Sphinx

A Sphinx (griachisch Σφίγξ „D Wiagarin“; Plural Sphinxn oda Sphinga) is a mythische Figua, wo an Schädl vo an Menschn hot und an Loab vo an Leew.

D äitaste Sphinx Statue is am Euphrat gfundn woarn und is uma 11.500 Joar oid. Om bekonntastn is d Grousse Sphinx vo Gizeh, wo uma 4.500 Joar oid is. Se is 20 Meta houch und 73,5 Meta long.

D Sphixn san voi oim Wochta vo Tempen. D egyptischn Sphinxn hom an Mannaschädl, moast vo an Pharao, und san freindle zan Menschn. D griachischn Sphinxn hom an Weiwaschädl und sa feindle gsinnt.

Griachischa Mythos

D griachische Sphinx woar am Beag Sphingion westle vo Theben dahoam. Olle Roasadn, wo voabeikeman san, hom a Rätsl gstejt griagt. Wea s net läsn hod kina, is vo ia dawiagt und nacha gfressn woarn.

Neamd hots Rätsl läsn kina bis da Edipus keman is. Wia da Edipus ia d richti Antwoat gebn ghobt hod, hod se d Sphinx vo am Fejsn in an Doud gstiazt. Theben woar befreit, oba s tragische Schicksoi vom Edipus woar so bsiglt.

S Rätsl woar:

τί ἐστιν ὃ μίαν ἔχον φωνὴν τετράπουν καὶ δίπουν καὶ τρίπουν γίνεται;

Wos is des, wo redn ko, zeascht viahaxad is, nacha zwoahaxad und om Schluss dreihaxad wead?

D richte Antwoat is "da Mensch", wo ois kloans Kindl viahaxad lafft, ois Dawoxana zwoahaxad und ois Oida mid an Stoog dreihaxad.

Schau aa

Im Netz

Commons: Statuen vo da Sphinx – Sammlung vo Buidl, Videos und Audiodateien

Commons: D Sphinx vo Naxos – Sammlung vo Buidl, Videos und Audiodateien