Malcolm Young

Der Artikl is im Dialekt Ostestareichisch gschriem worn.

Da Malcolm Mitchell Young (* 6. Jänna 1953 in Glasgow, Schottlaund; † 18. Novemba 2017 in Australien) woar a australischa Musika. Ea woa da Gründa, da Rhythmusgitarrist und da Liadlschreiwa vo da australischn Hardrock-Band AC/DC.

Sei Lem

Ois a Junga

Da Malcolm Young woa es siembte Kind vo seina Famülie. Im Joa 1963 is de Famülie zweng da Hockn vo Schottlaund auf Australien gaunga. Scho in seina Schuizeid hod a ins Gitar spün augfaungt, boid hod a vo da akustischn aufd elektrische Gitar gwexlt. Ea hod de Schui hiigschmissn, wiar a 15 woa und ois Rockmusika augfaungt. Seine easchtn Bands woan owa net wiakli eafoigreich.

AC/DC

Ann 1973 hod a zeascht allanich de Band AC/DC gründt, spoda daun is sei jingara Bruada, da Angus eihgstiegn und hod duatn de Lead-Gitar gspüüd. Da Malcolm Young woa ois Rhytmusgitarrist und Liadlschreiwa de Kroft, de wos de AC/DC weidatriebm hod.^[1] Ea hod mid sein Gretsch-Gitar vuar oim an gscheidn Druck aufbaut. Zweng dem haum eam vüle Fans, owar aa Fochjournalistn ois bestn Rhythmusgitarristn auf da Wöd gseng. Mea wia drei Joazehnte woar a mid AC/DC in ana vo de wödweid eafoigreichstn Rockbands untawegs.

Kraungheid und Tod

Scho im Mai 2014 haum de AC/DC auf eahnara Netzseitn bekaunnt gebm, das da Malcolm Young kraung wuan is und auf unbestimmte Zeid a Pausn eihlegt .^[2] Im Septemba 2014 haums daun gsogt, dass a noch an Schlagl entgütig aufhean hod miassn. Noch sein Schlagl woar a aa nu schwaa dement und hod si aun nix meah earinnan kenna.^[3] Da Malcolm Young is am 18. Novemba 2017 mid 64 Joa gstuam.^[4]

Privatlem

Da Malcolm Young woa seid de 1970a Jahr mit da Linda Young vaheirat. Zaum haums zwaa Gschroppm ghobt.

Literatua

Jess Fink: Die Brüder YOUNG – Alles über die Gründer von AC/DC. Hannibal Verlag, Höfen 2015, ISBN 978-3-85445-466-3 (Originalausgabe: The Youngs – the brothers who built AC/DC)

Im Netz

Commons: Malcolm Young – Sammlung vo Buidl, Videos und Audiodateien

Beleg

↑ Edo Reents: Das Ende von AC/DC. Es war immer Malcolm hinter jeder Entscheidung. In: FAZ.NET vom 28. April 2014.
↑ Meldung über die Krankheit Malcolm Youngs auf acdc.com. Archiviert vom Original [1] am 17. Aprü 2014; abgerufen am 2. Mai 2014.
↑ New Reports: AC/DC’s Malcolm Young Suffered a Stroke and Now Has Severe Dementia. loudwire.com, 26. September 2014, abgerufen am 27. September 2014 (englisch).
↑ AC/DC co-founder Malcolm Young dead at 64. 9news.com.au, 19. November 2017, abgerufen am 18. November 2017 (englisch).

[1] Edo Reents: Das Ende von AC/DC. Es war immer Malcolm hinter jeder Entscheidung. In: FAZ.NET vom 28. April 2014.

[2] Meldung über die Krankheit Malcolm Youngs auf acdc.com. Archiviert vom Original [1] am 17. Aprü 2014; abgerufen am 2. Mai 2014.

[3] New Reports: AC/DC’s Malcolm Young Suffered a Stroke and Now Has Severe Dementia. loudwire.com, 26. September 2014, abgerufen am 27. September 2014 (englisch).

[4] AC/DC co-founder Malcolm Young dead at 64. 9news.com.au, 19. November 2017, abgerufen am 18. November 2017 (englisch).

[1]

[2]

[3]

[4]