Klippm vu Moher
| Der Artikl is im Dialekt Owaöstareichisch gschriem worn. |
De Klippm vu Moher (af irisch: Aillte an Mhothair) san a Natuawunda und a Sehnswiadigkeit im irischn County Clare. Se ling an da Atlantikküstn, oiso im Westn vu da Insl, und san mit bis zu ana Hächn vu 214 Meta a vu de hechstn und außadem steilstn in Eiropa. Se eastreckn si auf a Läng vu ocht Kilometa zwischn de Deafi Doolin und Liscannor.
In da Klippnregion lem um de 30.000 Vegi vu um de 30 Oatn - voa oim Papageintaucha, Möwn und Alks. De Klippn schaun meist grea aus, sejbst an de steilstn Flächn bis ow zum ned grod ruhign Wassas, wachst nämle ebbs, weil de hauptsächle aus Schiefaplattn san und in de Spoitn vo dene hoitn se Algn und kloane Moospflanzl.
Fia de Touristn hot ma an Parkplotz, a klane Promenade mit Glanda und a Plottfoam baut, damit ma si des Natuawunda aa oschau kau. Stöllnweis san de Klippn oba net gsichat, duat hot ma oba dafia freie Sicht.
De Klippm vu Moher san sicha de bekaunntestn vu Ialaund, oba net de hechstn. De Slieve League und nu äaga de Klippm vu Croaghaun weida nerdli san oba touristisch net easchlossn.