Oansberg

Oansberg isch die Bezeichnung firn Gebiat westlich van Méndlkåmm in der italienischn Región Trentino - Sidtiról. Oansberg werd meistns in italienischen „Val di Non“ (entspricht daitsch „Nonstal“ óder „Nonsberg“) gleichgsétzt. Isch nåcher dés a Berg óder a Tål? Va die daitschspråchign Nåchbårn aus gségn ligg as Gebiat groaßtoals heacher; die Daitschn sein aa histórisch mehr in Kóntakt mit die heacher und nächner glégnen Gebiate van „Nonstal“ gwésn. Draus erklärt sich die Bezeichnung „Berg“. Åndrerseits isch as „Val di Non“ zweifllós a Tål. In dén Artikl sóll Oansberg geografisch mit „Val di Non“ gleichgsétzt werdn.

Durchn nérdlichn Oansberg rinnt der Novella - Båch (ital.: Rio Novella) in Richtung Sidn. Ban Justina Stausea (ital. Lago di San Giustina) kimmp er mitn Noce (ital. Torrente Noce) zsåmm. Der Noce isch der Haupfluss van sidlichn Oansberg, mindet ba Lavis, außerhålb van Oansberg, in der Étsch eini. In Nord - Sid - Richtung isch der Oansberg belafig 35 km lång. As groaße Seitntål va Westn her isch as Sulztål (ital. Val di Sole). und werd van óbern Noce durchflóssn.

Der nérdliche Zipfl van Oansberg gheart zu Sidtiról; zem befindn sich vier daitsche Órtschåftn (Deutschnonsberg). Der groaße Rest gheart zu der italienischn Provinz Trentino (ehemåls Welschtiról) und die Einwóhner rédn an italienischn Dialekt der in Ladinischn éhnlich isch (oansbergrisch; ital.: noneso). Weil sie nébmen daitschn Språchgebiat sein und weil sie vórn erstn Weltkriag zu Éstreich - Ungarn gheart håbm, benutzn sie a påår daitsche Frémdwerter, dé aber ållaweil weaniger werdn (snaider = Schneider, fraila = Fräulein, ...). Daitsche Schreibnamen (Familiennamen) in italienischn Oansberg sein z. B. Larcher, Graiff, Nesler. Die Einwóhner hoaßn Oansberger (dt. Nonstaler, ital. nonesi). Sie selber hoaßn die Gégnd aa Anaunia, nåchn histórischn Ståmm va die Anaunen.

Groaße Gemeindn in Oansberg sein Cles (iber 6000 Einwóhner) und Fondo (uma 1400). Mit Sidtiról verbundn isch Oansberg in Óstn ibern Méndlpåss, in Nórdn ibern Gåmpmpåss, außerdém durch an Tunnel in Richtung Ultntål. In westlicher Richtung kimmp man zun bekånntn Winterspórtórt Madonna di Campiglio, ibern Tonalepåss in der Region Lombardei umi.

In Oansberg werdn Épfl ånbaut. Weiters gips Hólzindustrie, a bissl Viechzucht, Håndwerk, und Kloanindustrie.

In Oansberg ligg as Dórf Sanzeno. In der Gégnd sein Funde aus der Räterzeit gmåcht gwórtn; die Fritzens-Sanzeno-Kultur håt in Nåmen va dén Dorf.