Thermoblast

Thermoblastn (offiziej: Thermoplast) (vo thermos=warm und plasso=buidn) hoasst ma aa Plastomeare. Es san Kunststoffe de wo si bei a bstimmtn Temparatua vafoama lossn. Se lossn si wieda aufschmejzn und aa vaarbatn, und andas ois Duromer und Elastomer ko mas desweng aa schwoaßn.

Aufbau

Aufbaut san de meisdn Thermoblastn aus Koinwossastoffkettn. De wean üba schwoche pysikalische Kräft zammghoidn, es gibt koane kemischn Vabindunga zwischn de Kettn. Je nachada doss de zamm san desto gressa san de Kreft.

Oadnungszuastend

Ma undscheid zwoa Oadnungszuastend in Thermoblastn. De kinnan aloa oda awa newarand in oam Kunststoff voakema.

Vo amoaph red ma, wann de Molekui ungoadnet beiananda lieng. Des ko ma si voastoin wia a Seia voi mid kochde Spaghetti, es gibt koa Oadnung. Kunststoff de wo rein amorph san hom a boar bsundane Eignschoftn:

• Glosklar
• Hom koan Schmejzpunkt, ma red vo a Glostemparatua
• Dean voa ollam in da Weam unda Krofteiwiakung kriacha

Beischbui fia nua amoaphe Kunststoff san: Plexiglos, Polystyroi, PVC

Kristallin is a Zuastand, dens aloa in am Kunststoff ned gem duad, desweng sogt ma teilkristallin.

Es gibt in soiche Kunststoff kristalline und amoaphe Bereiche. Da Kristallinitädsgrod ko dabei sehr undaschiedli sei. Dea hengt unda andam ob vo:

• Dem Matrioi seiba
• Da Gschicht, oiso wia mas vaarbat und nochbhandln duad
• Ob Zuasätz drin san, de wo a Wochstum vo de Kristalle föadad oda aa ned zualosst.

De Kristalle kennan je noch Matrioi gonz vaschiedane Foamen hom. Oafoch ko ma si de aa wieda voastejn wia Spaghetti. Desmoi awa wanns nu ned kochd und im Backl san: schee eng zamm und olle in oana Richdung.

Bsundane Eignschoftn vo teilkristalline Kunststoff:

• Muichig-driab
• Es gibt a Glostemparatua (bei dea de amoaphn Bereiche woach wean) und dazua a hechane Schmejztemparatua
• San fesda und kriacha weniga wia amorphe Kunststoff
• Hom hechane Gebrauchstemparatuan

Beischbui fia teilkristalline Kunststoff san: PE, PP, PET

Wieda heanema

A modeans Woat dafia is aa Recycling. Noch da Theorie kannt ma Thermoblastn oiwa wieda aufschmejzn. Awa wei bei da Weam de Moleküle scho obbaut wean und dabei in kiazane Stickal dabrecha, geht des mid echte Materialien bloß a boar Moi. Jedsmoi wann mas wieda aufschmejzt und vaarbat, vaändan si domit de Eignschoftn vo dem Material.

Fia monche Sachan ko ma soiche Materialien mit schlechtane Eignschoftn aba scho no heanemma.

Wega dem houchn Brennwert vo Kunststoffe steht am End vom Lem vo am Kunststoffteil am bessan de theamische Vaweatung, ma vahoazts. Da Brennwert liegt je noch Kunststoff so umara wia bei a Braunkoin. Wann mas hoaß gnua vabrennt und a guade Filteranlog hod, na iss aa a recht saubane Sach. Wann ma si de Grundbaustoana vo am thermoblastischn Kunststoff oschaugt, is des oft nix andas wia a Koinstoff und a Wossastoff. Wann mas voiständig vabrennt und mit Sauastoff umsetzt, bleibt bloß a Koindioxyd und a Wossa üwa.