Föikirchn an da Doana

Föikirchn an da Doana (aumtlich: Feldkirchen an der Donau) is a Moaktgmoa in Owaöstareich, genaua gsogd im Mühviadl, und do wieda im Beziak Urfahr-Umgewung. Da Grichtsbeziak is aa Urfahr-Umgewung. Wohnan duan in Föikirchn 5337 Leit (Stond: 2017). Bsondas bekonnt sand de Föikirchna Bodeseen, des is a Erholungsgebiet fia an Haufn Leit aus da gonzn Umgewung, sogor aus Linz kemmans her zan Plantschn.

Geografie

Föikirchn liegd auf 268 Meta üwan Meer. Wia a da Nom scho sogt, iss direkt an da Doana, auf da neadlichn, oiso linkn Saitn, uma 25 Kilometa im Westn vo Linz. Die Nordhöiftn vo da Gemeinde ghert geologisch zur Behmischn Massn, des sand oiso lauta steule Hügün, dafir iss in da Südhöiftn total floch, der Teu ghert nämli zum Efadinga Beckn, oiso zan Oipnvorlond. Vo Nordn noch Südn sands 8,5 Kilometa und vo Westn noch Ostn 7,4. Insgesomt hod Föikirchn a Flächn vo 39,4 Quadratkilometa.

Vo dera Gesomtflächn sand 59 Prozent Landwiatschoft, oiso Wiesn und Föida (desweng a da Nam "Föikirchn"). 22 Prozent san Woid (vor oim im Nordteu), siem Prozent Gartln, sechs Prozent mocht s'Wossa aus, oiso d'Doana, da Pesnboch und de Bodeseen vor oim, und netta auf oan Prozent vo da gonzn Flächn sand Haisa oda Stroßn oda so wos.

Gmoana

Föikirchn is extrem zasiedüd, des haßt, es gibt an Haufn klane Ortschoftn, und da Ortskern söwa is ned wirkli machti. Insgesomt gibts in Föikirchn an da Doana 24 Ortschoftn, und zwor:

Ach
Au
Audorf
Berghom
Föikircha
Freinstoa
Gerling
Hofhom

D'Locka
D'Lauterbochsiedlung
Mühllocka
Mühdorf
Mühhoiz
Owahort
Owalondshog
Owandorf

Owastraß
Owawoisee
Pesnboch
D'Rosnlein
Untahort
Untalondshog
Vogging
Weidet

Nochbagmoana hod Föikirchn neine, des sand: im Nordn Sonkt Martin im Mühkreis (im Beziak Rohrboch), Herzogsdorf und Sonkt Gotthard im Mühkroas (olle zwa im Beziak Urfahr-Umgewung), im Ostn sans Woiding und Goidwörth (a olle zwa in Urfahr-Umgewung), im Südn Oikovn und Pupping (olle zwa im Beziak Efading, der wos zan Hausruckviadl ghert), und im Westn grenzt Föikirchn an Hortkircha und an Oschoch an da Doana (de gehrnd a zu Efading).