Universidade de Santiago de Compostela

D Universidade de Santiago de Compostela (kuaz USC) is a stååtliche Universität mit Sitz in da galizischn Ståd Santiago de Compostela im Noadwestn vo da iberischn Hoibinse. Daneem vafiagd d USC iwa an zwoatn Standort in Lugo. De Universität is im Joar 1495 grind worn und is damit de ejdaste in Galicien und de sechstejdaste vo gånz Spanien. In vaschiedene Rankings liagt de USC regemäßig unta de besten 500 Universitäten wejdweid und wiad ois oane vo de bestn spanischn Unis ogseng.

Universidade de Santiago de Compostela
Logo
Grindung	1495
Trägaschoft	stååtlich
Ort	Santiago de Compostela und Lugo
Staat	Spanien Spanien
Rektor	Antonio López Díaz
Studentn	25.432 (2018/19)
Mitorbata	3.294 (2020)
davon Professorn	2.071 (2020)
Hoamseitn	www.usc.gal

Gschicht

De Urspring vo da USC gehn auf s Joar 1495 zruck, åis da Notar Lope Gómez de Marzoa mit Untastitzung vom Åbt vo am Kloasta San Martiño Pinario a Schui fia oame Studentn grind håd. 1504 håd da Påpst Julius da Zwoate dann in a Bulln de Grindung bestätigt und umara 50 Joar spada, im Joar 1555, is de Universität schliaßli åis kenigliche Universität oeakannt worn.

Da Kreizgång vom Pazo de Fonseca, Sitz vo da Hauptbibliothek

Iwa de nachstn Joarhundad håd se d USC dann åis Universität unta kiachlichm Eifluss etabliert und is nach und nach um weidare Fakuitätn eaweidat worn. Im 18. Joarhundad find dann a easte Säkularisierung stått und de Universität håd zum eastn Måi mea ois 1.000 Studentn.

S 19. Joarhundad is vo oeanige eahebliche Eischnitt fia d USC kennzeichnet. Aufgrund vom Unabhängigkeitsgriag gega de Franzosn (1808-1814) gibt s kaum Studentn und im Joar 1810 soidd d Universität gschlossn wern, wei s angebli den fanzesischn Besatzan z Nah gstandn sei. Blouß finf Joar spada håd s dann wieda an Plan zua Schliaßung gehm, desmåi wega de liberaln Ideen de se in da Universität vabreit ham. Aa de foigendn Joarzehnte wern vo absolutistische und zentralistische Måßnahma prägt, weiche de Eigaständigkeit vo da USC bschränkn.

D Gschichts- und Geografiefakuität in da Oidståd (Campus Histórico)

East z Anfang vo am 20. Joarhundad kimmts dann zu a Modernisierung und Demokratisierung vo da Universität. Ab 1910 deafn aa Fraun in Santiago studiern und während da Zwoatn Spanischn Republik vo 1931-1939 wean de Studentn mea in hochschuipolitische Entscheidungs eigbundn. Während da Franco-Diktatur, de vo 1939 bis 1975 odauert, is de USC a Zentrum vom demokratischn Widastånd, weicha insbsundare vo de Studentn ausgeht.

Mit da Wiedaeifiahrung vo da Demokratie in Spanien im Joar 1975 is dann zu am groußn Wachstum vo da USC kemma. 1987 san iwa 45.000 Studentn matrikuliert gwesn. De hoha Studentnzoin ham dann schliaßli zua Grindung vo zwei neiche Universitätn in Galicien gfiahd: Im Joar 1989 san d Universidade da Coruña und d Universidade de Vigo aus da USC heraus grind worn. Da Beitritt vo Spanien zur EU und de Schåffung vom Eiropäischn Hochschuiraum ham außadem zu a zunehmendn Internationalisierung vo da USC gfiahd.

D USC heid

Aa heid no prägt d USC des Stådbuid vo Santiago. Sie is oane vo de greßtn Årbadgeba in da Ståd und de Studentn spuin a wichtige Roin fia de ertliche Wiatschaft. Åis fihrende akademische Eirichtung is de Universität außadem a wichtige Figur im effntlichn Leem vo gånz Galicien und vui wichtige Persenlichkeitn ham in da USC studiert. Berihmte Alumni san zum Beispui da ehemålige spanische Ministapräsident Mariano Rajoy oda da iatzige Ministapräsident vo Galicien, Alberto Núñez Feijóo.

D Jurafakuität im Capus Sur

Im Joar 2018/19 warn in da USC 25.432 Studentn immatrikuliert, de si auf drei Campuse in Santiago (Campus Histórico, Campus Sur und Campus Norte) und an Campus Terra in Lugo vadeilt ham. Sie vafiagd iwa 3.294 Mitorbata, wovo 2.071 Dozentn san, de in 23 Fakuitätn untarichtn. D USC biet iwa 60 Bachelorstudiengäng, 68 Masterstudiengäng und 55 Promotionsstudiengäng o und håd damit s greßte Studienångebot vo da Region.

Rektor is seit Aprui 2018 da Juraprofessor Antonio López Díaz.

Blick aufn Campus Sur

D USC und s Galizische

D USC håd zwoa offizielle Språchn: S Galizische und as Spanische. Åis Amtsspråch wead awa s Galizische vawent und in ihre Statutn bekennt si d USC dazua, zua Normalisierung und Entwigglung vo da Språch beizudrång. Offizielle Vaånståitunga findn dahea in da Rege imma auf Galizisch stått. In de Voalesungn deaf awa jeda Professor und Student seiwa entscheidn ob ea oda sie as Galizische oda as Spanische heanehma wui. Deshoib untascheid si da Galizischanteil je nåch Studiengang stårk: Während in de Kommunikationswissenschåftn iwa 60 % vo de Voalesungn auf Galizisch san, san s in Jura weit unta 5 %. Insgesamt san um de 20 % vo olle Lehrvaånståitunga auf Galizisch.

Wei des åis z weng empfundn wead, kimmt s regemäßig zu Protestn vo da Studentnschåft. So ham zum Beispui im Novemba 2019 de Medizinstudentn mehrane Dåg gstreikt, unta andam um gega de Diskriminierung vom Galizischn in Voalesunga und Klausurn z demonstriern.