Kabarett
| Der Artikl is im Dialekt Niedaboarisch gschriem worn. |
Unta Kabarett vastähd ma in Bayern und anderswo a Kunstfoam, ba dea hoffndli gscheide Leit anderne zan Lacha bringan, aber eb'n ned bloß dadurch, dass an Schmarrn erzähl'n oda sonstwie dumm daherred'n, sondern indem dass eb'n gscheid daherredn. Ma muass aufpass'n, dass ma de Kabarettistn (so hoassd se oana, dea wo se in dera Kunstfoam betätigd) ned mit de Hanswurscht'n vawexld, de wo se ois "Comedians" bezeichna, wei des is nämli a himmlweidea Untaschied.
Heakunft
WerkelnHerkemma duad des Woat ogebli vo de Franzosn, bei dene a Schonkwirtschoft cabaret hoassd. Mid'm Adoptiern vo de franzesischn Weata ham ja insbesondere de Bayern no nia a Problem g'hod, und seitdem hoassd a Wirtschoft, in dea d'Leit ned bloß eana Bia, sondern aa eana anspruchsvolle, aba trotzem lustige Untahoitung kriagd ham, hoid Kabarett. So richtig ang'fangd hod des gonze in de zwanzga Joa in de groußn Städt wia: Berlin, Wean oda Minga, weil's mid'm End vo da Kaisazeid de Großkopfert'n endli eigseng ham, dass se de Leit an Mund einfach ned gern vabietn lossn. Und wia ma dann endli nimma ins Zuchthaus kemma is, bloß wei ma irgendan Minista recht derbleckd hod, san natiali de Kabaretts wia d'Schwammal ausm Bodn gschossn.
Zwoar hod sich des in am Zeidraum, dea wo, je noch Zeidrechnung, zwischn zwejf und tausnd Joa dauad hod, ois nochmoi g'ändad, owa danach is eascht richtig aufganga. De Alliiertn hams ziemli schnej kapiad, dass's grad mid'm Kabarett, voraus wenns von so gscheite Leit wia'm Dieter Hildebrand und'm Sammy Drechsel gmochd wead, vui dazua beidrong kinnan, dass da oide Mief aus de Köpf von de Leit aussakimmd.
Kabarett in Bayern
WerkelnBayern scheint fia de Kabarettist'n a recht a guads Pflasta zum sei, weil sunst gabs ned so vui davo, de wo obndrei aa no weid iwa die Grenz van Freistoot hinaus eanane Anhänga und eana Publikum findn. Etliche vo dee wirklichn Hochbuagn van Kabarett find'n se in Bayern, so beispuisweis as Lustspuihaus und die Lach- und Schiaßgsejschoft in Minga, owa aa's Scharfrichtahaus in Bossa, da wo Joa fia Joa des gleichnamige Beil valiehn wead. In Bayern gibds owa ned bloß boarische Kabarettist'n, sondern aa an ganz'n Haufa anderne, beispuisweis Frankn wia den Erwin Pelzig (Frank Markus Barwasser) oda den Urban Priol, ja sogar Tiakn wia den Django Asül (wobei ja grad dea af de Frog, wo ea eingdli heakimmd, oiwei "Hengersberg" sogd).
Derbleckn
WerkelnDass des Kabarett in Bayern so bliabd is, liegd meglichaweis a do dran, doss des Derbleckn vo de Großkopfert'n a longe Tradizion hod. Bis in de heiting Dog ghead jo aa da Stoakbiaostich af'm Nockherberg zu de Höhepunkte im boarischn Kiachnjoa, und des gonz gwiss ned bloß wenga dem guad'n Bia, sondern weils da de Politika anständig higrieb'n werd, wos's gonze Joa wieda ois ogstejd hom.