aus Hianhoiz, wosd de Joaresring siegst, is a Hianhoizparkett, a Stecklbodn oda a Hoizpflasta. Hianhoiz is no widastandsfehiga ois wia Bredln. Deswegn is friacha aa gean fia Weaksteddn vawendt worn. Duach an guadn Feiawidastand hod ma s sogor fia Schmiedn ois Fuasbodn gnuzt. Fia Hoizbedn wean nua Hoarthejza aus Laabbaam vawendt. Bambusparkett wead aa efta ois Hoizfuasbodn ogsegn, is oba foisch, wei Bambus a Gros is.

Hoiz konst aa fia aussn vawendn. Hianhoiz is a brauchbors Pflosta und Hoizbreda gebn a natialiche Terrassn (Deck).

A Laminat is nua a billige Imitation vo an echtn Hoizfuasbodn. Es bsteht aus an Hoizfasastoff mid ana Melaminbeechschicht obn draf. Da optische Parketteffekt ensteht duach a Dekorschicht aus Babia, de wo mid Kunststoff impregniad is. Laminat nimmt koane Schodstoffe af, im Gegntei, dea Kunststoff gibt wejcha ob. Laminat reguliad aa ned de Luffeichtigkeit, weis koa Wossa afnimmt. Es deaf aa ned feicht gwischt wean, wei wann Feichtigkeid in de Fugn kimmt ko da Bodn aufquuin.

Galerie

A Intarsienparkett
A Parkett im Wiafevaband
A Hianhoizbodn
A Kotz schaugt auf a Hoizdeck (Terrassn)
A Laminatbodn, schaugt aus wia a Parkett is oba koans

Im Netz

Commons: Hoizfuasbodn – Sammlung vo Buidl, Videos und Audiodateien