Istanbul

Der Artikl is im Dialekt Obaboarisch gschriem worn.

Istanbul
Staat:	Tiakei
Provinz:	Istanbul
Geografische Lagn:	41° 0′ 36" N, 28° 57′ 37" O
Hächn:	40 m ü. NN
Flächn:	5.461 km²
Einwohna (aumtlich):	14.657.434 (Stand 2015)
Bevoikarungsdichtn:	2.684 Einwohna/km²
Telefonvorwahln:	(+90) 212 (eiropäischa Tei) (+90) 216 (asiatischa Tei)
Kennzeichn:	34
Stadtgliedarung:	39 Stodteile
Politik
Buagamoasta	Ekrem İmamoğlu (Cumhuriyet Halk Partisi) CHP

Istanbul is de greaßte Stod vo da Tiakei und oane vo de ejtastn Städt, de wos heid no gibt. Friaa wors untam Nama "Byzanz" und "Konstantinopel" bekannt.

Eadkunde

Istanbul liegt auf beide Seitn vom Bosporus, des is a Meerenge, de as Middlmeea midm Schwoarzn Meer vabindt und Eiropa vo Asien trennt. De Stod liegt oiso auf zwoa Kontinent.

De zwoa Teile auf de vaschiedan Kontinent wern neba Fährschiff vo zwoa Hängebruckn vabundn. Auf dem Panorama-Photo unt sigt ma rechts de Bosporus-Bruckn (Boğaz Köprüsü), dahinta ligt de neiere Fatih-Sultan-Mehmet-Bruckn (Fatih Sultan Mehmet Köprüsü).

• 
  Satellitnbuidl vo Istanbul
• 
  Hubschrauwafoto vo Halic

Sengswiadigkeitn

Hagia Sophia (Ayasofya)

De Hagia Sophia is 537 ois a orthodoxe Kirch baut worn. As werd zua de siebn Wöidwunda vom Middloita zejd. Fia guad 1000 Joar wars de mid Obstand greaßte Kirch auf da Wöid. As Hauptschiff hod eppaa de Flächn vo om Fuaßboi-Fejd, de Kuppl driwa is 56 Meta houch. Mit da Eaobarung vo Istanbul 1453 duach de Osmanen is zua na Moschee umbaud worn. Auf Oregung vom Kemal Atatürk, am Stootsgrinda vo da moderna Tiakei, wor de Hagia Sophia vo 1934 bis 2020 a Museum, des wos neama religiäs gnutzt wurn is. Owa da derzeitige tiakische Stootspresident Recep Tayyip Erdogan hod de Hagia Sophia 2020 wieda in a Moschee umgwondelt. De Wiedaumwondlung in a Moschee wor a Wunsch vo de Islamisten seit de 30er Joah, und da Erdogan hod in de leztn zehn Joah immer wieder gseit, daßa de Hagia Sophia wieda gern zur Moschee mochad - 2020 wor's donn so weit.

Von Taksim zum Galata-Turm

Taksim is oana vo de zentrain Platzln in Istanbul, kunt ma mim Stachus in Minga vagleicha. Vo do weg gehd a Einkaufsstraß zum Galata-Turm. Friara war de Gengd a Auslända-Viadl, voa oim italenische Händla hom do ihre Gschaftln ghobt. Desweng gibts do aa a katholische Kirch, Sankt Anton. Da Taksim-Platz sejm werd neba de Hochhaisa vo na orthodoxn Kirch, Hagia Triade prägt.

Ortaköy

Des is a Viadl, des sie ois Zui fia Touristn wia fia Einheimische recht beliabt is. As gibt an Haufa Restaurants und Bars rund um de Moschee und ma hod an scheena Blick aufn Bosporus und aufd Bruckn.

• Blaue Moschee (Sultan Ahmet Camii)
• Dolmabahçe-Palast (Dolmabahçe Sarayı)
• Süleymaniye-Moschee (Süleymaniye Camii)
• Topkapi-Palast (Topkapı Sarayı)

Im Netz

 Commons: Istanbul – Oibum mit Buidl, Videos und Audiodateien

• Hoamseitn vo da Stodvawoitung vo Istanbul (tiakisch/englisch)
• Eintrag in da Wejteabelistn vo da UNESCO auf Englisch und auf Franzesisch
• Literatur von und über Istanbul im Katalog der Deutschen Nationalbibliothek
• Informationsportal „İstanbul 2010“ zur Kulturhauptstadt 2010 (tiakisch/englisch)
  • Istanbul – Schmelztiegel der Kulturen, Projekt vo ARTE