Gerald Karner
Da Karner Gerald (* 1955 in Steyr) is a ehemoliga Offizia fum estareichischn Bundeshea. Sai lezda Deanstgrad woa Brigadier. In da Öffentlichkaid is a foa oim ois Milideastrateg und Analyst fu milidearische Konflikt bekaunt, dea oft im Feanseng ban ORF in Nochrichdnsendungen und ba Diskussionen midret.
Sai Kariea
WerkelnDa Brigadier Karner, wiar a in de Medien moasdns gnend wiad, is in Steyr in d'Schui gaunga. Noch da Matura is a noch Neischdod auf de Theresianische Milideaakademi (MilAk) gaunga und is so Offizia ban estareichischn Bundeshea woan. Doat hod a de Ausbüdung zum Generalstabsoffizia absolviad und daun im Lauf da Joa etla faschidane Funkzionen ghobt. Zum Journalismus is a 1993 kema, wiar a de Funkzion fum Chefredaktea fu da Österreichischen Militärischen Zeitschrift (ÖMZ) iwanuma hod. Ea hod des Bladl fia Bundesheala komplet umgrömpit und wida af Foadamaun brocht. Wail a dafoa söwa weng mid Medien z'doa ghobt hod, hod a si des notwendige Wissn eascht auneigna miassn. Ea hod an Kuas ban Kuratorium fia Journalistenausbildung gmocht und is 1997/98 in de USA gfoan auf an Leagaung fum US Army War College in Carlisle, Pennsylvania. 1999 hod a as Seminar fia Höhere Führung fu da deitschn Bundeswea in Hambuag absolviad.
In da Öffentlichkaid bekaunt woan is a so um s'Joa 1995, wia in Jugoslawien da Bosnienkriag ausbrocha is, und eam da ORF oiwai wida ois Milideaexpeat ins Schdudio aiglodn hod. Duach sei Oat, milidearische Sochfahoit in Publikum faschdendli zan daklean, is a boid a beliabta Kommentatoa woan, dens Feanseng oiwai wida aiglodn hod, a daun wias im Jugoslawienkriag im Kosovo waida gaunga is. Ois prominente Figua is a a 2001/2002 fum Fataidigungsminisda in de Refoamkommission beruafn woan, de si Gedaunkn zan Umbau fum Bundeshea gmocht hod (Oagentli hods zeascht Projektgruppe zur Reorganisation des Bundesministerium fia militärische Landesvateidigung ghoassn, eascht 2003 is draus de Bundeshea-Refoamkommission woan). Nochdem a oiwai meara in de Median woa und a Aufgom fias Fataidigungsminisdearium iwanuma hod, hod a 2001 in Postn fum Chefredaktea bai da Milideazeidschrift aufgem.
Wai de Kriag auf da Wöd laida ned weniga woan san, hod a a in de foigende Joa oiwai gnuag z'doa ghobt und im Feanseng de milidearische Situazion unta aundam im Afghanistan-Kriag fu de USA geng de Taliban kommentiad. Ob 2003 hod a daun oft iwa'n Irakkriag fum George W. Bush zan redn ghobt, iwa de KFOR-Truppn im Kosovo, wo a estareichischs Milidea dabai woa und iwa'n Ainsoz fu estareichische Friednstruppm gemainsaum mid de Franzosn im Tschad, weng da Darfur-Krise. Z'lezt hod a 2011 de Revolutionen in Tunesien und Egyptn fia de estareichischn Feansezuaschaua kommentiad und in Milideaainsotz gengan Gaddafi in Libyen.
Nem seina Oawad ois Kommentatoa fia'n ORF, oawat a fia de HILL International GmbH, fu dear a 2006 und 2007 a Gscheftsfiara woa. Danem hod a einige Biacha zu seim Fochgebiad gschrim.
Wos in Umbau fum Bundeshea bedrift, is da Brigadier Karner a Befiawoata fu am Berufsheer und im Gengsoz du dea moastn aktivn Offizier fum Bundeshea is a a fia de Obschoffung fu da Weapflicht, womid a im lezdn Schdraid Aunfaung 2011 auf da Seitn fum Fataidigunsminisda, in Darabos Norbert fu da SPÖ, geng de Linie fu da ÖVP gschdaundn is.
Beleg
Werkeln- Österreichisches Bundesheer: Brigadier Gerald Karner erhält den Staatspreis für geistige Landesverteidigung, 18. November 2003
- IDC Central Europe GmbH: IDC IT Security Roadshow 2008: Gerald Karner (Seite nicht mehr abrufbar; Suche in Webarchiven)
- ÖAAB-FCG-Blog: Gerald Karner: Sonore Stimme fürs Berufsheer, Interview, 12. Oktober 2010