Kaisaschmoan

Da Kaisaschmoan is a estareichische Möschbais. Da Doag wiad aus Mö, Oa, Muich, Soiz und Zucka gmocht und in an Pfandl oda in am Dopf aussa bocha. Waun da Doag fest wiad, drahd ma des gaunze oamoi um, damids auf da aundan Sait a schee braun wiad und daun zaschdochad ma des gaunze mim Wenta in Dam-dicke Wuzl. Auf'n Disch kimmd da Kaisaschmoan maistns mid am Schdaubzucka driwa und am Opfimus, am Kombot odar an Zwetschgnresda dazua.

Wiaso Kaisa-Schmoan?

Es gibt zwoa Legendn wo hea da Naum fum Kaisaschmoan kimd. Ma woas ned wööche fu de zwoa woa is, oda am End filaicht sogoa koane schdimt. Auf jedn Foi hans intresant:

Da Kaisa Franz Josef soid amoi auf am Jogdausflug im Soizkaumaguad an Hoizhokaschmoan zum Essn griagt hom, ana Möschbais de doat gean gessn woan is. Wai owa so a oafochs Essn fia an Kaisa ned nowi gnua is, hod da Koch des gaunze mid guade Zuadodn wia Müch, Rosinen und Oa fafainat und ausn Hoizhokaschmoan is a Kaisaschmoan woan.
De aundane Legend sogt, das da Kaisa Fraunz Josef gean Möschbaisn wia Balatschinkn gessn hod. Waun owa seim Koch a Malea bassiad is, wia zum Baischbü das de Balatschinkn z'dik woan han oda zrissn han, daun hods Beasonal den "Kaisaschmoan" essn deafn, wai des fian Kaisa ned guad gnua gwen wa. ("Des wa a Schmoan, des in Kaisa seawian").

S'Woat Schmoan

s'Woat "Schmoan" hoast sunst im Boarischn so fü wia Bledsin, Glumpad, unedigs Zaig. Fu Estareich aus hod si des boarische Dialektwoat in seina kulinarischn Variantn auf an Haufn aundane Schbrochn ausbroat und sogoa auf Englisch, Franzesisch und Italienisch sogt ma "Kaiserschmarrn". Auf Russisch hoasts genau so, neta wiads in kirilische Bugschdom "Кайзершмаррн" gschrim.