Scherzl

Der Artikl is im Dialekt Obaboarisch gschriem worn.

Scherzl (dt. Kante) sogt ma zum easchtn und zum letztn Trumm vo am Loab Brod oda sunst am Lebensmittl in da Form vo am Loab, des wo ma nimma weida aufschnein ko (oda wui). Weis Scherzl da Oofang oda as Endstickl vom Loab is, hods an oana Seitn a komplette Rindn und ned nua wia de Scheim aus da Mittn a kloane Rindn am Rand. Des is des Resche an am Brodscherzl oda aa beim Lebakas, wos vui Leid aa so schmeckt. Andane mengs genau desweng gor ned. Bei am Kaasloab gibts aar a Scherzl, aba do is meistns a Haud umi, de wo ma ned essn ko und de wo ogschejd wean muaß.

a Brodscherzl

Da Nom Scherzl kummt vo italienischn Wort scorza, wos Rindn hoasst. Es gibt aa an Grund, warum es Scherzl an eignan Nama griagt hod. Friacha hods net jedn Tog a frisches Brod gem. Es is nua vo Zeid zu Zeid Brod bocha worn und da easchte Ooschnitt vom frischn, worma Brod wor desweng recht begehrt.