Sacher-Tuatn
| Der Artikl is im Dialekt Weanarisch gschriem worn. |
De Sacher-Tuatn (hochdeitsch: Sacher-Torte) is a Schokotuatn mit Marünmarmelad ois Füllung und ana Schokladglasua. De Sacher-Tuatn is a wödweit bekaunte Spezialität vo da Weana Kuchl.
Gschicht
WerkelnVualaifa vo da Sacher-Tuatn gibts scho im 18. Joahundat, zum Beispü 1718 im Kochbiachl vom Conrad Hagger.
De eigentliche Gschicht vo da Sacher-Tuatn beginnt owa 1832 am Hof vom Fiast Metternich, wo da Fiast sei Hofkuchl damit beauftrogt hod, fia seine erlauchtn Gäst a gaunz bsundare Möhspeis zum dafindn. „Dass er mir owa ka Schand’ macht, heit Omd!“ soi ea aungeblich gsogt hom. Owa wäu da Chefkoch krank wuan is, hod da Lehrling de Aufgob iwanehman miassn. Dea Lehrling, im zweitn Lehrjoa, is grod amoi 16 Joa oit gwesn und hod Sacher Franzl (1816-1907) ghaßn. Obwoi de Tuatn denan hochn Herrschoftn aunscheinend gschmeckt hod, is de "Erfindung" ned weida beocht wuan.
Da Sacher Franzl is daun noch seine Lehr- und Waundajoah, de eam noch Pressburg und Budapest gfiaht hom, wieda noch Wean zruckkumman und hod do an Feinkostlodn und a Weinhaundlung aufgmocht.
Sei ötasta Sohn Eduard (1843-1892) hod beim k.u.k. Hofzuckabäcka Demel sei Ausbüüdung absolviat und hod in dera Zeit de Sacher-Tuatn zu eanara heitign Fuam weida entwicklt. De Sacher-Tuatn is vo do aun im Demel aunbotn wuan und kuaze Zeit drauf aa im Hotöö Sacher, des wos vum Eduard Sacher 1876 grindt woan is. Seitdem güüt de Tuatn ois ane vo de berihmtestn kulinarischn Spezialitätn vo Wean.
Zweng dera Entstehungsgschicht is ob 1938 zu joarelaungan juristischn Streidarein um de Rechte aun da Sacher-Tuatn zwischn da Zuckabäckarei Demel und n Hotöö Sacher kumman. Eascht 1963 is a außagrichtliche Einigung dazüüt wuan: Da Nauman „Original Sacher-Torte“ is dem Hotöö Sacher zuagstaundn wuan, und da Demel hod danoch in Nauman „Eduard Sacher-Torte“ vawendn diafn.
Untaschied
WerkelnHeit haßt de Demel Tuatn „Demel's Sachertorte“ und im Weana Voiksmund „Echte Sacher-Tuatn“; im Demel is de Tuatn zua Markn wuan. Dazua kummt, dass de Demel Tuatn no in Haundorwat gmocht wiad. A offnsichtlicha Untaschied liegt aa in da Marmeladschicht. De „Original Sacher-Tuatn“ hod zwaa Schichtn, de „Echte Sacher-Tuatn“ nua ane, und zwoa untahoib vo da Kuvertüre.
Schau aa
WerkelnIm Netz
Werkeln
Commons: Sacher-Tuatn – Oibum mit Buidl, Videos und Audiodateien- Original Sacher-Tuatn
- ORF Wien - De Sacher-Tuatn feiat 175. Jubiläum (Seite nicht mehr abrufbar; Suche in Webarchiven)
- Is Sachertorte the Ultimate Devotion? The Chocolate Cake Church (Religionsparodie)