Ludwig von der Tann-Rathsamhausen

Ludwig Samson Heinrich Arthur Freiherr von und zu der Tann, seit 1868 Tann-Rathsamhausen (* 18. Juni 1815 in Darmstadt; † 26. Aprui 1881 in Meran, Südtirol) is a königlich boarischer General der Infanterie g'wen.

Lebn

Von und zu der Tann is da Bua vom boarischn Kammera Heinrich Friedrich Freiherr von und zu der Tann († 1848) und seina Otraudn Sophie Freiin von Rathsamhausen, de letzte vo sell Familie aus'm Elsass. Da Kini Ludwig I. vo Bayern is sei Tafpat g'wen. Mit vierzea Joar is a in de königliche Pagerie z'Minga eitretn. Am 1. August 1833 is a zum Junker im 1. Artillerie-Regiment ernannt und scho am 26. Oktober 1833 zum Unterlieutenant befördert worn. Am 20. Jenna 1840, mittlerweile zum Oberlieutenant befördert, is a zum preißischn Generalquartierstab kemma. Am 11. Oktober 1844 is a Hauptmann 1. Klasse und Adjutant vom Kronprinzen Maximilian worn. De zwoa sand zeitlebns bis zum Oblebn vom Max II. Joseph guade Spezln bliem. Im Joar 1844 hod a si mit am Studentn wegen aner Frau duelliert, obwois scho damois verbotn woar. Gschod hods eam bei seiner Militärkarrier' auf jeden Foi ned.

Er is zwischen 1833 und 1844 öfters auf militärische Reisen g'wen. Dabei hod a si österreichische Manöver in Italien, preißische am Rhein und in Ostpreißn g'naua ogschaut und is ois Beobachta beim französischen Feldzug in Algerien 1843 dabei g'wen.

Am 31. März 1848 is von der Tann Major und königlicher Fligl-Adjutant worn. Im Aprui hod a mit a paar andere Offizierkameradn um Beurlaubg ersuacht, damit a in Schleswig-Holstein fia de deitschn Interessn fechtn ko (Schleswig-Holsteinischa Kriag genga Dänemark). Mit aner Freischar hod a si am 21. Aprui 1848 beim G'fecht bei Altenhof an Nam ois militärischer Haudegn g'macht. Sei Freischor hod a danoch in a schleswig-holsteinischs Bataillon vo 450 Mann umbaut. In Flensburg akemma hod si beim preißischn General Wrangel gmeld und eam klar g'macht, dass a mit seim Bataillon sofort an'n Feind g'fiat wern mecht. Im Gefecht bei Hoptrup am 6. und 7. Juni 1848 hod a militärisches Gschick und Schneid bewiesn, wofia er und sei Freikorps von General Wrangel extra g'lobt worn is. 1849 is a Chef des Stabes in da Division vom Prinzen Eduard von Sachsen-Altenburg worn und is im Juli 1850 ois Oberst und Stabschef om General Karl Wilhelm Freiherr von Willisen (1790-1879) in de schleswig-holsteinische Armee eitretn, mit dera er bei Idstedt, Missunde und bei da missglickten Belagerung von Friedrichstadt kämpft hod.

Wann a noch Bayern wieda zruckkemma is, is a Adjutant vom Kini Max II. Joseph worn, am 31. März 1855 Generalmajor, am 1. Jenna 1860 Generaladjutant vom Kini und am 25. Feba 1861 Generalleutnant und Generalkommandant z'Augschburg, dann z'Minga. 1864 hod a si ois Generaladjutant und Beobachta den Sturm auf de Düppeler Schanzen ogschaut.

Am 21. Mai 1866 is a zum Generalstabschef vom Prinzen Karl vo Bayern, dea da Oberbefehlshaber vom siddeitschn Kontingent g'wen is, ernannt worn. Im Kriag genga de Preißn 1866 hod a beim Gfecht bei Zella mitg'macht, war in Kissingen dabei, wo a si an Streifschuss am Hois eingfangt hod, und hod bei Üttingen und Hettstadt kämpft. Er hod den Kriag eh aus mehrera Grinde abglehnt, oamoi weil a de Stärkn und Schwächn vo de oanzelnen Armeen genau kennt hod, zum zwoaten weil a den "Bruaderkriag" sowie so ned versteh hod kenna.

Am 28. Aprui 1867 is von der Tann zum Inhaber vom 11. Infanterie-Regiments ernannt worn. Von der Tann is Generaladjutant voms Kini und Divisions-Kommandeur bliem.Am 8. Jenna 1869 is a zum General der Infanterie und Kommandierenden General vom I. Armee-Korps befördert worn. Ois seller hod a si im Kriag genga de Franzosn 1870/1871 in da Schlacht bei Wörth, am Gfecht vo Beaumont und da Schlacht von Sedan auszeichnet, wo a den den Ogriff auf den Ort Bazeilles g'fiat hod. Fia sei umsichtige und energische Firaleistung hod a s'Kommandeurkreiz vom Militär-Max-Joseph-Ordn kriagt. Noch der Schlacht is sei Korps bei Sedan steh bliem, damit de Gefangenen und de machtige Kriagsbeute obtransportiert wern ko.

Ofang Oktober 1870 hod a den Oberbefehl über a Armeeabteilung ibanomma, de aus seinem Korps, da 22. preußischen Infanterie-, da 1. und 4. Kavalleriedivision zamgstellt worn is. De Abteilung hod am 10. Oktober 1870 des Gfecht bei Artenay bei Orléans g'wunna und nacha de Stod bsetzt. Dafia is a am 22. Dezember 1870 mit dem Großkreiz vom Militär-Max-Joseph-Orden dekoriert worn. Am 9. November hod a si vor da französischen Ibamacht nach da Schlacht bei Coulmiers nach Norden zruckziagn miaßn. Er hod vom 2. bis 10. Dezember untam Großherzog Friedrich Franz II. von Mecklenburg-Schwerin in mehrera bluadige Gefecht bei Orléans g'fochtn. Bei da Schlacht bei Loigny und Poupry is a selba am Hax verwundt worn, hod aba des G'fecht bis zum End weida g'fiat. Nachdem sei Korps fast zwoa Monat dauernd im Einsatz g'wen is, iss Ende Dezember 1870 zua Zernierungsarmee um Paris kemma.

Noch dem Sieg iba Frankreich is a in da Hoamat ois Kriagsheld gfeiert und in Bayern und aa in Preißn hoch dekoriert worn. Er is Ritter vom Johanniterorden worn, am 22. August 1876 is a zum Großkanzler vom Militär-Max-Josephs-Orden ernannt worn.

Ab Herbst 1880 is eam Schnaufa owei schwarer g'foin und s'Rheima hod eam plogt, deswegn woit a si in ana milderen Gegend aufhoidn. Er is deswegn am 20. Aprui 1881 nach Siidtirol obg'reist und is scho am 26. Aprui 1881 in Meran gstorbn.

Bei seiner Leich am 30. Aprui habn eam alle Divisions- und Brigade-Kommandeure und a grouße Abteilung vo alle boarischen Regimenter, bsunders vo seim 11. Infanterie-Regiment, de letzte Ehr eawiesn. General von der Tann is in am Arkadngrab im Oidn Nordfriedhof z'Minga beigsetzt worn.

Ehrunga

Roter Adler-Orden III. Klasse mit Schwertern, valiehn noch an Handschreibn vom preißischn Kini vom 19. September 1848
Ritterkreuz vom Vadienstordn da Boarischn Krone, valiehn am 17. Aprui 1853
Ritterkreiz vom Militär-Max-Joseph-Ordn, valiehn am 8. Mai 1854, ausghändigt am 18. Juni 1854
Komturkreiz vom Verdienst-Ordn vom Heiligen Michael, valiehn noch an Allerhöchstn Handschreibn vom 25. August 1858
Komtur zum Vadienstordn da Boarischn Krone, valiehn am 1. Jenna 1862
Düppeler Sturmkreuz valiehn am 18. Aprui 1864
Eisernes Kreuz II. Klasse, valiehn noch an Armeebefehl vom 30. August 1870
Kommandeurkreiz vom Militär-Max-Joseph-Ordn, valiehn noch an Allerhöchstem Signat vom 9. Oktober 1870 (Armeebefehl vom 11. Oktober 1870)
Großkreiz vom Militär-Max-Joseph-Ordn, valiehn noch an Armeebefehl vom 22. Dezember 1870
Eisernes Kreuz I. Klasse, valiehn im Oktober 1870
Königlich preißischa Orden Pour le Merite, valiehn am 22. Dezember 1870
Großkreuz des Sächsischen Albrechts-Ordens mit Kriagsdekoration, valiehn noch 1870/1871
großherzoglich mecklenburgischen Militär-Verdienstkreuzes II. und I. Klasse, valiehn noch 1870/1871
Zwoa kreizte Säbel am Bande vo da fürstlich lippe-schaumburg'schen Militär-Verdienst-Medaille, valiehn noch 1870/1871
Kronen-Orden I. Klasse mit Emailleband des roten Adler-Ordens und mit Schwertern, valiehn am 16. Juni 1871
Ernennung zum Großkanzler vom Militär-Max-Joseph-Orden noch an Allerhöchstn Handschreibn vom 22. August 1876
Ehrenkreiz zum Ludwigsorden, valiehn noch an Allerhöchstn Handschreibn vom 24. Juli 1878
Gestellung a la suite vom 1. Feldartillerie-Regiment „Prinz Luitpold“ am 24. Juli 1878
Ernennung zum Chef vom königlich preißischn 2. Niederschlesischn Infanterie-Regiments Nr. 47 am 8. August 1878
Großkreiz vom Belgischn Leopoldsorden
Großkomtur vom Griechischn Erlöser-Orden
Großkreiz vom Hannoverschen Guelphen-Orden
Kommandeur II. Klasse vom Kurfirstlich Hessischen Wilhelmsorden
Großkreiz vom Großherzoglich Hessischen Ludwigsorden
Komtur I. Klasse vom Großherzoglich Hessischen Verdienstorden mit Schwerta
Inhaber vom Ehrenkreiz I. Klasse des Firstlich Lippe'schen Gesamt-Haus-Orden
Großkreiz vom Großherzoglich Mecklenburgischen Haus-Orden der Wendischen Krone
Kommandeurkreuz des Ordens des Adlers von Este
Großkreiz vom Großherzoglich Luxemburgischen Orden der Eichenkrone
Orden der Eisernen Krone I. Klasse
Großkreiz vom Roten-Adler-Orden mit Schwerta am Ringe
Weißer Adler-Orden
St. Anna-Orden I. Klasse
Russischa Sankt-Stanislaus-Orden I. Klasse
Kommandeurkreiz vom Schwedischn Schwert-Orden
Großkreiz vom Norwegischen Sankt-Olav-Orden
Medjidie-Orden II. Klasse
Waldeckisches Militär-Verdienstkreiz I. Klasse
Großkreiz vom Orden der Württembergischen Krone)
Dampfkanonenboot „Von der Tann“ (1849)
Schlachtkreuzer SMS „Von der Tann“
Erteilung vo da Bezeichnung „Fort Tann“ fias Fort Nr. 8 zu Straßburg durch'n Kaiser Wilhelm I. (1873)
Ehrenbiaga vo da Stod Minga (1871)
Denkmal auf'm Marktplotz in Tann (Rhön) (1900)
Von-der-Tann-Straße in Erlangen (1900)
Von-der-Tann-Straße in Minga
Von-der-Tann-Straße in Wuppertal (1901)
Von-der-Tann-Straße in Hamburg
Von-der-Tann-Straße in Niamberg
Von-der-Tann Grundschule in Regensburg (1901)
Da Komponist Andreas Hager hod im Joar 1880 zu seina Huldigung den „General von der Thann Marsch“ komponiert, dea ois Parademarsch fia sei Regiment (11. Infanterie-Regiment „von der Tann“) gspuit worn is.

Literatua

Schrettinger (Ordensarchivar), „Der Königlich Bayerische Militär-Max-Joseph-Orden und seine Mitglieder“, Minga, 1882
Hugo von Helvig: Ludwig Freiherr von und zu der Tann-Rathsamhausen, Verlag Mittler, Berlin 1882
Gebhard Zernin: Freiherr Ludwig von und zu der Tann-Rathsamhausen, Darmstadt 1884
Joachim Peter: „… aus vielen Gründen interessant!“ - Theodor Fontane über Freiherr Ludwig von und zu der Tann-Rathsamhausen, in: Buchenblätter, Beilage der Fuldaer Zeitung, Nr. 71, 1998, S. 67
Dr. Paul Görlich: Ein Denkmal für den General in Tann, in: Buchenblätter, Beilage der Fuldaer Zeitung, Nr. 10, 2004, S. 37