Rudi Lochner

Der Artikl is im Dialekt Berchtsgoanarisch gschriem worn.

Rudi Lochner (*29. März 1953 in Berchtsgoan) is Spoatlehra unn wor a eafoijgreicha deitscha Bobfoara. Zamm mit Markus Zimmermann is ea im Zwoarabob Weijtmoasta sowia Olympiazwoata woan.

Begunna hot Rudi Lochner 1982 oijs Bremsa im Vierabob vo Peter Hell (deitscha Vizemoasta). 1985 hot ea de Position gwechseijt unn is oijs Steiamo zamma mit seim Bremsa Markus Zimmermann Viata bei de deitschn Moastaschoften, 1989 Vizemoasta, 1990 schließli zum easchtn Moij deitscha Moasta - sowoij im Zwoarabob oijs aa im Viarabob woan.

1991 in Altenberg hot Lochner zamm mit Markus Zimmermann an Weijtmoastatitl im Zwoarabob earunga. Bei de Olympischn Wintaspuij 1992 in Albertville homs nua knopp Goijd vapasst unn im Zwoarabob de Suijbamedaijn gwunna. Bei dea wegan da Umsteijung ausnohmsweis scho zwoa Joa drauf foijgandn Olympiade in Lillehammer (Norwegen) hot des Team no mehra Pech ghot, hot nua knopp de Bronsmedaij vapasst unn stottdessn an undonkboan viatn Plotz blegt.