Berchtsgoana Weihnochtsschitzn

Der Artikl is im Dialekt Berchtsgoanarisch gschriem worn.

De Berchtsgoana Weihnochtsschitzn lossn eanane Bölla voa oijm zua de kiachliche Fest im Berchtsgoana Toijkesseij kracha. Se san in mehrane Vaein unta dem Doch vo de Vereinigten Weihnachtsschützen des Berchtesgadener Landes e.V. organisiat, de wiedarum am Trachtn-Gauvaband I oghean. Heimatvabundnheit unn christlichs Brauchtum san zsamma mit dea dodrin gsuachtn Gselligkeit wichtige Wesensmeakmoij vo dena Vaein. Nomansgemnd is des Schiaßn z' Weihnochtn. Dea Brauch wead in dera Foam alloanigst im Berchtsgoana Lond pflegt. De Weihnochtsschitzn trogn beim Schiaßn a Variantn vo da Berchtsgoana Tracht, de se duach a blaugraue Joppn und am Schitznhuat somt Gaamsboat oda Schuijdhackn auszeichnet.

Gschicht

De easchte uakundliche Eawähnung vo dem Weihnochtsschitznbrauch geht auf des Joar 1708 zruck. Grundlog vo dem Brauch san de in de Hef vo da domoijs eiganständigan Fiaschtprobschtei Berchtsgoan voahandnan Feiawoffn zua Veateidigung vom Lond. Im Gengsotz zua de dodraus heavoagonganan Gbiagsschitzn hom se de Weihnochtsschitzn iaba de Joarhundate hiweg aus de militärischn Zsammahäng glöst unn se stottdessn oijwei enga on des christliche Brauchtum bundn. Obwoij joarhundatelong vo da Obrigkeit vabotn, hot se des Schiaßn z' Weihnochtn unn in de ondan Rauhnächt ghoijtn.

Dea easchte offzielle Vaein is 1874 gründt woan. 1925 hom se de Weihnochtsschitznvaein vo de oanzelnan Oat zua de Vereinigten Weihnachtsschützen des Berchtesgadener Landes zsammgschlossa. Im Drittn Reich hom se de fiarandn Kepf vo de Weihnochtsschitzn da Vaeinnahmung vo eanam Brauchtum duach an Nationalsozialismus widasetzt, insbsundane eana spadana Eanvoastond Prof. Dr. Rudolf Kriß, dea deszweng voaram Voijksgrichtshof zum Doud vauateijt unn spada zura lemnslongan Hoft bgnodigt woan is.

De Weihnochtsschitzn gniaßn bis heit aufgrund eana oijdn Tradition vaschiadene Privilegien, wos woffn- unn sprengstoffrechtliche Voaschriftn ogeht. Deazeit wead da Brauch vo 17 Vaein mit insgsomt uma 3.000 Mitglieda ausgiabt.

Litaradua

Kriß, Rudolf: Die Weihnachtsschützen des Berchtesgadener Landes und ihr Brauchtum. 4. Aufl. Berchtesgaden (Berchtesgadener Anzeiger) 1994.