Leyland Zypressn

De Leyland Zypressn (dt. Leyland-Zypresse, engl. Leyland cypress) is a schnej woxada, immagreana Nodlbaam. Es san Mischling zwischn ana echtn Zypressn und ana Scheinzypressn, desweng hoasst ma s aa Bastardzypressn.

A ausgwoxane Riesnzypressn

Se woxn bis zu oan Meta pro Joar und praktisch auf jeden Bodn. Desweng weans gean ois Wind- und Sichtschutz gnuzt. De Baam kina recht grouß wean, desweng weans aa Riesnzypressn gnennt.

De Leyland Zypressn is leicht gifte, a Hautkontakt ko - recht sejtn - za an Hautausschlog fiahn.

Systematik

De Leyland is a Hybrid zwischn Monterrey Zypressn links und Nootka Scheinzypressn rechts.

De Leyland Zypressn is a Mischling (Hybrid) zwischn da Monterrey Zypressn und da Nootka Scheinzypressn.

De Nootka Scheinzypressn wead oft aa foisch in de Goddunga Chamaecyparis, Xanthocyparis oda Cupressus eingoadnet. Entsprechend wead aa de Leyland Zypressn vaschiedn gnennt, × Cupressocyparis leylandii, × Cuprocyparis leylandii oder Cupressus × leylandii.

Es gibt Auslesesoatn vo da Leyland Zypressn mid gfarbtn Laab (‘Castlewellan Gold‘, ‘Gold Rider’, ’Robinson’s Gold’) oda mit cremefarbiga Panaschiarung (‘Silver Dust’). Am beliabtastn is oba de ‘Haggerston Grey’, de wo scho anno 1888 in Leighton Hall, Wales, entstandn is und ba dea des Grea leicht grau is.

Zwoa weidare Kreizunga zwischn da Nootka-Scheinzypressn und andan Zypressen-Artn san aa no bekannt:
1. Cupressus arizonica var. glabra × Xanthocyparis nootkatensis (× Cuprocyparis notabilis)
2. Cupressus lusitanica × Xanthocyparis nootkatensis (× Cuprocyparis ovensii)

Nutzung

De Leyland is geng Luftvaschmutzung und Soiz unempfindle. Se woxt extrem schnej und aa af fost jedn Bodn. Desweng is ois Heckn recht beliabt.

An Zruckschnidd vatrogts oba ned guad und se wead iba de Joar recht groß. Des wead oft bei da Pflanzung ois Sichtschutz ned bedocht und hod scho za Rechtsstreidarein gfiaht.

Galerie

• 
  Zweigal mit Zopfa
• 
  De Leyland ois Windschutz
• 
  Leyland Zypressn im Schnää

Im Netz

 Commons: Leyland Zypressn – Sammlung vo Buidl, Videos und Audiodateien

Beleg

• John Kelly, John Hillier (Hrsg.): Bäume & Sträucher. Thalacker, Braunschweig 1997, ISBN 3-87815-086-5, S. 256 – 257.