Magnificent Seven

Weitane Bedeitunga schau af da Begriffsklearungsseitn für The Magnificent Seven.

De Magnificent Seven – zu Deitsch: die glorreichen Sieben oda die großartigen Sieben – san siem grouße kommerzieje Londona Friedhäf aus'm 19. Joarhundad. Iahr'n Nam hom de Friedhäf weng iahra afwending londschoftlichn und architektonischn Gstoitung in vaschiedna Stuirichtunga dahoitn.

Hintagrund

Bis in de Middn vom 19. Joahrhundad hom de Beerdigunga in London af Kiachhäf stottgfundn, donem hom oanige Hospitäla und ondane Institutiona iahre eingna Begräbnisstättn ghod. Middlawei woa owa de Bevejkarungszoih vo London vo oana Million af iwa 2,3 Milliona ogstieng. De houch Bevejkarungsdichtn hod zamm mid da houchn Steablichkeitsrate zu katastrophoin hygienischn Zuaständ in da Haptstod gfiaht, do ned meah ausreichnd Blotz fia de Bestottung vo de Doudn voahondn woa. Iwaroi, wo no a weng Blotz zwischn de Haisa woa, san schlecht gfiahte Kloanstfriedhäf entstondn, af dena zum Tei illegoie Begräbnisse stottgfundn hom, monche Leichnom san nua notdiaftig vaschoarrt und dossejbe Grob monchmoi scho noch wening Monatn nei belegt worn. Vo dena Gräba is a uibla Gstonk ausgonga, außadem hom's dozua beitrong, doss se imma wieda neie Epidemien ausbroatn hom kenna, de wiedarum zu om Ostieg vo Doudesfäjn gfiaht hom.

De af Daua unhoitboan Zuaständ hod de Eihrichtung vo neie Friedhäf außahoib vo da Stod nedig gmocht. Af da Grundlog vom entsprechndn Act of Parliament (Public Cemeteries Act of 1832) is zwischn 1832 und 1841 privat gfiahte Untanehmen de Ealaubnis dozua eateit worn. In da Foig hom se Friedhofsuntanehmen wia de London Cemetery Company grindt, de rund um London Ländarein afkafft und duat a greglte Bestottungskuitua etabliat hom.

De „Magnificent Seven“ san:

• Kensal Green Cemetery (1832) – Greek Revival
• West Norwood Cemetery (1837) – Neogotik
• Highgate Cemetery (1839) – Neogotik, Egyptian Revival (Historismus, Klassizismus)
• Abney Park Cemetery (1840)
• Nunhead Cemetery (1840)
• Brompton Cemetery (1840)
• Tower Hamlets Cemetery (1841)

Schau aa

• Listn vo Begräbnisstättn vo bekonntn Berihmtheitn

Literatua

• Hugh Meller, Brian Parsons: London Cemeteries: An Illustrated Guide & Gazetteer. The History Press, Stroud (Gloucestershire) 2011 ISBN 978-0-7524-6183-0

Im Netz

• The National Federation of Cemetery Friends
• Bilder der Magnificent Seven