Studentnfuada

Der Artikl is im Dialekt Reichahollarisch gschriem worn.

Studentnfuada is a Mischung aus Weinberl und vaschiadne ganze Nussn, moastns Hoslnuss, Cashewkeandln, Erdnuss, Paranuss, Woinuss un Mandln. Es wead moastns in am Plastiksackal vakafft und oafoch mid da Hand gessn.

Da Nam Studentnfuada kimmt dohea, dass oam des Zeigl beim Denga hejfa soi. Monche moanan sogor, dass' intelligenta machad. Und des ko ma ois Student jo ollawei braucha.

In da Realitet iss oafach aso, doss da Traummzucka in de Weinberl und de Mineralien vom Kärpa schnej afgnumma wern, und de Niss mid eanam Eisn und de Omega-3-Fettseiren nachand mid ra längafristing Wiakung nochleng. Insgsomt soagt des fira schnälle, oohoitnde Leistungssteigarung, ohne doss da Keapa vo zvui Vadaungsarbat belost werad. Wia hoaßts ned so schee: «A volla Bauch studiad ned gean.»

No a praktische Eingschoft vo dem Fuada is, doss mas wärndm Läsn gloaweis einefuadan ko. Des rentiad se vor oim, wann ma voram Examen koa Zeid hod, se wos gscheids zum kocha. Und wei ma dabei de Biacha nedaso schnej dreckad mocht wia mid Gfreapizza.