Olmeca-Xicallanga

Der Artikl is im Dialekt Owaöstareichisch gschriem worn.

De Olmeca-Xicallanga hom nochn Nidagaung vo Teotihuacan im Sidn vom Texcocosee oanige Schtodschtotn beheascht. Se hom owa nia a groß Reich gründt, sundan woan nua a konfödarzion vo mera Schtäd. Aus eanana wichtigstn Schtod Cholula sans daun sowa vo de Toltekn-Chichimekn vatrim wuan.

Da Quetzalcoatl-Tempö in Xochicalco

Xochicalco

Da Schocht vo da Obsavatoriumkaumma

Ois Teotihuacan schwocha wuan is, hod des ned de vo dera Schtod dominiatn Schtäd betroffa. Owa megligawoas woa des a aa Midgrund zan Oschtig vo dera Wödschtod. De kloane Siedlung Xochicalco woa zwoa scho seid 200 v.Kr. besiedlt. Se hod owa eascht an Bedeitung zuagnumma ois se, in da Bliahzeit vo Teotihuacan ois Woanumschlogplotz in Sidn owi ausbaud wuan is. Aunscheinand woas a aa zentrum da Wissnschoft, den es is nu Heid duat a Schteanwartn zsegn.

De großn Bautn schtaumman owa Olle aus da Zeit ob 700 bis 900 n.Kr. Umma 650/750 hod jo Teotihuacan sein Eifluss valuan. Vua 700 v.Kr hom de Olmeca-Xicallanga den Oat za eanan easchtn Zentrum, mid schpoda eppa 20.000 Eihwohna. Ois umma 650 eppa 25% vo da teotihuacanischn Bevökarung de Schtod valossn hod, woan des megligawoas a großteu vo de fremdn Eihwohna, de in dera großn Schtod eigna Schtodviatl bewohnt haum. Vamuatli is a aa Teu vo Eana in Xochicalco nidalossn. Weas woan und wöcha Schproch gred hom des woaß ma Heid neamma. Megligawoas woan a Chichimekn drunta und se hom Nahua gred? De Toltekn hom schpoda behaubt das a aus Chicomoztoc kema san. Des hom owa vü Vöka behaubt. Waun de Zentreumocht schwoch woa, san ausn Nuadn kemad, oiwei wida Chichimekn eidrunga. De schpoda so bewundatn Toltekn woan jo uaschpringli söwa a gnausoichane barbarn.

A Modö vo da großn Pyramidn in Colula

Laut da Historica Tolteca-Chichimeca woa eana schtaummvota da Iztac Mixcoatl dea mid sein Weiwal Ilacueitl, sex Suhn ghobd hes, de Olle a beschtimmts Gebiet besiedlt hom. demnoch wan da dritte Suhn Ulmecatl und da viate Suhn Xilcalacatl de Grindavetta da Olmeca-Xicallan gwest.

Des Voik isc gach gwoxn und se haum a Chalca, Xa ltepec, Chimalpahin, Amaquemecan, Xocoyocan, ie Gegand um Cuernavaca und de Schtod Cholula, de im Reich vo de Teotihuacana de zwoatgreßte Schtod gwest wa.

Cholula

A Schlochtnfresco aus da Schtod Cacaxtla( Tlaxcalla)

Cholula is daun 1392 an de Schtod Huexotzingo (a Schtodschtoot vo de Tlaxcaltana) gfoin. De Olmeca-Xicalanga hom koa Reich gründt, se woan eha a Födarazion vo Schtodschtootn, unta Dene de Schtod Colula de hechste religiöse Autoritet ghobd hod. De Pyramidn vo Colula woa nu gressa ois de Sunnpyramidn vo Teotihuacan, wos de Bedeitung vo dera Schtod nua untaschtreicht.

Ois schpoda des Tolteknreich ausanaundabrocha is haum se oanige Toltekn mid Chichimekn-Schtämm zaumdau. de haum daun ois Toltekn-Chichimecn de Olmeca-Xicalanga 1292 aus Colula und nu aundare Schtäd vatriem. De Olmeca-Xincalanga san daun in aundare Schtodschtootn und Vöka afgaunga.

Schau aa

• Teotihuacan
• Toltekn
• Mixtekn
• Huexotzinca
• De Mexica
• Boischpü in Mesoamerica
• Oidamerikanische Schriftsystem

Litaradua

• Hans j. Prem, Die Azteken. 5. Auflage 2011, C.H.Beck, Minga. ISBN 978-3-406-45835-4
• Hanns.J.Prem, Geschichte Altamerikas. R. Oldenburg Verlag, Minga 2008. ISBN 978-3-486-53032-2
• Rudolf Pförtner/Nigel Davids, Alte Kulturen der neuen Welt. Econ Verlag, Wean 1980.
• Berthold Riese, Das Reich der Azteken- Geschichte und Kultur. C.H.Beck, Minga, 2011.ISBN 978-3-406-61400-2
• Nicoiai Grube u. A., Maya - Gottkönige im Regenwald. Tandem Verlag - H.F. Ulmann-Potsdam 2006/7 ISBN 978-3- 8331-4447-9

Im Netz

• http://es.wikipedia.org/wiki/Olmeca-xicalanca
• http://de.wikipedia.org/wiki/Xochicalco
• http://de.wikipedia.org/wiki/Pyramide_von_Cholula

Video

• http://www.youtube.com/watch?v=rAzL3xGAQPM%7C A Rekonstrukzion vo Xochicalco.
• http://www.youtube.com/watch?v=Ex29den67CQ |De Pyramidn vo Xochicalco; Schpanisch.
• http://www.youtube.com/watch?v=Q5DS1ir4tRw%7C Des Obsavatorium in Xochicalco.