Lommer

Unter Lommer versteaht man in untern Sidtiróler Étschtål, in Eisåcktål unt untern Pustertål an Stoanhaufn unterhålb van an Perg. In die sidlichn Stubaier Ålpm hoaßt’s Gelomer. In Vinschgau unt in Toale van Óberinntål sågg man Gånde, in éstlichen Pustertål Maure, in der Gégnt um Innsprugg Raisa. (Tirolischer Sprachatlas von Egon Kühebacher). Die Låmmer (oder Lómmer) pesteaht ausn Material, wås in Lauf va die Jåhrtausende van Perg ågepróchn isch. Låmmer håt toalweis an negativn Peigschmåck, weil dés an unfruchtpårs Gelénde isch; friaher (wénns nó koa gréglte Åpfållpeseitigung gébm håt) håt man zem as ålte Glump hingwórfn.

Die Fåchlait wissn nét genau, va wó dés Wórt her kimmp. Egon Kühebacher z. B. moant, der Ursprung geaht af a Zeit vór die Rémer zrugg (rätisch?).