Text:Wea is da gröißte Noar?
Josef Max Schuegraf: Der Wäldler: Gedichte in der Mundart des bayerischen Waldes. Wiazburg, 1858
Wea is da gröißte Noar? Werkeln
A Pfoarra hot an Bruadan ghot,
Is Meßna bei eahm gween,
Und hot da Stand aa füragschaut,
Vantweng* is do koa Ren!
Denn boade hom se guat vatrong,
Von Hodern ko ma goa nix song. --
Nua hot da Pfoarra selt'n glocht, --
Ea hot koan Spoaß ned gmögt, --
Und hot a glocht, so hot a se,
In Kella noo vosteckt,
Weil's Näamat ned häitt mirka solln,
Daß eahm a Soch so wohl hot gfolln.
Vül hoata se da Meßner zoagt,
Ea mocht sched lauta Gspoaß,
Und is a aa studiad ned gween,
Dees mocht'n goa ned hoaß;
Denn hot da Pfoarra eahm ogmühat,
So hot a se doh neuimols grühat.
Amol san's aa bein Wiarth eikeaht, --
Wos selt'n sunst is gscheng --
Es hom se noh meah Leut eigstellt,
De's olle hom gean gseng.
Und hot da Meßna z'Ofang ned,
So hot a z'letzt schieah z'lusti gredt.
'M Pfoarra, dea gean christli thoo,
Dem is's holz z'vül glei woan,
Und hot's 'm Meßna z'mirka gem;
Doh dea, dea locht vo voan.
Jetzt wiad da Pfoarra wüld und sogt:
"Du bist a Noar, wenn wea mi frogt. --
'N Meßna hot dees Ding wos gjuckt,
Ea wül eahm nix'n boarng,
Und sogt glei draf: Dees wearn ma höan,
Wennst holtst dei Haouchamt moarng." --
Und d'Leut de hom d'a umatum
Afglust schiea in da ganz'n Stum.
'N ondan Tog, do hom sie se
Ins Haouchamt oll neiigmeuiüht:
Denn d' Neugierd hot's ja olle plogt,
Weui dees noh außegeiht;
Bein Haoucholtoa, do stenga's oo,
Daß eahna nix auskömma koo.
Es läutt, -- min Amt, do hot's sein Gang
Und ollas passt recht af,
Da Meßna thaout se fleiße um,
Da Pfoarra bett recht brav;
Und ruma geiht's, so ohne Naouth,
Bis's ite missa* kömma thaout;
Do hot da Meßna gschwinde gfrogt:
Wea is, Hea Bruada Sie!
Wohl unta uns da gröißte Noar?"
Da Pfoarra singt: I, I ...........
Und wiad do drüba so voleng,
Daß eahm vogeht schiea Höan und Seng.
- Omeakung
- vantweng = desweng
- ite, missa es (hod da Pfoarra friaa am End vo da Mess gsogt bzw. lang zong gsunga: "iiiiite"; boarisch sovui wia: "Gähts hii in Friedn")