Iberetsch
| Der Artikl is im Dialekt Sidtiroularisch gschriem worn. |
Iberetsch oder Ibrétsch (amtli: Überetsch) isch as Gepiat zwischn Méndlkåmm unt Mittrperg (Mitterberg, Kaiserberg). Zun Ibrétsch ghearn die Gemeintn Eppan unt Kåltrn mit insgesåmt uma 21 000 Einwohna in Joa 2011. Dr tiafschte Punkt ligg pan Kåltrer Sea mit 214m ibrn Mér.
Wirtschaftd
WerkelnAf groaße Flächn isch Weinpau unt Ópschtånpau (Épfl), dr Turismus spielt aa gånz a wichtige Róll. Die pekånnte Sidtirólr Weinstråßn geaht mittlt durchn Ibrétsch.
Die Lait
WerkelnDie zwoa Gemeintn håm schón seit ibr 90 Jåhr a gemeinsåms Nåchrichtnplattl: Gemeindeblatt von Eppan und Kaltern. An auffållete Ibrétschr Identität gips dechtrsch nét: die Kåltrer sein meischtns Kåltrer, wénns sie gfrågg wern, nét Ibrétschr, die Eppanr sein Eppanr. Ódr die Einwóhner wern aa nåch ihre Frakziónen pezeichnt: wer va St. Pauls in Eppan kimmp, isch a Paulsnr. Aa die Dialekte va poade Órte låssn sich untrscheidn. Die Einwóhnr va die poadn Órte håm pa die jeweils åndrn an Spitznåmen: die Kåltrer sein die Herrgóttskindr und die Eppanr sein die Rattigschweaf (Rettichschwänze).
Van Ibrésch péndlen ålle Tåg viel Lait af Poazn zu dr Årbet. Die weschtlichn Nåchprn va die Ibréschr sein die walschn Oanspergr.
Psundrheitn
Werkeln
Af dr Grénz zwischn die zwoa Gemeintn, nó mehr af Eppanr Gepiat, sein die Eisléchr (Eppaner Eislöcher). Dés isch a pewåldete Zóne va kaum an Hektar, wó aus Léchr in Pódn Kåltluft ausr kimmp.
As gip an Pauschtiil (Baustil), der als Überetscher Stil pezeichnt wert. Man sicht’n pa die herrschåftlichn Pautn ausn 16. unt 17. Jåhrhundrt.
Die Ibrétschr Hittn (Überetscher Hütte) isch a Perggåschthaus af 1773m Heach a påår Kilometr sidlich van Méndlpåss in an schean Wåndrgepiat. Als Gåscht kimmp man lei zu Fuaß hin. Sie gheart zun Gemeindegepiat va Tramin, also nét zun Ibrètsch!