Schleich di, du Oaschloch!

Schleich di, du Oaschloch! (dt.: Verpiss dich, du Arschloch!, en: Piss off, asshole!) is a Spruch, dea in da bairischen Mundartn gred wert, dea schon laung besteht aba mitn Terroraunschlog in Wean aum 02.11.2020 groß wuan is und danoch im Netz ausbraadt hod. Es soi a direkte Reaktion aufn Terroristn söwa sei. Da Spruch steht owar aa fia n Zsaummanhoit und in Muat vo de Weana aa in schwiarige Zeitn trotz olla Grantlarei. Ea is des Weana Gegnstickl auf Je suis Charlie.

Uasprung

Aum 2. Novemba 2020 is a islamistischa Terrorist duach de Weana Innanstodt grennd und hod mid ana Maschinanpuffn umanaunda gschossn. Ea hod dabei via Leid umbrocht und 23 valetzt. Während sein Auszucka is a vo etliche Leid aa midn Handy gfümt wuan. Auf aan so an Füm heat ma aungeblich, wiar a Weana, mittn in da gräßtn Gfoah, im Terroristn "Schleich di, du Oaschloch" ausm Fensta nocheplärrt. Ob dea Ausspruch in Echt a so gfoin is, waaß ma owa net gwieß. Sicha is aungeblich nuar is Wuat Oaschloch. Es kaun sogoa sei, doss dea Ausspruch in dera Situazion goa nia a so gfoin is.

Wuascht ob woah oda foisch, da Spruch hod si kuaz drauf rasant im Netzt ausbraadt untam Hashtag #SchleichDiDuOaschloch. Mittlaweule gibt’s Leiwal und Aunsteckknepf mid n Spruch. Ma hod sogoa a Browser-Eaweitarung gschriem, de wos in Naum vom Terroristn duach "Oaschloch" easetzt. Wean hod mid dem Spruch wos ähnlichs gschofft wia Paris mid Je suis Charlie.

Tiafare Bedeitung

Genaröö wiad da Spruch ois Ausdruck vom Weana Schmäh gseng, wiar a aa in de Feansee-Serian Kottan ermittelt oda Ein echter Wiener geht nicht unter kuitiviat wiad. Auf dar aan Seitn druckt a in Zuan aus, dea wos duach des Vabrechn aufkummt. Duach di Aunwendung vom Weanarischn schofft ar aa a Gfüh vom Zsaummanhoit vo da Weanastod. Auf dar aundan Seitn reduziad a in Vabrecha auf a klaans, unwichtigs Wiaschtl, des wos a in Wiaklichkeid is.

Im Netz

• Der Standard: Das Gefühl einer Stadt: "Schleich di, du Oaschloch!" Wie der sich viral verbreitende Spruch zum Symbol des Zusammenhalts von Wien wurde. Karl Fluch, 4. November 2020
• News: Was steckt dahinter? Terror in Wien: "Schleich di, du Oaschloch!" Ann Kathrin Hermes, 4. November 2020
• Salzburger Nachrichten: "Schleich di, du Oaschloch!": So trotzt Wien dem Terrorismus. Stephanie Rausch, 4. November 2020
• Leadersnet: "Schleich di, du Oaschloch": Vom Hashtag, der zur Ideologie wurde.