Frongafös

Frongafös (deitsch: Frankenfels) is a kloana Moakt mit 1913 Leid (2023) im Beziak St. Pöötn-Laund in Niedaöstareich. Frongafös wiad auf de Endsübn betont. Stodleit und heitzutogs a scho etla Dosige betonan Frongafös auf de easchte Sübn.

Geografie

Frongafös is im Mostviadl in Niedaöstareich und hod 56,16 km². 57,34 Prozent va da Flächn is Woid.

Duach Frongafös rinnt de Natters, des is a kloas Nebnbachal va da Pielach. De Pielach rinnt owa a a poahundat meta duachs Gmoagebiet.

In Frongafös gibts in Moakt und Gegendn und Rottn:

Fokaschtoarotte, Fischbomürotte, Grassarotte, Gstettngegnd, Hofstodgegnd, Koarotte, Lambogegnd, Lechagegnd, Moaknschlogrotte, Peenarotte, Pielachleitngegnd, Rosnbichlrotte, Edrotte, Taschlgromrotte, Tiafgromrotte, Übagaungrotte, Weißnbuaggegnd und Wiesrottn.

De Eiteulung fa de Rotten is fa friaraszeiten, wos in jeda Rotte an Rottmo' gebm hot, dea wos fia de Baunleit ban Buaghean gredt hot.

Gschicht

Friaraszeiten im Oitatum hot Fronkafös za da remischn Provinz Noricum gheat. Nochhea woan amoi a poa Slawen im Lond. In da neichan Zeit hom owa in Fronkafös oiweu baiern glebt.

Eihwohna

Ba da Voikszölung 2016 woan 2021 Leid Frongafösa, 2001 woans 2187, 1991 hots 2118 Eihwohna gebm, 1981 2026 und 1971 1989 Leid.

Politik

Buagamoasta is da Winta Herbert, a Mittastoa Herbert gnonnt, Vize da Eiglsreita Christof (oi zwoa ÖVP).

Im Gmoarod sitzn seit da Woi 2015:

De schwoazn (ÖVP): 15
De rotn (SPÖ): 4
De blaun (FPÖ): 2

Ois mitanond san des 21 Sitz'.

Vakea

De Zöla-Bon bleibt a etla moi steh' in Frongafös:

Bohnhof Schwoaznbo', Bohnhof Frongafös, Hoitstö Boding, Bohnhof Lambomü'. Friaraszeitn hots a nu de Valodareistö Weißnbuag und bis Dezemba 2010 a Hoitestö in Unterbuachbeag gem. In nexta Zeit wiad in Lambomü' a neichi werkstod baut.

Fia de Autafora geht de LB39 (Pielachtoistroßn) vabei. Ausadem geht a nu a hoiwix rewetialichi Strosn üwa Schwoaznbo' und d'Gschoad-He noch Tianitz umi und a ondare üwan Weißnbo' und Plongastoa weita umi noch Texing.

Partnagmoa

Frongafös is Partnagmoa va Hoistod in Untafrankn.

Sehnswiadigkeitn

de Nixhöhn
de Buag Weißnbuag
des Bergbaunmuseum Hausschtoa
de Zöla-bon
da Hoanschlittnclub frongafös
da Natualehrpfod
Radlstreckn
des Steinschalerdörfl

Vaonschtoitungan

Im Suma gibts fü Festln, z. B. Feiaweafest, Weissnbachler Feiaweafest, Schpoatlafest, Oktobafest, Frülingsfest, Sumanochtsfest.
Im Winta gibts etla Beula, z. B. Frongafösa Beu, Jagabeu, Simandlbeu, Krampasparty,..
De zwoa Musikkapön TMV Frongafös („de fongruawan“) und MV Ötschalond („de niadaran“) geman zwoa moi im Joa a Konzert.
De Buaggespräche auf da Buag Weißnbuag.

Sproch

In Frongafös wiad a Mostviatlarische Gottung vam Bairischn gredt. Weu Frongafös do a bissl weida weg va da Stod is, hom si nu eha gwisse Weata dahoitn wia weita aussizua. Ois Pielachtola ko ma teuweis van Dialekt dakenna (oda ehata darodn) obs oana va draussdabei (Owagrofadoaf oda Hofstetn) oda va Frongafös is.

Im Netz

Commons: Frankenfels – Sammlung vo Buidl, Videos und Audiodateien

Website der Marktgemeinde
Eindrog iwa Frongafös in: Austria-Forum, dem östareichischen Wissnsnetz – online (auf AEIOU)
Gmoadatn vo Frongafös bei da Statistik Austria