Monica Lewinsky

De Monica Lewinsky (* 23. Juli 1973 in San Francisco, Kalifornien) is a amerikanische Psychologin. Wejdweit bekannt is owa fia ia Gschpusi (Clinton: an inappropriate relationship ) midn ehmolign amerikanischn Presidentn Bill Clinton in de 1990a Joar, wias no Praktikantin im Weißn Haus woa.

De Monica Lewinsky 2015

Des Gschpusi hod in Amerika zua ana innapolitischn Krisn und fost zua eazwunganan Obdankung vom Presidentn gfiaht (impeachment of Bill Clinton). Bekannt woan is de Affea ois Lewinsky Skandai (in da USA ois: Lewinsky scandal, Monicagate, Lewinskygate, Sexgate usw., de lezdan ois Ospiiung auf Watergate).

Lem

De Lewinsky is in ana reichn Familie in Kalifornien aufgwoxn, groußteis in Los Angeles. Ia Voda is Fochoarzt fia Onkologie (Krebs). Ea is da Suhn vo deitschn Judn, de wo vo de Nazis gflichdd san. Ia Muada is Autorin und stammt vo litauischn und russischn Judn ob. De Familie woa im Sinai Temple engagiat, ana konservativn jidischn Gmoa in Sidkalefornien. De Monica hod do aa a religiese Schui bsuacht. De Streidarein um de Scheidung vo iare Leid uma 1987/1988 ham an signifikantn Einfluss auf de Monica ghobt. In Los Angeles is de Lewinsky aa aufd High School ganga und in Santa Monica zwoa Joar auf a College (vo 1991 - 93). Am Lewis & Clark College z Portland, Oregon, hods 1995 an Obschluss in Psychologie gmocht. Duach de Konektschns vo iare Leid hods im Weißen Haus a Praktikantenschtej otredn kina. Dazua is de Monica auf Washington zong.

Da Skandai

De Lewinsky hod ogem, dass zwischn Novemba 1995 und Meaz 1997 ois Praktikantin im Weißn Haus nein Sexuaiealebniss midn Clinton ghobt häd, wia beispiisweis, dass eam an blosn häd (Fellatio), gveglt häd a si owa nit.

A Kollegin, dea wo si de Gschichtn vazejht ghobt hod, hod Telefongschpräch mit da Lewinsky mitgschniddn und des geng an Wiin vo da Monica an de Effentlichkeit brocht. De Lewinsky hod so wia da Clinton ois unta Eid obgschtriddn: "I did not have sexual relations with that woman, Miss Lewinsky." Zua dea Zeit is aa scho a andane Untasuachung gegan Clinton weng sexuella Belästigung glaffa, im Foi Paula Jones, ana Mitoawatarin wearend seina Zeit ois Gouverneur vo Arkansas.

Eascht wia da Chefeamiddla Kenneth Starr (Starr Commission), de Lewinsky zun Gschtändnis brocht hod und sie eam a blaus Kloadl mit Schpeamaschprizza iwagem ghobt hod, is aa da Clinton umgfoin und hod ois gschdandn: "I did have a relationship with Miss Lewinsky that was not appropriate."

Aufgrund vo dem Skandai is de Lewinsky wejdweit bekannt woan.

• 
  Mardi Gras Umzug, 1999 z New Orleans (Satire aufn Starr Report iwan Clinton).
• Bill Clinton: "I did not have sexual relations with that woman, Miss Lewinsky."
• 
  Monica Lewinsky, 1997

Lem danoch

Aus da wejdweitn Berihmtheit hod de Lewinsky danoch bis etz koan bsundan Profit ziang kena. Se hods unta andam ois Untanehmarin mit Handtoschna vasuacht, ois Feansäämoderatorin und ois Schprecharin vo ana Dietfiama. Aufgrund vo da Eafoiglosigkeit is auf London zong und hod do 2006 ian Masta in Soziaipsychologie gmocht.

Anno 2014 is de Lewinsky wieda in de Effentlichkeit tredn. Im Mai hods fia de Zeitschrift Vanity Fair han Artike "Shame and Survival" gschriem, wo s iwa ia Lem und ian Skandai geschriem hod.

Im Juli 2014 is de Lewinsky im Feansääsenda The National Geographic Channel fian Dreiteila The 90s: The Last Great Decade interviewt woan.

Seit Oktoba 2014 sezt sa si effentli geng Cyberbullying ("Online-Mobbing") ei. Dazua hod sa si aa a Twitterkonto zuaglegt, wo innahoib vo 24 Stundn iwa 70.000 Follower ghobt hod (da lapidare Easchttweet: "#HereWeGo", boarisch Auf gähts!, is meah wia 4.200 moi retweetet woan).

Literatua

• Andrew Morton, Monica Lewinsky (Hrsg.): Monica Lewinsky. Ihre wahre Geschichte. Ullstein Verlag, Berlin 1999, ISBN 3-550-05016-X.

Im Netz

 Commons: Monica Lewinsky – Sammlung vo Buidl, Videos und Audiodateien

• Literatur von und über Monica Lewinsky im Katalog der Deutschen Nationalbibliothek.
• «Ich bin heute etwas glücklicher als früher» hossli.com, Interview vom 3. Mai 2001.
• A Guide to the Monica Lewinsky Story, also: The Starr Report; Tripp Tapes; Articles of Impeachment; The "Stalker" Tale
• Timeline of the affair from The Washington Post
• Monica Lewinsky at the Internet Movie Database
• Monica Lewinsky auf Twitter