Toppmkorsee

Der Artikl is im Dialekt Pongaurisch gschriem worn.

Da Toppmkorsee, oder aa Touppmkoursee, (Hochdeitsch: Tappenkarsee) is a gresserner Gebiagssee auf'm Gebit vo da Gmoa Kloaourl, im Pognau, Soizburga Lond in de Rodstouder Tauern auf za. 1.762 m Seeheechn. Er weascht duachn Kloaourlbouch mid Frischwossa vasorgt und bsitzt a hervurrougande Wossaqualität.

Toppmkorsee Tappenkarsee
D' Loug vom Toppmkorsee im Soizburga Lond D' Loug vom Toppmkorsee im Soizburga Lond
Oigmoahs
Geógraafische Láug: Soizburg Áufliss: Kloaourler Bouch
Daaten
Hächen iwern Meeresspiagel:	1762
Flächen:	0.38
Seeléng:	3
Seebreaden:	0.4
Vólumen:	120000000
Durchschnidtliche Diaffen:	100

Wondarungan

Da Toppmkorsee is a beliabts Gebit fir Wonderungan, Bergturn und Schiturn. Am oafochstn daraichbour is da See iwer Kloaourl und em Jaagersee. Wondarer glongan mi'm Bus oder Auto bis zan Parkbloutz Schwooboim. Bai ner etwoa zwoastinding Wondarung wern ebber 700 Hächnmeeter iwerwundn, bis da Toppmkorsee dagloung weascht und se as herrliche See- und Bergpanorama daeffnat. Im Summer gibs am See zwoa bewirtschoftate Hittna, de Toppmkorseeoim direkt am Seeuafer und za. a hoibstindige Wondarung waider d' Toppmkorseehittn, de an etler Meter owerhoib vom See ligg und auf dera ma aa iwernouchtn ko. De Zwoo-Seen-Wondarung vom Jaagersee bis zan Toppmkorsee is vuaoim ba Familien mid Kinder beliab. Vom Toppmkorsee auf daeffnand se waiderne Turnmeeglichkaitn fir Bergstaiger.

Weng seiner hervurrogandn Wossaqualität und da doudamid vabundanen Aignung ois Fischgwässer, hom se beraits de Soizburga Firschterzbischef d' Fisch vom Toppmkorsee und vom Jaagersee bringa lossn, um eanare Gäst doudamid zan bewirschtn.

D' Saaga vom „Tatzlwurm“

Auf'm Toppmkor, am Berg im Kloaourlertoi ligt a sumpfige Berglaa, s Wurmfejd gnonnt. Dou hod oast amoi a grosser Lindwurm (da Tatzlwurm) gleeb, der unter de Vicherherdn vij Unhoae ogrichtt houd. De Kloaourler Wijd- und Fischliafarantn vom Soizburga Erschzbischof homd a Kuahaut mid Moos ausgstopft, dasss ner Kua änlich gschaut houd und homd an da Stej vom Moong a Packai Zindpuifer aiche do. Den Keeder homds ouft donn in See aiche ghaut und es houd nid long daueascht bis da Tatzlwurm de Kua dagneisst houd. Er houd se glai auf'm Keeder zuachegstirzt und houd de Kua vaschlungan, ois wia wonns ebber gour a kloana Goowebissn gwesn warad. Oisdonn houd se d' Wirkung vom Zindpuifer gejtad gmocht und a Explosion houds Ungehaier umbroucht und Bevejkarung is vo ner grossn Sorg befrait woun.

In ner ondern Version vo da Saaga houd da Tatzlwurm oierdings nid za da Gänzn vanichtt wern kenna. Es hoasst, er houd se decht glai in d' Tiafm vom See zruckezong und durchs Entwischn vom Wurm is no mera Unhoae vabundn. De Foing richtn se schliasslich geeng d' Toibewooner, wai da Tatzlwurm unoulässig an da Fejswond noug bis de durchebricht, s Wossa schliasslich Toiweaschts rinnt und as Kloaourlertoi waidhi iwerschwemmt weascht.

In ner kindergrechtn und weniger bluadrinsting Version weascht vom „Tatzlwurmbaby im Toppmkorsee“ berichtt, des oschauschaich is und se netta kurschz und sejtn an da Wossaowerflächn zoag. As Tatzlwurmbaby soid dunke (dunkebrau bis schworschz) sei und an blaun zacktn Komm am Ruckn troung.

Weiderne Informaziona findst aa noh unter: Portoi Pongau