Enotna Lista

Der Artikl is im Dialekt Owaöstareichisch gschriem worn.

D'Enotna Lista (haaßt „Einheitslistn“, Obküazung: EL) is, so ia Söibstbeschreiwung, d'Einheitspartei vu de Käantna Slowenen. Seit 2003 is da Voasitznde vu da EL da Vladimir Smrtnik. D'EL is 1991 aus'm Klub vu de slowenischn Gemeinderäte entstaundn, dea wieda 1973 entstaundn is, wia si vaschiedene slowenische Gemeinderotsfrakzionen zsaummgschlossn hom. Seit 1950 schau kandidian slowenische Listn rögimäßig auf da Gemeindeebne. Aa deitschsprochige Ned-Slowenen kinan bei da EL Mitgliad sei und midoawatn. Da Sitz vu da EL, de in 24 Gemeindeoaganisazionen untateud is, is in Klongfuat.

Gemeinderotswoiheagebnisse vu da Enotna Lista im Joah 2003

Da Aunteu vu Käantna Slowenen aun da Käantna Bevöikarung reicht ned fia a Grundmandat, des ma zum Einzug in'dn Laundtog brauchd. Im zwoasproching Gebiet is d'EL owa in vüi Gemeinderäte vatretn, momentan stöids 47 Gemeinderotsmidgliada. In maunche Gemeindn gibts eigene Listn, de owa unta da EL vaeint san. In Globasnitz und in Zöi stöid d'EL in Vizebuagamoasta und in Bleiberg an Stodrot. Duach Kooparazionen mid de Grean und mi'm LIF woa d'EL vu 1986 bis 1999 im Nazionalrot vatretn; 2008 bei da Woih haums s'LIF untastützd, bei dem da Voiksgruppmvatreta Rudolf Vouk da Käantna Spitznkandidat woa, s'LIF hods owa ned ins Parlament gschofft.

2009 hod d'EL zum easchtn Moi a Büagamoastawoih gwuna: In Bod Eisnkoppi hod da Josef Smrtnik vu da EL d'Stichwoih geng an SPÖ-Kandidatn mid 50,4 % fia si entscheidn kina. Da Smrtnik is damid da easchte Büagamoasta in da Nochkriagszeid, dea vu ana slowenischn Listn gstöid wiad.

D'EL oawat eng mid de Südkärntna Bauan (Skupnost južnokoroških kmetov) zsaumm, de bei da Laundwiatschoftskaummerwoih 2006 7,4 % vu de Stimmen gschofft hod und so zwoa Mandate kriagt hod.

Seid 2006 is d'Enotna Lista a Voimitgliad vu da Eiropäischn Frein Allianz.

Im Netz

• Webauftritt vu da EL