Der Artikl is im Dialekt Stod-Soizburgisch gschriem worn.

A Grichtsbeziak, des is de Gengd, fir de wos a bestimmtes Gricht vom Ort her zuaständig is. Wauma vo an Grichtsbeziak redt, mant ma meistns de Gengd, fir de wos a Gricht in da niadrigstn Hierarchiestuafn vo da orntlichn Grichtsborkeid zuaständig is. Des warad in Östareich s'Beziaksgricht (davo gibts ois zsomm 141). In Bayern haßt so a Gricht Aumtsgricht, und davo gibts ois zsomm 72 im gonzn Freistoot. In Siidtiroi dageng gibts nur a anzigs orntlichs Gricht in Bozn, oiso is gaunz Siidtiroi sozusong da Grichtsbeziak Bozn.

Danem redt ma a maunkmoi vo Grichtsbeziake, womma de Zuaständigkeitsbereiche vo hechane Gricht mand. De san donn in da Regü fir de Grichtsbeziake vo mehrare Grichte vo da untan Stufn zuaständig.

In Östareich san aa Stuafn üwa de 141 Beziaksgrichte d'Londesgricht zuaständig, vo denan ois zaum 20 gibt, und nu a Stufn drüwa de vier Owalondesgrichte in Graz, Innschprugg, Linz und Wean. In Bayern gibts üwa de 72 Omtsgrichte nu 22 Londgrichte und drüwa de drei Owalondesgrichte in Bamberg, Minga und Niamberg.

Bei de owastn Grichte braucht ma ned extrig vo an Grichtsbeziak ren, wei de san eh oiwei firs gonze Land zuaständig. In Östareich redt ma desweng bsundas oft vo Grichtsbeziake, wei de gressan politischn Beziake af mehrane Grichtsbeziak (vom Beziaksgricht) afdeud san und ma donn de Grichtsbeziake ois Untateilung hernimmt.

De Regü, dss so Grichte oiwei nur fir eanan Grichtsbeziak zuständig san, güit owa ned oiwei. Im Prozessrecht gibts an Haufn Regün, wo a Onglengheid af a ondas Gricht üwadrong wern kau, oda aa, wos ma duad, wonns sunst gor kan inländischn Grichtsstond gawad.

Obocht, do steht a wichtiga Hiweis zu Rechtsthemen!