Boarische Wikipedia

Ostbahn Kurti

Der Artikl is im Dialekt Owaöstareichisch gschriem worn.

„Dr. Kurt Ostbahn“ vulgo „da Ostbahn Kurti“ is a fum Weana Dexda Günter Brödl im Scheaz eafundane Kunstfigua gwen, de daun a öffentlichs Aignlem entwükit hod. Peasonifiziat iss ob n Joa 1983 bis zu iara Pensioniarung 2003 fum Musika Willi Resetarits woan, dea wos 2022 gschduam is.

Da Willi Resetarits bai ana Lesung im Museumsquartier in Wean, 2007

Gschicht

Werkeln

In de 70ga Joa hods baim estareichischn Radiosenda Ö3 a Sendung gem, de hod Musicbox ghoassn. In am musikalischn Joaresrückblik in deara Sendung is da Günter Brödl fum Modarator Wolfgang Kos gfrogt woan, wia a so a amerikanische Foaschdod-Kabön wia de "Southside Johnny & the Asbury Jukes" in Wean hoassn daradn. Da Brödl hod gach iwalegt und gsogt: „Ostbahn Kurti & die Chefpartie“.

1979 is daun in Brödl sei Deataschdikl Wem gehört der Rock 'n' Roll? uraufgfiad woan. In dem Schdikl hod de "Ostbahn Kurti"-Figur schau a komplete Biografi. Domois hod da Erich Götzinger de eafundane Figua gschbüd. Da Ostbahn Kurti hod in deara Biografi aungeblich schau zwoa fagrifane LPs broduziad, de Text fu seine Liada san in faschidane Literatua-Zeidschriftn faöfentlicht woan, in da Oawatazeidung is a Portait zu eam brocht woan und in da Musicbox fu Ö3 sent a Intawiu mid eam.

Damid a de gaunze Fantasi-Gschicht nu bessa unta d Leit bringa kau, hod da Brödl Günter zu deara Zeid in Zeidungen Annoncen aufgem, wia „Suche Ostbahn-Kurti-LPs!“ oda ea hod auf a Autobau-Brukn a Grafiti hiigschbraid, wia: „Kurt Ostbahn lebt!“. Söwa hod si da Brödl ois in Kurti sei Kontaktperson ausgem.

1983 hod da Brödl in Willi Resetarits kena gleand. Da Willi Resetarits woa domois mid de Schmetterlinge untawegs, ana Band de gschdöschoftskritischn Folk gmocht hod und sogoa baim Eurovision Song-Contest woa. Ob dem Zeidbunkt woa da Willi Resetarits da Ostbahn Kurti in da Öfentlichkaid.

Said dem hod da Brödl Günta fia de Text fu dem Brojekt gsoagt und da Willi Resetarits und sei Band haum in musikalischn Part iwanuma. Da Brödl hod Rockklassika gecovert und ins Weanarische iwasezt, wia zB It's All Over Now fum Ry Cooder und Stevie Ray Vaughan aus dem a "Ois hod sei End" gmocht hod. 1985 is de easchde LP aussa kema fu Ostbahn Kurti & die Chefpartie. Danoch hod s Live-Konzeat gem, Ostbahn-Kurti-Comics und Romane. Aussadem is 1997 da Füm "Blutrausch" mim Ostbahn Kurti drad woan und 1998 a Liadabuach mid seine Songs aussa kema.

Am 10. Oktoba 2000 is da Günter Brödl owa gauns gach an am Heazdod gschdoam und da Willi Resetarits woit a aloa de Figua fum Ostbahn Kurti ned waida entwükin. Zum Schlus woa a da Ostbahn Kurti schau so real und populea, das fü Leit und de mearan Fans goa ned gwusst haum, wia da Willi Resetarits wiakli hoast und das a in Ostbahn Kurti jo neta schbüd.

Im Joa 2003 hod daun da Kurt Ostbahn und die Kombo eana Obschiads-Tournee gem und zu Silwesda 2003 hod da Willi Resetarits im Schutzhaus am Schafberg zum lezdn Moi an Aufdrit ois Ostbahn Kurti gem, da Titel woa "Zu Sylvester moch ma vielleicht no wos!".

Im Joa 2004 is bai da Giatlbrukn baim AKH laung a Transparent ghengt mid „Ostbahn lebt!“ drauf. Des is a fum weana Magisdrat laun henga lossn woan.

Weanarisch

Werkeln

Da Ostbahn Kurti woa oane fu de prominentastn Figuan in da estareichischn Medienlaundschoft, de öfentlich Dialekt gret (und gsunga) hod. De Schbroch fum Ostbahn Kurti is da oide Weana Dialekt, wiar a bis in de 60ga und 70ga Joa in de Foaschdod-Beziak fu Wean (zB Faforitn, Simaring, Maidling) gret woan is.

De Schbroch is in de 1980ga Joa schau oiweu mea am faschwindn gwen und fü Leit haum a weng nostalgische Gfü griagt, zu da Schbroch fu eanara Jugend oda Kindheit, de de heitign Jungen goa neama ren. Des woa filaicht mid a Grund fia de risige Popularidet fum Ostbahn Kurti.

Kurios is a nu, das de Muadaschbroch fum Willi Resetarits jo eigentlich Buagnlaund-Kroatisch gwen is. So is a "buagnlandla Grawod" zu oam fu de lezdn "echtn Weana" woan.

De Chefpartie heit

Werkeln

Da Bossist fu da Chefpartie, da Horak Koal, hod im Summa 2007 zwoa Ostbahn-Kurti Liad covert.

  • Nach sovü Joah ( M:Leo Bei/T:G.Brödl)
  • Es gibt Stroßn (Musik Andi Zech und Josef Havlicek / Text O.Kurti )

De fint ma im Intanetz unta https://web.archive.org/web/20180803213256/http://karlhorak.at/.

Diskografie

Werkeln
  • "Ollas wos i brauch" (1975, Single, vergriffen und verzweifelt gesucht - fiktiv)
  • "Antifrost Boogie" (1976 - fiktiv)
  • "Nochtschicht" (1977 - fiktiv)
  • "Ostbahn-Kurti & Die Chefpartie" (1985)
  • "Ostbahn Live" (1985)
  • "A Schene Leich" (1988)
  • "Liagn & Lochn" (1989)
  • "1/2 So Wüd" (1991)
  • "A Blede Gschicht ... Oba Uns Is Wuascht!" (1992)
  • "Trost & Rat - Live" (1993)
  • "Saft & Kraft - Live" (1993)
  • "Espresso Rosi" (1995)
  • "Die Tankstelle Der Verdammten" (1995, Deataschdikl fum Georg Ringsgwandl)
  • "Reserviert Fia Zwa" (1997)
  • "Blutrausch" (1997)
  • "50 Verschenkte Jahre Im Dienste Der Rockmusik" (1999)
  • "Ohjo" (2001)
  • "Kurtiositäten" (2002)
  • "Wann De Musik..." (2003)
  • "...Vuabei Is" (2003)
  • "Live 1, 2 und 3" (2003, 3 CDs)

Diskografie nochdem das da Ostbahn Kurti in Pension gaunga is:

  • "Kurt Ostbahn Trifft Sivan Perwer" (2004)
  • "Höchste Zeit - Ein Abend Im Gasthaus Quell" (2005)

Beleg

Werkeln

Glatzkopf / LWood

Aaszeichnunga

Werkeln

Im Netz

Werkeln

Anmeakung: Dea Artikl is auf Owaestareichisch gschrim woan. Waun owa oane fu aich gscheits Ostbahn-Kurti-Weanarisch kau, daun deaf a den Artikl gean auf Weanarisch umschreim (oda nu wos dazua schreim).

Voh „https://bar.wikipedia.org/w/index.php?title=Ostbahn_Kurti&oldid=822343“