Der Artikl is im Dialekt Obaboarisch gschriem worn.

De Belletristik is a ausm Feijd vo de belles lettres heavoagangans Segment vom Buachmoakt. Da Breich is im 17. Joahundat zwischn am Moakt vo gleata Fochliteratua vo de Wissnschoften (de lettres, da Literatua im eingtlichn Woatsinn) unn am Moakt billiga, zmeist sea rouh gstoijtata Biacha fiar as „oafoche Voijk“ entstondn. Aus de belles lettres is nochan, weniga franzesisch klingand, de „Belletristik“ woan.

Entwicklung Werkeln

Seit da Wendn ins 18. Joarhundat hod de Belletristik a broads Spektrum o Genres fia Lesa mit Gschmock umfosst, de weniga o Fochgleasomkeit interessiat woan, oijs o de modeanan unn elegantn Publikationan noch franzesischa Mod, wia se domoijs in gonz Eiropa glesn woan san. Aktueije politische Memoian, Roman, Journal, Poesie unn Klassika vo da Antikn in modeanan Iabasetzunga san im Zentrum vo dem Bgriffsfeijd gstondn.

Im Laf vom 18. Joarhundat is da Bgriff belles lettres aufm deitschn Buachmoakt aus da Mod kemma. Deitschsprochige Alternativbegriff hom se duachgsetzt: um 1700 „galante Wissnschoftn“, in da Mittn vom 18. Joarhundat „schene Wissnschoftn“, aufm Weg ins 20. Joarhundat nochan „schene Literatua“. Mit de afanandafoijgndn Begriffsbuijdunga hot se as Gottungsspektrum Schritt um Schritt auf Dramen, Roman unn Gdicht vaengt, am Keanbstond vo da „poetischn Nationalliteratua“.

Heitige Vawendung Werkeln

De Bgriffsvaengung vo da „schenan Literatua“ af de „poetische Nationalliteratua“ is bsundas vehement im deitschn Sprochram duachgsetzt woan, weijchana dodozua a nationals Diskussionsfeijd afbaut hot. Des deafat dofia vaontwortli sei, dass da deitschsprochige Buachhondl de oijde Bgriffsbuijdung iabalemn hot lossn, um an internationaln Moakt von am broadn Publikumsinteresse no benenna z'kenna.

De Belletristik umfosst no heit weitgengand as Spektrum, des de belles lettres im frian 18. Joahundat umfosst hom: Memoires, populärwissnschoftliche Biacha, Roman – kuaz as gsomte Feijd, aus dem de Nationalliteratuan entstondn san, eibett in an aktueijn internationaln Massnmoakt.

Ondas oijs de „Literatua“ is de Belletristik koa Untarichtsfoch unn de gseijschoftlichn Ausanandasetzunga entzong. S'gibt „Literatuakritika“, oba koane „Belletristikkritika“ – dodrum aa de eileitende Definition vo da Belletristik oijs „Segment vom Buachmoakt“. Heit wead da Bgriff vo da Belletristik olladings oft aa euphemistisch fia de reine Untahoijtungsliteratua (voa oijm leichte Roman) braucht. Im deitschsprochign Buachmoakt wead da Bgriff Belletristik seit da Mittn vom 20. Joahundat oba aa synonym zum im angelsächsischn Ram iablichn Terminus Fiction (oijs Gengsotz zua Nonfiction) vawendt.

Schau aa Werkeln