Schtanz in Miazdoi

Die Schtanz (amtli: Stanz im Mürztal) is a Gmeinti wos in Schtanzadoi, an Seitndoi van Miazdoi liegg. Sie hod 1.836 Eiwouna (2016).

Dialekt

Do rein die Leid, wia ma vielleicht a an dein Atikl merkt, a weink an eiganan Dialekt. Dea is sou a Mittlding aus Weizarisch und Miazarisch, owa sou richti vaschtei toans hoid vü net. Deisdweign gibbs scha a eiganas Wöatabuach va da Schtanz, deis hoaßt "Sou sogn mas, sou moan mas".

Wiadschoft

In da Schtanz gibbs nou vü Bauan, die meistn mit Rindviecha, und vü va dei betreim nembei nou wos mit Turismus, zum Baüspü Ualaub am Bauernhouf und sou. Turismus is souwiesou gounz wichtig in dein Doi. Es gibb vü scheini Woundaweig mit an Haufn Kunstwerk und a Sochn, wou die Leit schaun kinan wias friacha gwein is, zum Baüspü a Schauschmittn, und natiali a meara Gostheisa und Schounkn.