Georg Ringsgwandl

Der Artikl is im Dialekt Reichahollarisch gschriem worn.

Da Ringsgwandl Schorsch, amtli Georg Ringsgwandl, (* 15. Novemba 1948 in da Staffabruck bei Reichahoi) is a boarischa Kardiologe, Kabarettist und Liadamocha.

Biografie Werkeln

Aufgwachsn is a in da Staffabruck, wo zu Reichahoi ghead. Sei Vatta war bei da Post. Musispuin hod a mid da Zitha ogfanga, de ra vo seina Tant gschenkd griagd hod.

Gitarrnspuin hod a se seibad beibrochd, weil a 1967 ocht Monat mit Tbc (Schwindsucht) im Sanatorium bleim hod miassn. Dodanoch hod a in Minga Medizin studiad und zum Dr. med. promoviad.

Noch da Zeid ois Assistenzarzt am Mingara Klinikum Großhadern is a a Zeidl af Amerika ganga. Nachand war a Oberarzt in da Kardiologie z Garmisch-Partnkircha. Nemher is a mid seim Kabarettprogramm duach Deitschland tourd und hod an Haffa Auszeichnunga eigsackld, unta andam an Deitschn Kleinkunstpreis.

Sei easchts eings Programm woa "Gurkenkönigs Hausfrauenshow", mid dem a 1978 af Tour ganga is. De Tourerei is dann mid weidane Programme so weida ganga, bis a 1993 sein Arztberuf komplett an Nogl ghengd hod und seitdem blos no ois Künstla tätig is.

De Besetzung vo seina Band hod se ollawei wieda gändad. Am längsdn und intensivsdn hod a am Ofang mid dem Gitarrnspuia Schreiner Schorsch (Georg Schreiner)) und am Keyboarda Reichart Klaus zammgarbad. A wichtiga Kolleg is aa da Nick Woodland, wo seit "Voglwuid" (offiziej: Vogelwild) ois Bluesgitarrnspuia dabei is.

Ned nur seine Liadln, sondan vor oim de Monologe zwischn de Songs bei de Livekonzerte san bei seine Fans gfrogd. Desweng san ab da CD "Der Gaudibursch vom Hindukusch" aa gsprochane Text zum hern.

Im Fernseng war a natirle aa ollawei wieda, z. B. in "Ottis Schlachthof", im "Scheibenwischer" und aa in da oa oda andan Talkshow.

Sei Musikstil setzd se aus Elemente vo da boarischn Voiksmusi und Rockmusi mid skurille und parodistische Elemente zsama.

Da Ringsgwandl lebd mid seina Frau, de Ärztin is, in da Näh vo Garmisch-Partnkircha.

Sei aktuejs Programm 2009 hoaßd "Untersendling".

Diskografie, Bühnastickl Werkeln

1986: Das Letzte
1989: Trulla! Trulla!
1991: I wui net Ski fahrn, aber i muaß (Single)
1992: Vogelwild
1993: Staffabruck
1995: Die Tankstelle der Verdammten (Münchna Kammerspui)
1996: Der Gaudibursch vom Hindukusch
1998: Ludwig II - Die volle Wahrheit (Münchna Kammerspui)
2001: Gache Wurzn
2004: Prominentenball (Boarischs Staatsschauspui)
2005: Alte Reißer – Verreckte Geschichten (live Conferencen)
2006: Der schärfste Gang
2009: Untersendling
2012: Der varreckte Hof ("Stubenoper")
2013: Mehr Glanz!
2016: Woanders

Schriftn Werkeln

Das Leben und Schlimmeres. Hilfreiche Geschichten. Rowohlt-Taschenbuch-Verlag, Reinbek bei Hamburg 2011, ISBN 978-3-499-62753-8 (ois Heabuach im Argon-Verlag, Berlin 2011, ISBN 978-3-8398-1089-7)

Dokumentarfuim Werkeln

Georg Ringsgwandl. Kasperl oder Genie. Portrait vo Ute Casper, Deitschland 2008

Auszeichnunga Werkeln

1987 Salzburger Stier
1988 Deutscher Kleinkunstpreis
1998 Ernst-Hoferichter-Preis
2001 Preis der deutschen Schallplattenkritik in da Sparte Chansons, Songs, Liedermacher
2005 Prix Pantheon Sonderpreis Reif & Bekloppt
2006 Bayerischer Kabarettpreis in da Rubrik Musik
2011 Bairische Sprachwurzel vom Förderverein Bairische Sprache und Dialekte e.V.
2017: Ruth (Musikpreis)
2017: Bayerischer Kulturpreis
2019: Rupertiwinkler Dialektpreis

Im Netz Werkeln

Commons: Georg Ringsgwandl – Sammlung vo Buidl, Videos und Audiodateien

Literatur von und über Georg Ringsgwandl im Katalog der Deutschen Nationalbibliothek
Am Ringsgwandl sei Hoamseitn
Kasperl oder Genie? Kabarettist!, Kurzportrait auf BR-Online
Georg Ringsgwandl, Portrait vo Radiospitzen (BR2)
Ich brauche freieren Wind um die Nase, Interview auf sueddeutsche.de vom 12. Juni 2009