Der Artikl is im Dialekt Ostestareichisch gschriem worn.

De Ottakringer Brauerei is de letzte Großbrauarei in Wean, wos no gibt. Ma findts in Ottakring, im 16. Weana Hieb, im Westn vo da Stod. Is Ottakringer Bia is ane vo den bekauntaren Biamarkn in Estarreich.

Ottakringer Brauerei AG
Logo vo da Ottakringer Brauarei
Rechtsfoam Aktiengesellschaft
ISIN AT0000758032
Grindung 1838 (Braubewilligung 1837)
Siitz Wean (Ottakring), Estareich
Loatung Matthias Ortner (seit 2. Meaz 2015)[1]
Midorwata 129 (08/2013)[2]
Umsotz 83,2 Mio (2012)[2]
Branchn Brauerei
Hoamseitn ottakringerbrauerei.at
S oide Brauhaus vo Ottakringer
A Ottakringer Aktie aus 1905
Ottakringer Brauarei, 1938
Es Sudhaus vo da Ottakringer Brauarei

Gschicht Werkeln

De Ottakringer Brauarei is vom Müllermaasta Heinrich Plank anno 1838 untam Naum Planksche Brauerei aufgmocht wuan, nochdem doss de domolige Grundherrschoft,is Stift Klosterneiburg, eam 1837 de Braubewüllegung gebm hod.

Grindazeit Werkeln

Im Joa 1850 is da Betrieb vo zwaa Cousins iwanumma wuan, und zwoar in Ignaz und in Jakob Kuffner aus Lundnbuag in Mährn De Zwaa huam vuahea scho is duatige Brauhaus in Pocht ghobt. In dera Zeid is Ottakring grod eascht a sööbstständige Gmoa in Niedaestareich wuan, Wean hod si grod eascht bis zua Lina ausbraadt. De zwaa Kufners haum in Betrieb auf a Großbrauarei ausbaut. Innahoib vo 10 Jahren is da Ausstoß vo 18.318 hl auf 64.183 hl augstiegn. So wia aundare Großindustriölle aus dera Zeid – z. B. de Mautner Markhofs in Mariahüf – san de Kuffners aa ois Feadara vo eanara Gmoa auftredn. Da Ignaz hod im Preißisch-Estarreichischn Kriag anno 1866 a Spitoi fia varletzte Soidodna in Ottakring baut.[3] Wia daun da Kaisa in Obbruch vo da oidn Weana Stodmaua befoihn hod, is de Weanastod gräßa woan und de Grindazeid hod augfaungt. In dera Zeid is in Wean vüü neich baut wuan, de Stod is gwoxn und aa de Ottakringer Brauarei. Zweng dem hods an neichn Gärkölla und gräßare Loga braucht. So wia aundare eafoigreiche Untanehma aa, is im Joa 1878 da Ignaz Kuffner vom Kaisa in Odlsstaund eahobm wuan und hod jezn „von Kuffner“ ghaaßn.

De Stod wiad gräßa, Ausbau vo da Brauarei Werkeln

Da Moriz von Kuffner, da Bua vom Ignaz von Kuffner, hod im Joa 1882 die Brauareiaunteule vo sein Vodan und anno 1891 aa de vo sein Ongl Jakob, dea wos kaane Gschropm ghobt hod, geabt. Ea hod si s leistn kenna, doss a ob 1884 in Bau und in Betrieb vo da Kuffner-Steanwartn peckt. Ea woa 1869–1882 da Buagamaasta vo Ottakring, des wos owa seit 1890/1892 a Teu vo Wean is (duach de Stodeawaeiterung bis 1905). De Brauarei hod iahre Produktion vo iwa 170.000 hl umara 1890 auf iwa 350.000 hl im letzten Vuakriagsjoa gsteigat. De Mengan is in da gaunzn Zwischankriagszeid nimma gschofft wuan. Umma 1905 hod da Kuffner de Brauarei in a Aktiengsööschoft umgwaundl. In Easchtn Wöödkriag und de Zwischnkriagszeid hod de Firma gaunz guat dablosn, aa wauns wiatschoftlich net so aafoch woa, weu vüle Leid stia woan. In Kuffna haums 1919 is „von“ wieda wegga gnumma.

„Arisierung“ 1938 Werkeln

Im 1938ga Joa, wia Estarreich auns Großdeitsche Reich „augschlossn“ is wuan, hod ma n scho 85jahrign Kuffner zwunga, dass a sein Betrieb vakauft. De Brauarei is um 14 Mülleonan Schülling (des waratn heid so ciaka 36 Müo Eiro) aun an Gustav Harmer, an Spiritusfabrikantn aus Spüllan bei Stockarau gaunga.[3] Da Kuffner is im 1939ga Joa in Zürich im Exü gstuam. Da Harmer wiedarum is nochn Kriag fia zwaa Joa ausn Betrieb vatriem wuan. In de Joa 1949 und 1950 san de Eabm vom Moritz Kuffner vo da Famülie Harmer mid ciaka 11 Mülleonan Schülling obgfundn wuan.

Nochkriagszeit Werkeln

Nochn Kriag is de Brauarei zeascht amoi vo de Sowjets vawoited wuan, bevua doss de Famülie Harmer es gschofft hod, dass in rechtmäßign Eaweab vom Betrieb beweißt. Vo 1955 bis 1962 is da Biaaustoß vo 125.000 auf 236.000 Hektolita gsteigat wuan. Anno 1962 san da Dr. Gustav Harmer und sei Schwoga, da Wenkcheim Engelbert ins Untanehman eihgstiegn und haum zizalweis die Fiahrung vom Seniochef, in Gustav Harmer Senior iwanumma.[3] Im 1977ga Joa hod de Brauarei beitrogn, dass is estarreichische Biakartell gsprengt wiad, indem doss austredn is. Seit dem deaf si a jeda Wiat sööwa aussuachn, vo wööchana Brauarei ea is Bia haum mecht.

Teu vo an Dranglkonzern Werkeln

Im 1989ga Joa haum de Ottakringer neich entwigglte, greane Schuitafloschna eihgfiat und se de in Estarreich gnoamtn braunan Biafloschna gschengt.[4] 1991 is es äukfreie Ottakringer Null Komma Josef aufn Moakt kumma. A Joa spooda woas scho da Moaktfiahra in dem Segment. Da Dr. Gustav is im 1995ga Joa ois allaanicha Vuastaund vo da Brauarei ausgstiegn und Genaraldirekta vo da Harmer Holding mid de Markn Kapsreiter Bia und Grieskirchner Bier wuan. 1997 haums wiedarum wos Neichs prowiat und auf de 0,33l Aaweg-Floschna an Drehkoakn-Vaschluß auffegmocht, wos vuahea kaa estarreichische Brauarei net gmocht hod. Zwaa Joa spooda is es eißare Eascheinungsbüüd komplett neich iwaoawat wuan. Im 2000a Joa is da Siegfried menz da Vuastandsvuasitzande vo da Holding (noch ana Umstruktuariearung 2010 Ottakringer Getränke AG ghaaßn) wuan. De Christiane Wenckheim, de Dochta vom Engelbert Wenckheim is zum Vuastaund vo Ottakringer Brauarei AG bstööt wuan, de wos seid 2010 a Dochtafiama vo da Ottakringer Getränke AG is.[5] Im 2015a Joa is da Mathias Ortner da Vuastaund vo da Ottakringer Brauerei AG wuan. Da Christiane Wenckheim is da Vuasitz im Aufsichtsrod vo da AG iwatrogn wuan.[5]

Produktpalettn Werkeln

Is heitige Ottakringer Suatiment im Iwablick:

Ottakringer
  • Helles: Äuk: 5,2 % Vol. Staummwiazn: 12°
  • Wiener Original: Äuk: 5,3 % Vol. Staummwiazn: 12°
  • Wiener G'mischtes: Äuk: 5,1 % Vol. Staummwiazn: 11,8°
  • Citrus Radler: Äuk: 2,1 % Vol. Staummwiazn: 9,8°
  • Ottakringer XVI (Gastronomie): Äuk: 5,2 % Vol. Staummwiazn: 11,8°
  • Ottarocker (Exklusiv auf Musikfestivals und aundare Varaunstoitungan): Äuk: 5,0 % Vol. Staummwiazn: 11,3°
  • 16er-Blech: Äuk 5,4 % Vol.
Gold Fassl
  • Gold Fassl Spezial: Äuk: 5,6 % Vol. Staummwiazn: 12,7°
  • Gold Fassl Pils: Äuk: 4,6 % Vol. Staummwiazn: 11,2°
  • Gold Fassl Pur: Äuk: 5,2 % Vol. Staummwiazn: 11,8°
  • Gold Fassl Zwickl: Äuk: 5,2 % Vol. Staummwiazn: 12,2°
  • Gold Fassl Zwickl Rot: Äuk: 5,2 % Vol. Staummwiazn: 12,2°
  • Gold Fassl Dunkles: Äuk: 5,2 % Vol. Staummwiazn: 12,2°
  • Gold Fassl Bock: Äuk lt: 7,6 % Vol. Staummwiazn: 17,0
Null Komma Josef
  • Null Komma Josef: Äuk: 0,5 % Vol. Staummwiazn: 6,2°
Brauwerk
  • Hausmarke 1 Blond: Äuk: 5,4 % Vol. Staummwiazn: 12,5°
  • Hausmarke 2 Session IPA: Äuk: 4,3 % Vol. Staummwiazn: 10,5°
  • Hausmarke 3 Porter: Äuk: 5,0 % Vol. Staummwiazn: 13,4°
  • Hausmarke 4 Flanders Red: Äuk: 7,2 % Vol. Staummwiazn: 17,2°

Beleg Werkeln

  1. Meldung auf der Website der AG vom 2. März 2015. Archiviert vom Original [1] am 12. August 2016; abgerufen am 25. August 2016.
  2. 2,0 2,1 Ottakringer Brauerei AG: Zahlen & Fakten über die Brauerei. Abgerufen am 6. August 2013.
  3. 3,0 3,1 3,2 Geschichte der Ottakringer Brauerei. Archiviert vom Original [2] am 4. Septemba 2011; abgerufen am 25. August 2016.
  4. Brauereigeschichte mit Genehmigung von Michael Kranewitter auf brauereifuehrer.com
  5. 5,0 5,1 175 Jahre Hopfen-Saft aus Ottakring. Text vom 1. Oktober 2012 auf der Website der Wiener Tageszeitung Kurier.