Oberösterreichische Nachrichten

Oberösterreichische Nachrichten
	Logo
Bschrieb	östareichische Togeszeidung
Valog	OÖN Redaktion GmbH & Co KG
Easchtausgob	11. Juni 1945
Eascheinungsweis	jedn Tog, aussa Sunntog
Auflog ; (ÖAK, 1. Halbjoa 2008)	104.272 Exemplare
Reichweidn ; (Österreichische Media-Analyse 2010)	0,342 Mio. Leser
Chefredakteur	Gerald Mandlbauer, Schtövatreta: Mag. Dietmar Mascher
Aussageba	Rudolf Andreas Cuturi
Hoamseitn	www.nachrichten.at

Der Artikl is im Dialekt Owaöstareichisch gschriem worn.

De Oberösterreichische Nachrichten is a iwaregionale Togeszeidung mit Sitz in Linz. De Zeidung hod 5 Haubtredakzionen (Rubrikn): Politik, Wiatschoft, Sport, Kuitua, Laund & Leid und mid am Lokalteu. Vom Lokalteu gibts 6 vaschiedane Versionan in 6 Regionan vo Owaösterreich. De Oberösterreichischn Nachrichten san ane da Wenign östareichischn Togeszeidungan de se ned zweng ana Auflognschteigarung em Boulevard vaschriebm hom.

De Gschicht vo da Zeidung:

De Buachdruckarei Josef Wimmer Werkeln

1843: Da Buachdrucka Josef Wimmer (1808-1894) hod am 19 Oktowa 1843 vo sein vaschtuama Eheweiwal Franziska (a friare Weinmayr Witdibin) de Druckarei und des Haisl Herrnschtroßn 6 in Linz iwanumma.

Boagöd woan nua fimf Guidn do, owa 28.000 Guidn Schuidn fian Hausneibau. De ochtazwanzgtausnd Guidn ausm 1843a Joah waradn Heid, kaufkroftmaßig zan End vom Joah 2013 eppa 3.075.000,-€ weat.
In da Druckarei is vo 11 Oawata (Drucka und Setza) af fimf hoizane Haundpressn druckt wuan.
Des Haubtgscheft domois woan Drucksoatn fia de Kameralistik vom Kronlaund Östareich ob da Enns.

1845: Am 5 Mai hod da Josef Wimmer nuamoi gheirat. Sei Ehefrau woa de Antonia Kamptner und de hod a ausehnlige Midgift in de Ehe eibrocht und mid Dera hod se de finanziöe Situazion vo da Druckarei schtoak bessad.

Des Druckagscheft is nu bessa gaunga. Ma hod a de Pflegschoftsgricht mid Drucksoatn belifat und hod an Valog fia Gebetsbiachl afgmocht.

1847 hod ma fia de Druckarei a modeane Schnöpreß augschoft.

1848: Des woa des Joah da Voamäarzrevoluzion. In da Druckarei hod ma de Woihlistn druckt, fia den Frankfurta Reichstog in da Paulikiacha.

De Beziaksgricht (de frian Pflegegricht) und de Schteiaämta hom fost olle Druckseitn beim Wimmer bschtöd.

1850: Da Kundnkroas vo da Druckarei Wimmer is gach greßa wuan. Es san a de Schtootsbuachhoitung und de Polizeidirekzion (a mid de Schteckbriaf) zan Kundnkroas dazuakemma. Owa a mera Aumta und de Rentnvawoitung. Dahea hod ma den Maschinanpark oiweu vagreßad.

Den Formulardruck hobm se domois in Linz nua zwoa Druckareian afteud. De Druckareian Feichtinger und Wimmer.

1860: Weu in Wean de Schtootsdruckarei oiweu mera Druckseitn, a fia de Lända, sowa druckt hod, san de Afträg bei de Druckareian a in Linz eibrocha.

1861: Da Kaisa Franz Josef hod offiziä des Eazheazogtum Owaöstareich ob da Enns zan eignschtendign Kronlaund eahobm. Es is a da easchte Laundtog gwöht wuan.

1863: Am easchtn August hod da Josef Wimmer nebm dem Betrieb a kloans Goatngrundschtickl mid umma 38 Quadratklafter (des san eppa 72m²) dazuakaft, fian an Ausbau vo da Druckarei.

Um de Druckarei wida bessa auszlostn hod da Josef Wimma neiche Gscheftsföda iwalegd. Entweda den Druck vo Gebetsbiachl oda de Grindung vo ana Zeidung.

Tages Post Werkeln

De Untahoitungsbeilog da Linzer Tages-Post vom Sunnda den 15 Aprü 1902.

1864 endscheids se da Josef Wimmer fia de Grindung ana Zeidung und faungd mid de Vuabereitungan au.

Am 1 Jenna 1865 eascheind de easchte Ausgob vo da Tagespost. Am Aufaung hod ma nua 61 Abonnentn ghobd.

Owa im nextn Joah draf, woans scho eppa 1700 de de neiche Zeidung dauabschtöd hobm.

1868 hod ma im Ischla Gscheft des Wochnbladdl Echo aus den Bergen aussabrocht, des schpoda zan Ischler Wochenblatt umtaufd wuan is.

1871 is de Tagespost mid ana Auflog vo 2000 Schtickl easchinan und ma hod a easchmolig, mid da Zeidungsaflog schwoaze Zoihn gschribm.

1876 is da Julius Wimmer (geb. 9.3.1856), em Josef Wimmer sei ödasta Suhn a in Betrieb eigschtign.

In da Druckarei woan domois 19 Leid eigschtöd. A Buchhoita, a Corrector, a Maschinanmoasta und sechzehn Schriftsetza.

1878 is am 15 Oktowa easchtmolig den Wimmers gelben Fahrplan valegd und außagebm wuan.

1880 hod ma in da Druckarei de Doppöschnöpreß afgschtöd und am 1 Aprü hod ma de Ausgob vo da Tagespost druckt.

De Untahoitungsbeilog da Linzer Tages-Post vom Sunnda den 17 Juni 1906.

1883 wiad nebm de fimf Schnöpreßn a Kroasbewegungsmaschin afgschtöd. Iazt oawadn in da Druckarei drei Maschinmoasta und 22 Schriftsetza.

Am 12 Mai 1885 wiad da Kaufvatrog fia des Haus Prommenade 23 in Linz untaschriebm.

In dem Haus woa fria des Mülitäa-Owakommando fia Owaöstareich ob da Enns und Soizbuag. Es is 1887 ogrissn wuan und vom Hermann Krackowitzer neich eabaud wuan. Ois neicha Redakzionsplotz fia de Tagespost.

Am easchtn Jenna 1889 hod da Hr. Julius Wimmer de Druckarei vo sein Vota iwanumma.

1893 hod ma vian Druck vo da Tages-Post a ochtseitige Rotazionsmaschin afgschtöd.

1894, im anafufzigstn Joah vo da Druckarei Wimmer is da Hr. Josef Wimmer am zworazwanzigstn Mai vaschtuam.

De easchtn Schreibmaschinan san 1895 im Büro vawendt wuan.

1897 is de Druckarei ans elektrische Netz vom Linzer Elektrizitätswerk augschloßn wuan.

1903 hod ma mid zwoa ochtseitige Rotazionsmaschinan, ocht oafoche Schnöpreßn und drei Tiegldruckmaschinan in da Druckarei goawad.

1904 is de easchte Setzmaschin (Linotyp) afgschtöd wuan. Am 16 Dezemba hod des technische Peasoneu an schtreik augfaungd, dea bis am 16 Feba dauad hod.

1913 is a 16 seitige Rotazionsmaschin augschoft wuan. De zwoa Ochtsoatign hod ma ois Reseav bhoitn.

des Redakzionsgebäud vo de Oberösterreichischn Nachrichtn af da Prommenade in Linz.

Am 14 Juni 1914 hod ma de Oanzlfiama in a Ges.m.b.H. umgwaundld. Da greßte Aunteu is beim Julius Wimmer vablibm. Danebm haum den Rest sei Tochta Grete Streit und iah Mau Oskar Streit, da Bsitza vom Schloß Puchenau; Da Chefredakteua da Tages-Post, Dr. Karl Ritter von Görner so wia da Technikdirektoa Heinrich Schneeberger und da Finanzdirektoa Robert Ortner und da Franz Scheuringer ghoidn.

Ois am 28.7.1914 da easchte Wödkriag ausbrocha is, haum vo de 87 weahfehign Oawada glei 28 eirucka miaßn. Bis zan End woan vo de 87 Oawada, 86 Mau vo da Belegschoft eigruckt und vo de san sechse im Föd gfoin.

1915 san wia narrisch Sundaausgobm und Extrabladln druckt wuan. De noameun Druckafträg san zwoa zrukgaunga, owa des hod ma midm Druck vo de Lebmsmiddlkoatn auffaunga kenna.

De Tages-Post is iazt af ana neichn 32 seitign Rotazionsmaschin druckt wuan.

1916 hod ma an de Mülitäavawoitung foßt 15 Tonnan Bleibuachstobn, aus da Setzarei olifan miaßn.

1917 hod da Hr. Julius Wimmer olle Gscheftsauteu zruckghaft und wida Auteu an sei Tocht und em Schwigasuhn, da Grete und em Oskar Streit weidagebm.

Am 11.11.1918 woa da easchte Wödkriag z`End.

De Saumstogsbeilog: Welt und Heim vom 1 Juli 1935, vo da Linza Tages Post.

1919 hod ma zwaungsweis schtoak varingadn Schriftfamülin wida eagenzt und afgfüd.

De Tages-Post hod mid 31.000 Abonenntn de fiahrade Schtöllung im Landl bhoitn.

Am easchtn Jenna 1925 is de Ges.m.b.H. in a Kommanditgsöschoft umgwaundlt wuan. Da Hr. Julius Wimmer und sei Schwigasuhn da Hr. Oskar Streit woan de öffendlign Gsöschofta und sei Tochta de Grete Streit is a Kommandistin gwest.

1927 hod ma de Betriebsflechn vagreßad, weu ma den Goatn vom Haus Prommenade 23 vabaud hod.

Dabei is ausm 3. Joahundat a remische Wohnschtätt mid da zuagheradn Eisngiaßarei gfundn wuan.

1929 is de easchte Zwoa-Foabm Offsetmaschine augschoft wuan.

1936 is da Julius Wimmer zan Auloß vo sein ochzjaarign Gbuatstog (9.Merz) und fia seine Vadeanst fia de Schtod, zan Eahrnbiaga vo Linz eanaunnt wuan.

Amtsblatt für Oberdonau Werkeln

Am 12 März 1938 is da Auschluß vo da Republik Österreich an des Großdeitsche Reich voizogn wuan, vökarechtli woa des eha a Okupazion.

Vo da NSDAP is sufuat de Pressefreiheid außa Kroft gsezt wuan.
De Famüli Wimmer is zwa ned enteignet wuan, owa se hod koanaloa Eifluß mea afn Druckareibtriab und af de Togeszeidung mera ghobd.

De ehemolige Amtliche Linzer Zeitung is nochn Auschluß, vo 1938-1940 zan Amtsblatt von Oberdonau wuan.

De Linzer Volksstimme gegr. am 17 März 1926 is im Oktowa draf in Volkstimme gendat wuan. De Zeidung woa des Presseorgan vo da schpodan NSDAP und is am 1 Jenna 1943 in Oberdonau Zeitung umtauft wuan. In dea Zeidung is a des Amtsblatt von Oberdonau eigfloßn. Des Bladl is am 3 Mai 1945 eigschtöd wuan, weu scho am 5. Mai in de Schtod Linz de amerikanischn Paunza vo da 11 US Paunzadivision eigfoahn san.

Am 5 Novemba hod in Julius Wimmer sei Enkal de Ilse Streit em Antonio Cuturi gheirat. Eahna Suhn da Hr. Rudolf Andreas Cuturi is da heidige Bsitza vo de Oberösterreichischn Nachrichtn.

Zwischnschpü Werkeln

1945: Glei nochm Kriagsend hod ma da Famülie Kollaborazion mid em nazionalsozialischtischn Regime viagwuaffa.

Obwoi des an de Hoahr heabeizogn wo, se hobm jo nedamoi an Eifluß afm Druckareibetrieb ghobd, is da Betriab sufuat vo da US-Information Service Branch bsezt wuan.
De haum ois Vawoita em Hr. Hans Behrmann eigsezt und es Vahoitn vo da Famülie Wimmer, in da Nazizeid is vo de Ami af Heaz und Niern prüft wuan.

Da Linza Biagamoasta Ernst Koref hod em Franz Lettner in Aftrog gebm a Zeidung zdrucka, em ehemolign Chefredakteua vom Tagblatt, des woa de Poatei-Zeidung vo de Sozialdemokratn, .

De Zeidung is am 4.Juni 1945 ois Linzer Zeitung außakema. Owa de Zeidung hobm de Amerikana owa glei eigschtöd.

Da amerikanischn Besotzungsmocht, de sidli da Donau Owaöstareich bsezt ghobd hod, woas owa recht Wichti, das via de Bevökarung wida a unobhengige Zeidung afglegd wiad.

Dahea homs scho am 5. Juni.1945 em Franz Lettner vuaglodn um mid eahm iwa a Togeszeidung zredn.
Weu da Franz Lettner ois Sozialdemokrat fia de Nazi bolitisch unzuavaleßli woa, hod a fia de Ami paßt.
Noch da Untaredung is da Franz Lettner ois neicha Chefredakteua vo ana neichn Togeszeidung midm Naum: Oberösterreichische Nachrichten, bei da Tür außigaunga.

Da Franz Lettner hod den Aftrog ghobd, a unobhengige, da Demokrtie vapflichtade Togeszeidung außazgebn.

Ea hod mid 6 Leid augfaungd. De nechstn Tog san mid de Bsuagungan vom Schreibzeig und oide Schreibmaschinan sowia mid da Festlegung vom Foamat, de Schriftoatn und aundare Oawadn drafgaunga.

Am 8. Septemba is da Hr. Julius Wimmer vaschtuam.

1946: De Famülien Wimmer und Streit is vo da Besotzungsmocht beschtätigt wuan daß nia Nazi gwest san und a koanalei Eifluß in da Nazizeid afn Druckareibetriab vo da Tages-Post ghobd hobm.

(The Wimmer and Streit family have never been Nazis and had no influence on the politcal management of the „Tagespost“ during the NS-time.)

1947 hod ma da Famülie Wimmer-Streit-Cuturi de Ealaubnis gebm, das de Zeidung Tagespost wida außabringa deafn. Und a de Zwaungsvapflichtung vo da Druckarei is afghobm wuan.

Oberösterreichische Nachrichten Werkeln

Am 11.Juni 1945 is vo de Amerikana de Demokratischen Druck- und Verlagsgesellschaft m.b.H. gründ wuan, de a zglei de Lizenz fian Druck und da Ausgob vo ana Togeszeidung ghobd hod. De neiche Zeidung hod en Naum Oberösterreichische Nachrichten kriagd.

Da Chefradekteua Franz Lettner hod vuan Druck olle Atükön em US.Presseoffizia vialegn miaßn, bevua mas drucka hod deaffa.

De easchte Zeidung woa nua a bladdl Papia, Vuan und Hint bedruckt und is mid ana Aflog vo 70.000 Schtuck außakema. Des woa weid zweng, weu de Leid hobm se um des Zeidungsbladdl grißn.
De Auflog is bis 1947 af 214.000 augschtiegn. De Amerikana woan damid zfridn, obwois dafia a weid mera Papia bsuagn hobm miaßn ois se viaghobd hobm.
Am 8 Oktowa 1945 is de Zeidung unobhengi wuan und in alloani östareichische Hend iwagaunga. De Gsöschofta san honorige Leid gwest und aus olle bolitischn Loga kemma.

De Oberösterreichischen Nachrichten vom 18.8.1950.

Zan End vo de 40 Joah hod mas nu mid ana Obndausgob und mid ana Sunnda-Zeidung probiat. Des hod ma owa zweng da Unwiatschoftligkeid boid wida afgebm.

1947 is de Zwaungsvapochtung vo da Druckarei Wimmer afghobm wuan, owa de Oberösterreichischen Nachrichten san weidahi af da Rotazionsmaschin vo da Druckarei Wimmer druckt wuan.

1952 is da Druckauftrog fia de OÖ Nachrichtn afkündigt woan, weu ma de Rotazionsmaschin wida söwa braucht hod. Fia de Neichausgob vo da Tagespost.

1953: De nochm Tod vom Oskar Streit neiche Gscheftsfiahrung vo da J.Wimmer KG.woa: De Widdibin Grete Streit und ihr Tochta de Ilse Cuturi und deran Kinda. Da Harald Stobitzer is zan Gsöschofta und Komplementäa bschtimmt woan.

Bei da Oberösterreichischen Nachrichten hod da ÖVP-Bolitika und schpodare Nazionalrotspresident da Hr. Dr. Alfred Maleta vom Behrmann de Anteu vo da Zeidung iwanumma.
Am easchtn Oktowa is vo da J.Wimmer Kg. de easchte Ausgob vo da Tagespost außakema.

1955 am 3.Jenna is des easchte Moi de Zeidung mid an neichn Titl außakema.

Weu se de zwoa Zeidungan gegneitig Kundn oschpensti gmocht hobm, san de zwoa Gscheftsleitungan iwaoas kema das gscheida warad waun de zwoa Bladln fusioniradn.
Und so is de Zeidung midm Naum Oberösterreichische Nachrichten vereinigt mit der Tagespost, gegründet 1865 außakema.
Do in de neiche Gsöschoft a da Druckareibetrib eibrocht wuan is, hod an em neichn Pressevalog de J.Wimmer-Gruppn 74% und da Hr. Dr. Alfred Maletta 26% ghoitn

Des Titlbladl vo de Oberösterreichischn Nachrichten vaeinigd mid da Tagespost. Ausgob vom 2.2.1960.

.

Ois Gebuatstogsgschenk zan Hundata hod ma 1965 a neiche 64-Seitige Rotazionsmaschin augschoft.

1973 hod da Urenkl vom Josef Wimmer, da Hr. Rudolf Andreas Cuturi de Gscheftsfiahrung iwanumma und hod damid augfaungt de Zeidung za Modeanisian.

1976 hod ma augfaungt vom Blei- afn Fotosotz umzschtön. In de nextn 15 Joah is im Betriab vü Um- und Zuabaud wuan.

De Rotazionsmaschin, de druckt, fiad de Bladln zaum, foit, bschneit und schpuckt de feati Zeidung aus.
A Redakzionssitzung 1982 midm Chefredakteua Hr. Hermann Polz.

1978 is da Hr. Rudolf Andreas Cuturi Haubtgsöschofta vom Zeidungsvalog wuan. Da Valogsleita is bis 1998 da Hr. Werner Schrotta bschtöd wuan.

Ob 1981 is de Linza Druckarei Feichtinger in Ratn iwanumma und bis 1985 mid da Druckerei J.Wimmer fusioniat woan.

1986 hod da Hr. Dr. Alfred Maletta seine 26% Fiamananteu an em Hr. Rudolf Andreas Cuturi vakaft. Somid woan noch dreißg Joah wida olle Fiamananteu bei da Famülie Wimmer.

Obm 16 Mai wean olle Atüke elektronisch im Archiv oglegd.
Im Juli is easchtmolig de Gratiszeidung Tips im Großraum Linz außagebm wuan.

Obm 1. Jenna 1990 is de Zeidung af da neichn 48 seitign Rollenoffset-Rotazionsmaschin in an neichm Bau druckt wuan. De Umschtöllung hod umma 150 Müllionan Schilling (eppa 11 Müllionan €) kost.

In da Wiener Strasse is de Druckerei Grosser kaft wuan. Noch an Umbau is duathi da Bogndruckbereich und de Buachbindarei iwasiedlt.

1992: Da Druck vom Wimmers gelber Fahrplan wiad noch 114 Joah eigschtöd. Easchmolig is a am 15 Oktowa 1878 afglegd wuan. Des bliabde Heftl hod 1913 mid 215.000 Schtickl de hechste Aflog ghobd.

1993 is da Zeidungsvasaund ausbaud wuan und de Firma hod ia hundatfufzgjaarigs Juwileum gfeiat.

1995 Im großn Hangar vom Flughofn Hörsching (bei Linz) hod ma des 50 jaarige Juwileum vo de Oberösterreichischen Nachrichten gfeiat.

1996 is de Zeidung mid an neichan modeanan Ausgschau außakema.

De Owaöstareichischn Nochrichtn 1975; Aus da Sichtwoas vom Karikatuaristn Florian (Prof. Rudolf Nemec).

1997 is da Fiamantitl vo Druckerei und Zeitungshaus J. Wimmer Gmbh in J. Wimmer Gmbh gendat woan.

Fia de Intaressiatn vom regionalm Fuaßboi (de untan Ligan) hod ma 1999 a eigne Beilog im Kloafoamat, zan praktischn Außanehma eigfiat.

Septemba 2003 is in Pasching des neibaude Druckzentrum eaeffned woan. Doat wean af neiche Maschienan, nebn da Oberösterreichischen Nachrichten a de Zeidungan druckt: Tips • Superanzeiger • Wiatschoftskaummanochrichtn • Kitzbühler Anzeiger • Lagerhauszeitung • Ypstaler • PlusCity News • BZ Bürmoos • und ob 2006 a de Gratiszeidung Oberösterreichs Neue dazuakema.. Iwa 40 vaschiedane Zeidungan wean do druckt.

Und nu amoi is a de Zeidung nu a Wengl behübscht woan.

2006 is de Gratiszeidung Oberösterreichs Neue easchtmolig außakema.

2007 is de Elektronik afn neichastn Schtaund brocht woan.

Am 12. Septmba 2008 is im Beisei vom Laundeshaubtmau Hr. Josef Pühringer und seim Vize Hr. Haider des umbaude Haubthaus gfeiat woan.

Aus 50 Lesa und Lesarinnen wiad im Dezemba a Lesebeirot gründt. Dea soid Vischläg mocha wia ma de Zeidung vabessan kunt.

Seid em 15. Jenna 2009 eascheinan de Schärdinger Volkszeitung, de Braunauer Warthe am Inn und de Rieder Volkszeitung jedn Donnastog ois eigne Beilog vo da Oberösterreichischen Nachrichten in de Regionan.

Ob 2010 Werkeln

•] •] •] •

Persenligkeitn Werkeln

Josef Wimmer: Geboan 27.4.1808, gschtoam 22.5.1894 woa aa in da Schtod Linz Gmoarot.

Ea is a da Direktoa vo da Allgemeinen Sparcasse und Leihanstalt in Linz gwest.
Midm Tagespost Redakteua Hr. Josef Netwald, woa a Midgrinda vom Linza Verschönarungsvarein.
Midm Hr. Johann Konrad Vogel hod a 1859 den evangelischn Waisnfond und 1870 den evangelischn Oamanvarein gründt.

Julius Wimmer: Geboan 9.03.1856, gschtuam 8.09.1945 woa nebmbei a da President vo da Linza Schpoakassa und a vom linza Museum Francisco-Carolinum. Do woa a aa 65 Joah Midglied vom owaöstareichischn Musealvareins und hod a de Museen mid weatvoi Fund intaschtizt.

Rudolf Andreas Cuturi: In da fimftn Genarazion, Nochfuiga vom Fiamangrinda Hr. Josef Wimmer.

Geboan is a am 1. Aprü 1944 in Eberswalde bei Berlin.
1973 is a in de Gscheftsleitung vom Wimmer Druck eigschtiegn. 1978 is a da Haubdgsöschofta wuan und 1988 hod a aa de Fiamanaunteu vom Hr. Alfred Maleta iwanumma. Seid domois hoit a 99% vo da Wimmer Mediengruppn. 1% hot sei Gattin Daniela. mid Dea hod a aa fimf Suhna, vo Dene scho zwoa inda Fiama midoawadn.
Da Hr. R.A. Cuturi is a da President vom Vabaund vom Druck und Medientechnik.
Privat schezt a oide Autos, de Toscana und den sizilianischn Schriftschtölla Andrea Camilleri.

Dr. Alfred Maleta: Geboan am 15.01. 1906 in Mödling, vaschtuam am 16.01.1990 in Soizbuag, Jurist.