Morgenschtean
| Der Artikl is im Dialekt Owaöstareichisch gschriem worn. |
Da "Morgenschtean" is a Zeidschrift fia estareichische Literatua in boarischa Sproch und wiad fu da ÖDA (Österreichische DialektautorInnen Institut) aussa gem. Noch ana zeidwailing Bause und finanziele Broblem easchaind de Zeidschrift seid 2002 wida reglmessi fia Moi im Joa mid ana Auflog fu 10.000 Schdikl.
De Morgenschtean Dialekt-Zeidschrift erschaind fiatljealich ois Bailog zua Uhudla-Schdrossnzeidschrift und wiad a unobhengig dafau ois Abo faschikt. Da Schweapunkt fum Morgenschtean is estareichische Dialekt-Literatua und in jeda Ausgob wean Prosadext, Gedichtl und Kuazgschichtn fu faschidane Autoan und Autoarinen faöfentlicht. Da Easchainungsoat is zwoa Wean, owa de Text san fu Schreiwa aus ole Bundeslenda, fum Buagnlaund bis Foararlbeag. Autoan und Autoarinen kinan zu da Zeidschrift Text aischika und so im Morgenschtean faöfentlicht wean.
D "Blattlinie" fum Morgenschtean is noch aigena Definition "kritisch" und geng des "heimatlich-idyllische" Stereotüp und es wean a bolitische Dialekt-Text obdrukt, de maisdns eha links fu da Mitn san. Aussadem untaschdüzt da Morgenschtean Mindaheitn-Deman und Menschnrechtsaungelengheitn und bringd a Dialekt-Text fu Imigrantn und neiche Estareicha, ois wia a feminisdische Text.
De Zeidschrift is 1989 grindd woan und am Aufaung fum Bernhard Bünker und in Hans-Jörg Waldner aussagem woan. Nochdem in de 90ga Joa de Zeidschrift reglmessi ausa kema is, hods 1998 finanziele Schwiarigkaitn gem und da Morgenschtean is weng Gödmaungi aigschdöd woan. Im Joa 2002 haum si owa neiche aungaschiade Leit gfundn, de in Morgenschtean widabelebt haum und seid dem wiad a wida fiatljealich fum ÖDA-Institut unta da Laitung fu da El Awadalla aussa brocht. Said dem Neichschdart is a s'Design und s'Foamat gendat woan.
Bekaunte estareichische Dialekt-Autoan, de oiwai wida im Morgenschtean Text faöfentlichn, san unta aundam: Elis Rotter, Helga Pankratz, Günther "Tschif" Windisch, Wolfgang Glechner, Amir P. Peyman, Gerald Jatzek, Manfred Chobot, Doris Nußbaumer, Manfred Sequardt, Carola Kilga, Sabine Szukitsch, Dieter Berdel, Helga Ogbomon, Chris 4er Peterka, Christine Tippelreiter, Reinhold Aumaier, Friedrich Achleitner, Hans Haid, Rolf Schwendter, Richard Weihs etc.