Ingenuin (Heiliger)

Dr langobardische Geschichteschreibr Paulus Diaconus håt gschriem, dass dr Ingenuin Bischof va Säbm isch. Damit isch er dr erschte, der als Bischof va dén Órt aufscheint; zem håt’r aa a Basilika paun glåssn (Gråbungen um 1980 håbm zun a Pestätigung peitrågn). Er isch in Jåhr 605 gschtórm und drvór wåhrscheinlich ca. 30 Jåhr lång Bischof gwésn.

Sei Lébm

Um Säbm sein zu dr sell Zeit Langobardn unt Frånkn gwésn, dé sich in die Håår glégn sein; drzua sein in Óschtn nó die Schlaabm kémmen. Weil’s só hoaß her gangen isch, isch dr Ingenuin nåch Aquileja åghaut. Zem håt’r sich pan a Pischofsvrsåmmlung peteiligg. Er isch aa af dr Seitn van óschtrémischn Keisr Maurikios (Mauritius) in Streit mit’n Påpscht Gregor in Groaßn vrwicklt gwurtn.

Pan Friednsschluss in Treant 590 zwischnen langobardischn Kinig Agilulf Ewin unt die Frånkn isch’r aa drpei gwésn. Dr Heilige Ingenuin isch in Säbm pegråbm gwurtn; dr Pischof Albuin, der um dr erschtn Jåhrtausntwénde glép håt, håt seine Poanr zun nuidn Pischófssitz Prixn prengen glåssn. Schón vór dr sel Zeit isch’r als Heiligr vrehrt gwurtn.

Dr Nåmen wert untrschiedlich daitet: entwédr er isch va lateinisch genu (Knia) ågleitet, ódr åndrerseits va germanisch Ingwin (Ingwio = a Góttheit + wini = Fraint).

Dr Ingenuin isch Mitpatrón va dr Diözése Pozn-Prixn unt wert in 5. Febrar gfeirt.

Quell

Eduard Widmoser; Südtirol A - Z; Südtirol Verlag, Innsbruck - München, 1983