Nordmittlboarisch

Der Artikl is im Dialekt westlichs Nordboarisch gschriem worn.

Zo de nordmittlboarischn Dialekte ghejern dej, wou mittlboarische und nordboarische Lautaingschåftn hom.

Da Boarische Sprouchraum

Nordmittboarisch wird in da sidestlinga Owerpfålz und in nerdlinga Niderbayern gredt. D Dialekte in nerdlinga Owerbayern bis zo da Doana wern zwor immer nu zon Nordboarischn grechat, aa wal da Flus in westlinga Sprouchraum frejers a natirliche Grenz wor, ower durn flejsst haintzatoch schou stirker es Westmittlboarische von Sidn her a, drum kinna's tolwais praktisch zo de nordmittlboarischn grechat wern. Waiter in Ostn vo Bayern git's dean Vorstous von Mittlboarischn ins Nordboarische schou lenger.

Da nordmittlboarische Raum wird vo de Dialektologn min nordgauischen Fächer vabundn. Wem'ma Linien zejgt fir d Lautverenderunga zwischan Mittlboarischn undn Nordboarischn, nou krejgt'ma quase an Fecher. D Linien laffa in da Gechad vo Inglstod zåmma, und dej toln'se waiter in Ostn sugor Wort fir Wort af.

Lautliche Bsunderhaitn, dej wou's in dean Umfång weder in de nordboarischn Dialekte in Nordn, nu in de westmittboarischn Dialekte in Sidn git, han d Monodiphthongierung von boarischn "ai" zo "ää" und von boarischn "au" zo "aa" bis "åå". A waitere Monodiphthongierung kå'ma ba l-Kombinationa feststölln, wou'se de nordboarischn quase-grundetn Lautt mit da mittlboarischn l-Vokalisierung vamischn, und su "öi"/"öö" und "üi"/"üü" assakumma. Waiters es "ui" fir nordboarisch "ej", westmittlboarisch "ia" und ostwestmittlboarisch "oi".

Wortschozmasse hout da nordmittlboarische Raum Gmoansåmkaitn tolwais min Nordn, tolwais min Sidwestn, und tolweis min Sidostn vo Åltbayern.

Waitere lautliche und wortschozmassiche Bsunderhaitn hom de waldlerischn Dialekte in Owerpfölzer, Boarischn und Bejmerwold iwerhapps. Des hout ower niat speziöll wos min Nordmittlboarischn zon tou, sundern min Waldlerischn, und des zejgt'se von nordboarischn, iwern nordmittlboarischen bis zon mittlboarischn Raum.

Schau aa unter

• Boarische Dialekte im Vagleich
• Boarische Sprouch
• Wikipedia:Boarische Umschrift
• Boarische Grammatik
• Bsundaheitn im boarischn Vokabular

Quölln, Literatur und Weblinks

• Ludwig Zehetner: Bairisches Deutsch, Heinrich Hugendubel Verlag/edition vulpes, Kreuzlingen/München/Regensburg, 2005, ISBN 3980702871
• Manfred Renn, Werner König: Kleiner Bayerischer Sprachatlas, Deutscher Taschenbuch Verlag, München, 2006, ISBN 3423033282
• Ludwig Zehetner: Das bairische Dialektbuch, Verlag C.H.Beck, München, 1985, ISBN 3406305628
• Werner König: dtv-Atlas deutsche Sprache. Deutscher Taschenbuch Verlag, München, 2004, ISBN 3423030259
• DiWa Digitaler Wenker-Atlas