Der Bulle von Tölz: Das Amigo-Komplott
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Das Amigo-Komplott |
| Produktionsland | Deitschland |
| Originalsproch | Deitsch/Boarisch |
| Läng | 91 Minutn |
| Oitasfreigob | FSK 12 |
| Einordnung | Staffel 1, Foig 1 1. Foig insgesamt |
| Easchdausstrohlung | 14. Jenna 1996 auf Sat.1 |
| Stab | |
| Regie | Walter Bannert |
| Drahbuach | Claus Peter Hant |
| Produktion | Ernst von Theumer junior |
| Musi | Kristian Schultze |
| Kamera | Hanuš Polak |
| Schnitt | Ingrid Träutlein-Peer |
| Bsetzung | |
| |
Das Amigo-Komplott is a deitscha Feansehfuim van Walter Bannert ausm Joar 1996 noch on Drahbuach van Claus Peter Hant. Es is de easchte Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 14. Jenna 1996 af Sat.1 ausgstroid worn.
Handlung
WerkelnDa Chef van Wossawiatschoftsamt, Franz Dechansreiter, wead im Dampfbad van „Bäderkönig“ Dr. Fink tod afgfundn. Ois Todesursoch wead a Heazschlog ognumma; olladings hod da Dechansreiter a Handverletzung, de wo draf schliaßn losst, doss ea probiat hod, de Tia afzmocha. Da Kommissar Benno Berghammer kennt an Todn sei Frau vo friara und ibabringt ia de traurige Nochricht. De Apothekarin Andrea Dechansreiter reagiat gfosst und sogt, doss eanare Scheidung kuaz bevorgstandn hod. Do hearns a Schiaßarei aus da Wohnung van Todn. Wias nochschaung, is koana mehr zun Seng, oba de Wohnung is vawiast worn. Da Kommissar findt a Projektil, des wo si ois Eigenbau fia an Colt vo 1850 außastejt.
Da Benno Berghammer kriagt a neie Kollegin: de Berlina Hauptkommissarin Sabrina Lorenz. Dmid de Preißin Land und Leit kennaleant, nimmt eas glei mid af Eamittlungstour.
Im Bluad van Todn wean Spuan vo Hexagen gfundn, a Substanz, de wo zgleich desinfiziat und betäubt. Ob 50 °C vadampfts und fiaht, konzentriat eigschnauft, zun Kroaslafvasong, eascht recht in ara Sauna oda on Dampfbad. Da Benno Berghammer nimmt as Flaschl Hexagen mid, des wo im Bad gfunden worn is.
De Andrea Dechansreiter sogt, doss ia Mo sanft wia ra Lampal woar, oba da Kommissar findt außa, doss da Dechansreiter doh Feind ghobt hod, drunta a ganze Menge Bauan, de wo er mid an Oschluss an de effentliche Trinkwossavasorgung zwangsbeglickn woit. Ban Wossawiatschoftsamt grodn de zwoa Kriminala in a Bauandemo und eafoarn, doss vui Brunna koa Wossa neamma heagem, wei wega an neien Bad van Bäderkönig Fink da Grundwossaspiagl obgsunka is. Fia de Bauan is ganz kloar da Dechansreiter dro schuid, wei er as Projekt ois unbedenkli eigstuft hod. De Untalong dazua kriagn de Kommissar van Dechansreiter seina Sekretärin, oba as geologische Guatachten is vaschwundn, aa de Kopie davo. Die Befrogung van Prälatn Hinter, dea wo fia de Kiachn a Grundstick an Dr. Fink vakafft hod, bringt de Ermittlungan aa ned weida.
Vo ara Mitorbatarin im Bad kriagt da Berghammer gsogt, doss da Dechansreiter de Masseurin Mahima Sanlong efta gschlong hod. De hod eam vor fimf Joar z Hongkong kenna und liam gleant. Warum ea se gschlong hod, woaß de Mahima Sanlong aa ned. Valossn hods eam ned kenna, wei da Dechansreiter ois zoit hod und wei se a Orbatsealaubnis braucht, de wo se bloß iban Dr. Fink kriagt. Wia’s jetzad ohne ian Sponsor weidageh soi, woaß de Masseurin ned.
Af an Foto ausm Dechansreiter seina Wohnung, afgnumma z Hongkong, siagt ma fimf Persona: Prälat Hinter, Landrod Siegfried Wallner, Dr. Fink, Franz Dechansreiter und Mahima Sanlong. Wei da Landrod Wallner am ehestn ois Täta in Frog kimmt, foarn de Kriminala zu eam. Der is middn im Woikampf, hod oba grod a weng Zeit. Ea gibt zua, doss de Roas noch Hongkong van Dr. Fink zoid worn is, sogt oba, doss sei positive Entscheidung iba de Genehmigung van Bad nix damit z doa ghobt hod.
A Klostafrau vazejhd im Kommissariat, doss an Unbekanntn dawischt hod, wia ea in de Papiere van Prälatn Hinter gstebad hod. Da Benno Berghammer probiat ohne Eafoig, noch iara Bschreibung a Fantombuidl zmocha. Wia de Sabrina Lorenz an Bauan Toni Göbel zoachnd, an Wortfiahra vo da Demo, triffts ins Schwoarze. De Klostaschwesta sogt, doss da Diab bei de Vaträg woar, wo mindestens fimf Joar zrucklieng.
Ban Toni Göbel findn de Kriminala an Colt, dea wo in dem Dechansreiter seina Wohnung obgfeiat worn is, und no mehra Handfeiawoffn; do kimmt da Besitza grod af sein Roß ogrittn. Ea nennt sei im Umbau befindlichs Owesn „Westerntown“. Ea is ogfressn, wei da Landrod Wallner eam de Genehmigung vaweigat. Zerscht streit er an Eibruch ban Prälatn Hinter und de Vawiastung vo an Dechansreiter seina Wohnung ob, oba wia da Benno Berghammer eam vaspricht, doss ea fia a Gständnis de Woffn bhoidn deaf, gibt ea de Schiaßarei zua. De Kommissar eafoarn van Göbel, doss da Prälat as Grundstick weid unta Preis on an Dr. Fink vakafft hod. Se konfrontian an Fink mit de Faktn, oba dea weist olle Vorwiaf zruck; do nehmans olle Gschäftsunterlong mid. Ban Duachschaung findt de Sabrina Lorenz zwoa Ibaweisunga vo je oana Million Mark af Kontn z Luxemburg. De Empfänga san da Prälat Hinter und da Dechansreiter; dem sei Witwe eabt jetzad oa Million Mark plus Zinsn. Af ian neien Reichtum ogsprocha, sogt de Dechansreiterin, doss scho oiwei as Gejd vo iam Mo vawoitet und aus dera oan Million dawei zwoa gmocht hod. Im Foi vo ara Scheidung häddns as Gejd teit. Es soi oba eh da „Tagesstätte für krebskranke Kinder“ fian Neiafbau zuakemma.
Da Landrod Wallner bsuacht de Resi Berghammer in iara Pension und sogt, se soi af ian Sohn eiwirka, doss dea de Gschäftsuntalong an Fink zruckgibt. Wei da Kommissar si ned draf eilosst, kimmt oana van Gewerbeaufsichtsamt, dea wo feststejt, doss de Zimma 10 cm z niedrig san.
Af ara Woiveranstoitung vazejhd da Toni Göbel an Kommissar, doss ea dahoam a Schreim van Wallner an Bauunternehma Schwarz hod, wo z lesn is, wem de Firma wiakli gheard. Aus da Hond gem wui ea an Briaf ned, oba an Blick neiwerfa deafad ea scho. Da intressiate Benno Berghammer mocht a Treffa mit an Bauan fian nächstn Dog umara zwejfe in an Gosthaus aus, oba dea Termin plotzt, wei da Göbel dawei an Briaf an Wallner ibagem und dafia im Eilvafoarn de Bewilligung fia „Westerntown“ kriagt hod.
Da Benno Berghammer eainnat si dro, doss ea bei ara Befrogung a Foto vo da Mahima Sanlong iam Bruada gsehng hod, dea wo a Loch im Heaz hod und demnächst operiat wean soi. In da Klinik eafoart da Kommissar vo ara Kranknschwesta, doss de Sanlong an Eigriff sejba zoid. Wia des geh soi, wead eam kloar, wia ra af da Station de Mahima Sanlong und de Andrea Dechansreiter zammad siagt, de wo gonz oadeiti midanand befreindet san. De Dechansreiterin vazejhd eam, doss aa se sejba vo iam Mo wia Dreck behandelt worn is.
Wia d’Resi Berghammer an Benno am Telefon sogt, doss iara de Betriebsbewilligung entzong hom, is ea saua und wui an Landrod festnehma lossn, oba sei Kollegin hoid dageng, doss’s gegan Wallner koan oanzign Beweis ned gibt. Kuaz draf ruaft de Berghammerin no amoi o und losst iam Buam ausrichtn, doss Heaztropfn braucht. Im easchtn Moment wead ea wieda narrisch, wei ea de Tropfn fia unnedi hoid, oba donn hoda af amoi a Eigebung und geht zua Apothekn vo da Dechansreiterin. Dera zoagt ea as Flaschl Hexagen und frogt, ob se so wos bsorgn kannt. Se sogt, des miassad ma bstejn. In de Gschäftsuntalong vo da Apothekn steht, doss in letzta Zeit nua de Mahima Sanlong Hexagen kaft hod; oiso geht da Kommissar no amoi in d’Klinik. De Sanlong gibt an Moard zua, oba da Berghammer wui mit da Festnahme woartn, bis da Bruada operiert worn is. Do kimmt de Andrea Dechansreiter dazua und sogt, doss gwisst hod, doss’s so weid kemma wead. Oiso nimmt da Kommissar se wega Beihuif zun Moard aa fest.
De Resi Berghammer und de Sabrina Lorenz hom dawei außagfundn, doss de Pension wega'n Denkmoischutz ned gschlossn wean deaf. Jetzad fiachtn de Kriminala oba, doss de „Amigos“ Landrod Wallner, Prälat Hinter und Bäderkönig Fink ungschorn davokemman. Dmid des ned passiat, sammeln da Berghammer und de Lorenz bei eana siemnstellige Spenden fia de „Tagesstätte für krebskranke Kinder“.
Hintagrund
WerkelnGfuimt worn is z Däiz und im Klosta Schäftlarn;[1] ois Schaublotz fia de „Pension Resi“ homs as Hollerhaus Irschnhausn heagnumma.
Kritik
WerkelnDe Programmzeitschrift TV Spielfilm schreibt: „Der Krimi beleuchtet kritisch die politische Provinz.“[2]
Im Netz
Werkeln- Das Amigo-Komplott in der Internet Movie Database (englisch)
- Das Amigo-Komplott bei Fernsehserien.de
Beleg
Werkeln- ↑ Das Amigo-Komplott – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Das Amigo-Komplott – Filmkritik bei TV Spielfilm
| Vorherige Foig – |
Episodnlistn | Nächste Foig 21. Jenna 1996: Tod im Internat |